Peyxam 8 - Пәймана Ну (Инщил)

Мора һʼәфта

¹ Чахе Әԝи мора һʼәфта вәкьр, әʼзменда ԝәкә нив сьһʼәти һәр тьшт сәԛьрʼи.

² Һьнге мьн әԝ һәр һʼәфт мьлйакʼәтед кӧ ль бәр Хԝәде сәкьнибун дитьн, ԝанрʼа һʼәфт борʼи һатьнә дайине.

³ Мьлйакʼәтәки дьн бьхурданга зерʼин дестда һат, ль бәр горигәһа зерʼин сәкьни. Ԝирʼа гәләк бьхур һатә дайине, ԝәки бь тʼәви дӧайед щьмәʼта Хԝәде дайнә сәр горигәһа зерʼинә ль бәр тʼәхте Хԝәде.

⁴ Дуйе ԝе бьхуре тʼәви дӧайед щьмәʼта Хԝәде жь дәсте ԝи мьлйакʼәти бәрбь Хԝәде бьльнд бу.

⁵ Паше мьлйакʼәт әԝ бьхурданг һьлда, жь агьре горигәһева дагьрт авитә сәр әʼрде. Бу гӧрʼинийа дәнгед әʼԝра бьруске бьрԛ вәда у әʼрд һʼәжийа.

Һәр чар борʼийед пешьн

⁶ Һьнге ԝан һәр һʼәфт мьлйакʼәтед кӧ һʼәфт борʼийед ԝан һәбун кʼаре хԝә кьрьн, кӧ ль борʼийа хьн.

⁷ Йе пешьн ль борʼийе хьст, тәйрок у агьр хунева тʼәвайи сәр әʼрдеда бари. У жь се пʼара пʼарәкә әʼрде шәԝьти, жь се пʼара пʼарәкә дара шәԝьти у һʼәму гиһайе шин шәԝьти.

⁸ Мьлйакʼәте дӧда ль борʼийе хьст, тьштәки мәзьни мина чʼийаки агьр пекʼәти һатә авитьне нава бәʼре. У жь се пʼара пʼарәкә бәʼре бу хун,

⁹ жь се пʼара пʼарәкә һʼәйԝанед бәʼреда ԛьрʼ бу у жь се пʼара пʼарәкә гәмийа ԝеран бу.

¹⁰ Мьлйакʼәте сьсийа ль борʼийе хьст у стәйркәкә мәзьнә мина ԛәндила алав пекʼәти жь әʼзмен кʼәтә сәр пʼарәкә жь се пʼаред чʼәма у авед канийа.

¹¹ Наве ԝе стәйрке Зьричʼк бу. Жь се пʼара пʼарәкә ава бу зьричʼк у жь ԝе аве гәләк мәрьв мьрьн, чьмки әԝ ав тәʼл бу.

¹² Мьлйакʼәте чара ль борʼийе хьст, жь се пʼара пʼарәкә рʼойе, жь се пʼара пʼарәкә һиве у жь се пʼара пʼарәкә стәйрка дәрб стандьн, ӧса кӧ жь се пʼара пʼарәкә ԝан ԛарийа у жь се пʼара пʼарәкә рʼоже рʼонайи нәда, ӧса жи жь се пʼара пʼарәкә шәве.

¹³ Һьнге мьн дина хԝә дайе, ԝе тәйрәки симьрʼ жор әʼзменда дьфьрʼи у мьн бьһист кӧ ԝи бь дәнгәки бьльнд гот: «Ԝәй, ԝәй, ԝәй ль сәре бьнәлийед ль рʼубари дьне, кӧ ԝе бәр дәнге ԝан борʼийед һәр се мьлйакʼәтед майин кʼәвьн, йед кӧ ԝе ль борʼийа хьн».