Romayî 2 - Пәймана Ну (Инщил)

Диԝана Хԝәдейә һәԛ

¹ Аԝа әʼвдо, дьхԝази кʼи би, гава лома дьки, тӧ нькари хԝә бесущ ки. Чаԝа лома хәлԛе дьки, ӧса жи тӧ хԝә ломәкʼар дьки, чьмки тӧ кӧ лома дьки, хут ԝан тьшта дьки.

² Ле әм заньн кӧ диԝана Хԝәде ԝе бь рʼастийе сәр ԝанда бе, йед кӧ тьштед ӧса дькьн.

³ Аԝа әʼвдо, тӧ кӧ лома хԝәйе ван кьра дьки у тӧ хԝәха жи ԝан тьшта дьки, тә тʼьре те жь диԝана Хԝәде бьрʼәви?

⁴ Йан жи тӧ кӧ дәԝләмәндтийа ширьнайи, бәрбьһери у сәбьра Ԝи беһӧрмәт дьки, тӧ ньзани кӧ ширьнайийа Хԝәде тә дьбә бәрбь тʼобәкьрьне?

⁵ Ле тӧ бь сәрһʼьшки у дьлкәвьрийа хԝә хәзәбе сәр хԝәда дьщьвини, бона Рʼожа Хәзәбе, гава диԝана Хԝәдейә һәԛ хӧйа бә.

⁶ Әԝе ԝәкә әʼмәле һәр кәси бинә пешийа ԝан.

⁷ Жийина һʼәта-һʼәтайе ԝе бьдә ԝан, йед кӧ тʼьме бь думька дьреж нава кьрьнед ԛәнщда нә, кӧ һӧрмәте, рʼумәте у нәмьрийе дьхԝазьн.

⁸ Ле һерс у хәзәбе сәр ԝанда бә, йед кӧ кʼара хԝә дьгәрʼьн, дәст жь рʼастийе кьрьнә у хԝә данә хьрабийе.

⁹ Тәнгаси у зӧлме сәр ԝан һʼәмуйада бе, йед хьрабийе дькьн, пешийе сәр щьһуйа, паше сәр нәщьһуйа.

¹⁰ Ле һӧрмәт, рʼумәт у әʼдьлайи ԝе ԝан һʼәмуйарʼа бә, йед кӧ ԛәнщийе дькьн, пешийе щьһурʼа у паше нәщьһурʼа.

¹¹ Чьмки ль щәм Хԝәде фьрԛи тʼӧнә.

¹² Әԝед бейи Ԛануна Муса кӧ гӧнә дькьн, бейи Ԛанун жи ԝе ӧнда бьн, ле әԝед хԝәйиԛанун кӧ гӧнә дькьн, бь Ԛануне жи ԝе диԝана ԝан бьбә.

¹³ Чьмки нә кӧ әԝед Ԛануне дьбьһен ль бәр Хԝәде рʼаст ьн, ле әԝед кӧ Ԛануне дьԛәдиньн ԝе рʼаст бенә һʼәсабе.

¹⁴ Нәщьһуйед кӧ Ԛануна ԝан тʼӧнә, гава бе һʼәмде хԝә хԝәстьнед Ԛануне дьԛәдиньн, бәле әԝә бе Ԛанун ьн, хԝәха бона хԝә дьбьнә ԛанун.

¹⁵ Чьмки әвана дьдьнә кʼьфше, кӧ хԝәстьна Ԛануне дьле ԝанда ньвисар ә. Исафа ԝан жи шәʼдәтийа ве йәке дьдә у фькьред ԝан щарна ль ԝан нәһәԛ дькьн, щарна бесущ дькьн.

¹⁶ Ԝе Рʼоже ԝе ӧса бә, гава Хԝәде бь дәсте Мәсиһ Иса диԝана тьштед мәрьвайә дьзива бькә, анәгори Мьзгинийа кӧ әз даннасин дькьм.

Щьһу у Ԛанун

¹⁷ Аԝа тӧ щьһу тейи һʼәсабе, тә хԝә спартийә Ԛануне у бь Хԝәдейе хԝә дьфьрʼи,

¹⁸ хԝәстьна Ԝи зани у жь Ԛануне һин буйи, ԛәнщи-хьрабийе жь һәв дәрдьхи.

¹⁹ У тӧ сәр хԝә гӧман и, кӧ рʼебәре кора йи, рʼонайийа бәр йед тәʼрийеда,

²⁰ ширәткʼаре бефәʼма, дәрсдаре хьшима. Тӧ хԝәда жи гӧман и, кӧ бь Ԛануне хут тӧ хԝәйе тʼәрзе занәбуне у рʼастийе йи.

²¹ Ле бәле аԝа тӧ кӧ һәвале хԝә һин дьки, хԝәха хԝә һин наки? Даннасин дьки, кӧ нәдьзьн, ле тӧ дьдьзи?

²² Дьбежи: «Зьнийе нәкә», ле зьнийе дьки? Жь пʼута зьвер и, ле пʼарьстгәһед ԝан тʼалан дьки?

²³ Бь Ԛануне дьфьрʼи, ле Ԛануне дьтʼәрʼьбини, Хԝәде беһӧрмәт дьки?

²⁴ Чаԝа ньвисар ә: «Рʼуйе ԝә щьһуйада наве Хԝәде нава нәщьһуйада те беһӧрмәткьрьне».

²⁵ Бәле кʼара сьнәтийе ԝе һәбә, һәгәр Ԛануне бьԛәдини. Ле һәгәр тӧ Ԛануне дьтʼәрʼьбини, сьнәтбуна тә дьбә бесьнәти.

²⁶ Ӧса жи, һәгәр йе нәсьнәткьри тʼәмийед Ԛануне бьԛәдинә, нәсьнәтийа ԝи ԝе сьнәти нәйе һʼәсабе?

²⁷ У йе бьнйатʼа хԝәда нәсьнәткьри кӧ Ԛануне дьԛәдинә, ԝе диԝана тә бькә, кӧ тӧ хԝәйе ньвисар у сьнәтийе йи, ле Ԛануне дьтʼәрʼьбини.

²⁸ Чьмки щьһу нә әԝ ә, кӧ дәрвава йә у сьнәти нә әԝ ә, кӧ дәрвава сәр бәдәне йә.

²⁹ Ле щьһу әԝ ә, йе кӧ дьле хԝәда щьһу йә у сьнәтийа рʼаст дьле сьнәтбуйи йә, бь Рʼӧһʼ, нә бь Ԛануна ньвисар. Йе һа, нә кӧ мәрьв пʼәйе ԝи дьдьн, ле Хԝәде.