Romayî 14 - Пәймана Ну (Инщил)

Лома ль бьрайе хԝә нәкә

¹ Әԝе кӧ баԝәрийеда сьст ә, ԛәбул кьн, ле нә кӧ бона бир-баԝәрийа ԝи жерʼа бькʼәвьнә дәʼԝе.

² Йәк баԝәр дькә, кӧ һәр тьшти дькарә бьхԝә, ле йе сьст ә, тʼәне пʼьнщарʼе дьхԝә.

³ Әԝе кӧ дьхԝә, бьра йе нахԝә беһӧрмәт нәкә у әԝе кӧ нахԝә, бьра лома йе дьхԝә нәкә, чьмки Хԝәде әԝ ԛәбул кьрийә.

⁴ Тӧ кʼи йи кӧ лома хӧламе хәлԛе дьки? Һәгәр сәкьни бә йан кʼәти бә, әԝ ише Хԝәйе ԝи йә. Ле ԝе бьсәкьнә, чьмки Хӧдан дькарә ԝи бьдә сәкьнандьне.

⁵ Йәк рʼожәке сәр рʼоже дьнрʼа дьгьрә, йәк жи һʼәму рʼожа ԝәкә һәв дьгьрә. Бьра һәр кәс фәʼмина хԝәда баԝәр бә.

⁶ Кʼе рʼожәке хԝәрʼа әʼзиз һʼәсаб дькә, бона Хӧдан әʼзиз һʼәсаб дькә, ӧса жи әԝе дьхԝә бона Хӧдан дьхԝә, чьмки шькьрийе дьдә Хԝәде. У йе нахԝә жи бона Хӧдан нахԝә у шькьрийе дьдә Хԝәде.

⁷ Жь мә тӧ кәс бона хԝә нажи у тʼӧ кәс жи бона хԝә намьрә.

⁸ Һәгәр әм дьжин, бона Хӧдан дьжин у һәгәр әм дьмьрьн бона Хӧдан дьмьрьн. Аԝа һәгәр әм бьжин йан бьмьрьн, пʼара Хӧдан ьн.

⁹ Бона ве йәке жи Мәсиһ мьр у сах бу, ԝәки һьн һʼӧкӧми сәр мьрийа бькә, һьн жи сәр зендийа.

¹⁰ Иди тӧ чьма лома бьре хԝә дьки? Йан тӧ чьма бьре хԝә беһӧрмәт дьки? Әм һʼәмуйе жи ль бәр диԝана Хԝәде бьсәкьньн.

¹¹ Чьмки ньвисар ә: «Әз сахийа Хԝә кьм, Хӧдан дьбежә, кӧ һәр чок ԝе ль бәр Мьн бьтәԝә у һәр кәсе бежә: ‹Тӧ йи Хԝәде›».

¹² Аԝа жь мә һәр кәсе бона хԝә щабе ль бәр Хԝәде бьдә.

Бьре хԝә пʼьшк нәкә

¹³ Дә иди әм лома һәвдӧ нәкьн, ле һун хԝәрʼа бьдьнә бәр һʼәсаба, чаԝа бькьн кӧ ньг нәдьнә ль бәр бьра, кӧ нәлькʼӧмьн йан пʼьшк нәбьн.

¹⁴ Әз ве йәке заньм у Хӧдан Исада гӧман ьм, кӧ тьштәки жь хԝә һʼәрам тʼӧнә, ле бона ԝи һʼәрам ә, йе кӧ һʼәрам һʼәсаб дькә.

¹⁵ Һәгәр бь хԝарьна хԝә тӧ дьле бьре хԝә жь хԝә дьһели, иди жийина тә нә бь һʼьзкьрьне йә. Бь хԝарьна хԝә ԝи ӧнда нәкә, бона кʼижани Мәсиһ мьр.

¹⁶ Бьра әԝ тьштед кӧ тӧ бона хԝә ԛәнщ дьбини, нәбә мәʼни кӧ хьраби бе готьне.

¹⁷ Чьмки Пʼадшатийа Хԝәде хԝарьн у вәхԝарьнеда нинә, ле һәԛи, әʼдьлайи у шабунеда йә, кӧ дайина Рʼӧһʼе Пироз ьн.

¹⁸ Кʼе бь ван хӧламтийе Мәсиһрʼа дькә, әԝ ль Хԝәде хԝәш те у дьбә ширьне мәрьва.

¹⁹ Аԝа әм һьндава һәвда сәр нета әʼдьлайийе у баԝәри авакьрьне бьн.

²⁰ Рʼуйе хԝарьнеда шьхӧле Хԝәде хьраб нәкьн. Һәр тьшт һʼәлал ә, тʼәне бона ԝи мәрьви нә рʼаст ә, йе кӧ бь хԝарьна хԝә дьбә байисе кʼәтьна хәлԛе.

²¹ Ԛәнщ ә нә гошт бьхԝи, нә шәраве вәхԝи у нә жи тьштәки ӧса бьки, кӧ бьре тә бькʼәвә.

²² Тӧ чаԝа баԝәр дьки, бьра нава тә у Хԝәдеда бьминә. Хԝәзи ль ԝи, йе кӧ бь ван тьштед кӧ фәʼм дькә кӧ рʼаст ьн, хԝә гӧнәкʼар накә.

²³ Ле һәгәр йәк дьхԝә дӧдьлийе дькә, диԝане сәр хԝәда тинә, чьмки бь баԝәрийе нахԝә. У һәр тьште кӧ нә бь баԝәрийе йә, гӧнә йә.