Romayî 15 - Пәймана Ну (Инщил)

Тӧ ль хәлԛе хԝәш ԝәрә, нә кӧ ль хԝә

¹ Әм кӧ баԝәрийеда ԛәԝат ьн, гәрәке бькʼәвьнә бьн баре сьста, нә кӧ әм ль хԝә хԝәш бен.

² Бьра жь мә һәр кәс алийе ԛәнщийеда ль һәвале хԝә хԝәш бе, кӧ баԝәрийеда бьшьдә.

³ Чьмки Мәсиһ жи нә кӧ ль Хԝә хԝәш һат, ле чаԝа ньвисар ә: «Әԝ ԛаред кӧ ль Тә дькьн, ль Мьн дькьн».

⁴ Ле чь кӧ пешда кʼьтебада һатә ньвисаре, бона һинбуна мә һатә ньвисаре, ԝәки әм бь сәбьре у ԝан готьнед ньвисарада кӧ бине дьдьнә бәр мә, хԝәйигӧман бьн.

⁵ Дә бьра Хԝәдейе сәбьре у бина ль бәр һәр кәси бьдә ԝә, кӧ һун һьндава һәвда сәр нетәке бьн, ԝәкә нәхш-тʼәрзе Мәсиһ Иса,

⁶ кӧ һун һʼәму бь дьл у зарәки шькьрийе бьдьнә Хԝәдейе Баве Хӧдане мә Иса Мәсиһ.

Мьзгини бона нәщьһуйа

⁷ Бона ве йәке бона шькьрийа Хԝәде һәвдӧ ԛәбул кьн, чаԝа Мәсиһ әм ԛәбул кьрьн.

⁸ Чьмки әз ԝәрʼа дьбежьм, кӧ Мәсиһ бу хьзмәткʼаре щьһуйа, бона амьнийа Хԝәде әʼйан кә, ԝәки әԝ созе кал-баварʼа һатийә дайине, мак кә

⁹ у нәщьһу бона рʼәʼма Ԝи шькьрийе бьдьнә Хԝәде. Чаԝа ньвисар ә: «Бона ве йәке Әзе нав нәщьһуйада пәсьне Тә бьдьм у әшԛи наве Тә бьстьрем».

¹⁰ У диса дьбежә: «Гәли нәщьһуйа, ша бьн тʼәви мьләте Ԝи!»

¹¹ У диса дьбежә: «Шькьрийе бьдьнә Хӧдан гәли нәщьһуйа у пәсьне Ԝи бьдьн, һʼәму щьмәʼтно».

¹² Ишайа жи дьбежә: «Тамарәкә Йеша ԝе дәре, бьбә мире нәщьһуйа у нәщьһу ԝе гӧмана хԝә бьдьнә сәр Ԝи».

¹³ Бьра Хԝәдейе гӧмане дьле ԝә бь шабуне у әʼдьлайийева бькʼьмкʼьминә, бона ԝе баԝәрийа ԝә, ԝәки гӧмана ԝә бь ԛәԝата Рʼӧһʼе Пироз зедә бә.

Хьзмәткʼарийа Паԝлосә бона нәщьһуйа

¹⁴ Әз хԝәха ԝәда гӧман ьм хушк-бьрайед мьн, кӧ һун ԛәнщийада манә у занәбунева жи дагьрти нә, дькарьн һәвдӧ ширәт кьн.

¹⁵ Ле аликива мьн тӧрӧш кьр ԝәрʼа ньвиси, кӧ ԝан тьшта бькьмә бира ԝә, бона ԝе кʼәрәма кӧ жь Хԝәдеда мьнрʼа һатийә дайине,

¹⁶ ԝәки әз нава нәщьһуйада бьбьмә бәрдәстийе Мәсиһ Иса. Әз нава Мьзгинидайина Хԝәдеда мина кʼаһинәки хьзмәткʼарийе дькьм, кӧ һʼәдибуна нәщьһуйа ԛәбул бә, бь Рʼӧһʼе Пироз бӧһӧрти-жьбарә бә.

¹⁷ Аԝа әз дькарьм бь сайа Мәсиһ Иса пе хьзмәткʼарийа хԝәйә бона Хԝәде бьфьрʼьм.

¹⁸ Әз тӧрӧш накьм бона тьштәки ӧса хәбәр дьм, пештьри ԝан тьштед кӧ Мәсиһ бь дәсте мьн кьрьнә, бона гӧһдарийа нәщьһуйа, һәгәр бь хәбәра бә йан кьра бә,

¹⁹ бь ԛәԝата нишана у кʼәрәмәта, бь ԛәԝата Рʼӧһʼе Хԝәде. У бь ви аԝайи әз жь Оршәлиме гьрти һʼәта Илиркуме гәрʼийам, Мьзгинийа Мәсиһва тʼьжи кьр.

²⁰ Мьн дьщәʼданд кӧ ԝан дәра Мьзгинийе даннасин кьм, кʼидәред бона наве Мәсиһ нәһатьбу бьһистьне, ԝәки нәбә кӧ әз сәр һʼиме һьнәкед дьн чекьм.

²¹ Ле бәле чаԝа ньвисар ә: «Кʼижанарʼа бона Ԝи нәһатийә готьне, ԝе бьбиньн у кʼижана бона Ԝи нә бьһистийә, ԝе бьзаньбьн».

Тʼьвдира Паԝлосә бона рʼомайийа

²² Ләма гәләк щара рʼе нәдькʼәтә мьн сәр ԝәда бьһатама.

²³ Ле ньһа иди ван алийа щийе ӧса тʼӧнә пʼегәһ ле нәкʼәтьбә у әв чәнд сал ә әз дькьм бемә щәм ԝә,

²⁴ гава һәрʼьмә Спанйайе. Аԝа гӧмана мьн һәйә, кӧ әзе сәр рʼийа хԝә сәрики ль ԝә хьм у жь ԝьр һун мьн вәрʼекьн әз һәрʼьмә Спанйайе, гава бина мьн һьнәки пе ԝә дәре.

²⁵ Ле ньһа әз дьчьмә Оршәлиме, кӧ бь кʼомәкдайине хьзмәткʼарийа щьмәʼта Хԝәде бькьм.

²⁶ Чьмки хушк-бьрайед Мәкәдонйайе у Ахайайе бь һәврʼа ԛайл бун, кӧ аликʼарике бьдьнә щьмәʼта Хԝәдейә бәләнгаз, йед кӧ Оршәлимеда дьминьн.

²⁷ Әԝ ԛайл бун у дәйндаре ԝан ьн жи. Чьмки нәщьһуйа алийе рʼӧһʼанида кʼомәк жь щьһуйа стандьн, гәрәке әԝ жи алийе һәбука дьнеда кʼомәке бьдьнә ԝан.

²⁸ Аԝа пәй ве кьрьнерʼа, гава кʼомәка тʼопкьри бьгьһиньмә щи, әзе бем щәм ԝә, жь ԝьр дәрбази Спанйайе бьм.

²⁹ Әз заньм гава бемә щәм ԝә, әзе бь дәԝләмәндтийа дӧа-дьрозгед Мәсиһ бем.

³⁰ Әз һиви жь ԝә дькьм хушк-бьрано, бь сайа Хӧдане мә Иса Мәсиһ у ԝе һʼьзкьрьна жь Рʼӧһʼ, ԝәки һун бь дӧайед хԝәйә ль бәр Хԝәде тʼәви шәрʼкʼарийа мьн бьн.

³¹ Дӧа бькьн, ԝәки әз жь дәсте ԝан хьлаз бьм, йед кӧ Щьһустанеда нәбаԝәр ьн у ԝәки хьзмәткʼарийа мьнә бона кʼомәкдайине Оршәлимеда ль щьмәʼта Хԝәде хԝәш бе.

³² У бь ви аԝайи әзе бь әʼмьре Хԝәде, бь дьләки ша бемә щәм ԝә у һьнәки тʼәви ԝә һеса бьм.

³³ Дә бьра Хԝәдейе әʼдьлайийе тʼәви ԝә һʼәмуйа бә. Амин.