Peyxam 4 - Пәймана Ну (Инщил)

Тʼәхте әʼзменда

¹ Пәй ван тьштарʼа мьн дина хԝә дайе, ва әʼзменда дәрик вәкьри йә. У әԝ дәнге кӧ мьн бәре мина дәнге борʼийе бьһистьбу мьнрʼа гот: «Рʼабә ԝәрә ве жоре, Әзе ԝан тьштед кӧ гәрәке жь вьр шунда бьԛәԝьмьн, нишани тә кьм».

² Һәма һьнге Рʼӧһʼе Пироз һатә сәр мьн, мьн дина хԝә дайе, ԝе тʼәхтәк ль әʼзмен һәбу у йәк ль сәр тʼәхт рʼуньшти бу.

³ У шәԝԛа диндара Йе рʼуньшти мина йа кәвьре йаспис у сардийон бу. У кʼәскәсоре жи дора тʼәхт гьртьбу, мина ишьԛа зьмруде.

⁴ Ль дора ԝи тʼәхти бист чар кʼӧрси һәбун у ль сәр ԝан кʼӧрсийа бист чар рʼуспи рʼуньштьбун. Кʼьнщед чилә-ԛәрԛаш ль ԝан бун у тʼащед зерʼин жи ль сәре ԝан бун.

⁵ Жь тʼәхт бьруск у дәнгед гӧрʼинийа әʼԝр-әʼзмана дәрдькʼәтьн. Ль бәр тʼәхт һʼәфт агьред алавпекʼәти һәбун, кӧ әԝ һәр һʼәфт рʼӧһʼед Хԝәде нә.

⁶ Ль бәр тʼәхт тьштәки мина бәʼрәкә шушә һәбу, кӧ мина хьрустале зәлал бу. Ль дора тʼәхт, һәр алики чар рʼӧһʼбәр һәбун, кӧ пешийе у пашийева чʼәʼвава тʼьжи бун.

⁷ Рʼӧһʼбәре пешьн мина шер бу, рʼӧһʼбәре дӧда мина щанәга бу, рʼӧһʼбәре сьсийа рʼуйе ԝи мина рʼуйе мәрьва бу у рʼӧһʼбәре чара жи мина тәйре симьрʼи кӧ дьфьрʼә.

⁸ Һәр чар рʼӧһʼбәр жи шәш баски бун, сәр у бьнва чʼәʼвава хьт-хьти бун. У шәв у рʼож дәнге хԝә нәдьбьрʼин дьготьн: «Пироз, пироз, пироз, Хӧдан Хԝәдейе Һʼәму Зорайийе, Йе кӧ һәбу, Йе кӧ һәйә у Йе кӧ ԝе бе».

⁹ Гава ԝан һәр чар рʼӧһʼбәра, рʼумәт, һӧрмәт у шькьри дьданә Йе кӧ ль сәр тʼәхт рʼуньштийә у һʼәта-һʼәтайе Сах ә,

¹⁰ әԝ һәр бист чар рʼуспи бәр Йе кӧ ль сәр тʼәхт рʼуньшти дәвәрʼуйа дьчун, сәре хԝә бәр Ԝи даданин, Йе кӧ һʼәта-һʼәтайе Сах ә у тʼащед хԝә давитьнә бәр тʼәхт у дьготьн:

¹¹ «Йа Хӧдан Хԝәдейе мә, Тӧ һежа йи кӧ рʼумәт, һӧрмәте у ԛәԝате бьстини. Чьмки Тә һәр тьшт әʼфьрандьн у бь хԝәстьна Тә әԝ әʼфьрин у һәнә».