Peyxam 9 - Пәймана Ну (Инщил)

Борʼийа пенща

¹ Мьлйакʼәте пенща ль борʼийе хьст у мьн дина хԝә дайе, ва стәйркәк жь әʼзмен кʼәтә сәр рʼуйе әʼрде у кʼьлита дәре гәлийе һәй-ԝайе ԝе стәйркерʼа һатә дайине.

² Әԝе дәре гәлийе һәй-ԝайе вәкьр, жь гәли ду-духан дәркʼәт мина дуйе кʼура мәзьн у рʼуйе рʼойе у һәԝе гьрт.

³ Жь ԝе ду-духане кӧли дәркʼәтьнә сәр рʼуйе әʼрде, ԝанрʼа ԛәԝата мина ԛәԝата дупʼьшкед әʼрде һатә дайине.

⁴ Ԝанрʼа һатә готьне, кӧ зьраре нәдьнә гиһе әʼрде, нә жи тʼӧ шинайийе у даре, ле бьдьнә ԝан мәрьвед кӧ мора Хԝәде ль сәр әʼнийа ԝан тʼӧнәйә.

⁵ Ԝанрʼа һатә дайине, кӧ ԝан нәкӧжьн, ле пенщ мәһа бьдьнә щәфе. Еша ԝан мина еша лехьстьна дупьшка бу.

⁶ Ԝан рʼожада мәрьве ль мьрьне бьгәрʼьн, ле ԝе ԛәт нәбиньн, әԝе һʼәйра мьрьнеда бьн, ле мьрьне жь ԝан бьрʼәвә.

⁷ Ԛьлхе ԝан кӧлийа мина ԝан һәспа бун, йе кӧ бона шерʼ тенә һазьркьрьне. Ль сәр сәре ԝан тьштед мина тʼащед зерʼин һәбун у рʼуйе ԝан мина рʼуйе мәрьва бун.

⁸ Пʼорʼе сәре ԝан мина пʼорʼе жьна бун у дьранед ԝан мина дьранед шера бун.

⁹ Еләкзьрьһʼед ԝан һәбун, мина йед һʼәсьни, дәнге баскед ԝан мина дәнге ԝан әʼрәба бун, кӧ чаԝа гәләк һәсп ԝан дькʼьшиньн у дажонә нава шерʼ.

¹⁰ Мина дупʼьшка жи почʼед ԝан һәбун у сәр почʼа жи дәрзи, кʼижанада ԛәԝата ԝан һәбу кӧ пенщ мәһа мерьв бьдьнә щәфе.

¹¹ Мьлйакʼәте гәлийе һәй-ԝайе ль сәр ԝан пʼадша бу, кӧ наве ԝи бь ибрани «Абадун» бу, бь йунани «Аполийон», кӧ те фәʼмкьрьне: «Ԝеранкьр».

¹² Ԝәйа пешьн дәрбаз бу. Жь вьр шунда ва дӧ ԝәйе жи бен.

Борʼийа шәша

¹³ Мьлйакʼәте шәша ль борʼийе хьст у мьн дәнгәк жь һәр чар стьруйед горигәһа зерʼинә ль бәр Хԝәде бьһист,

¹⁴ кӧ готә ԝи мьлйакʼәте шәша, йе кӧ борʼи дестда бу: «Ԝан һәр чар мьлйакʼәтед кӧ ль бәр чʼәме Фьратейи мәзьн гьредайи нә вәкә».

¹⁵ Һьнге әԝ һәр чар мьлйакʼәт һатьнә бәрʼдане, йед кӧ бона ԝе сьһʼәте, ԝе рʼоже, ԝе мәһе у ԝе сале һатьбунә һазьркьрьне, ԝәки жь се пʼара пʼарәкә мәрьвайе бькӧжьн.

¹⁶ Мьн рʼәԛәма ордийед сийари бьһист кӧ дӧсьд милийон бу.

¹⁷ Ԝе дитьнокеда һәсп у сийаред ԝан мьнва аһа хӧйа бун: Рʼәнгед еләкзьрьһʼед ԝан рʼәнге сори мина егьр, ширки мина ԛалчʼичʼәке, ԛичʼьки мина кʼьркʼутеда бун. Сәре һәспед ԝан мина сәре шера бун у жь дәве ԝан агьр, ду у кʼьркʼут дәрдькʼәт.

¹⁸ Пе ван һәр се бәла, жь се пʼара пʼарәкә мәрьвайе, пе агьр, ду у кʼьркʼута кӧ жь дәве ван дәрдькʼәт һатьнә кӧштьне.

¹⁹ Чьмки ԛәԝата һәспа дәв у делед ԝанда бун. Делед ԝан мина мәʼра бун у сәре ԝан һәбун, кӧ пе ԝан зьрар дьдан.

²⁰ Әԝ мәрьвед майинә кӧ пе ван бәла нәһатьнә кӧштьне, жь ԝан пʼутед кӧ бь дәстед хԝә чекьрьбун вәнәгәрʼийан. Ԝана дәсте хԝә жь щьнһʼәбандьне, жь ԝан пʼутед зерʼә, зивә, сьфьрә, кәвьрә, дарә кӧ набиньн, набьһен у нагәрʼьн нәкʼьшандьн.

²¹ Ӧса жи жь кӧштьне, сербазийе, бенамусийе у дьзийа хԝә вәнәгәрʼийан.