Peyxam 3 - Пәймана Ну (Инщил)

Тʼәми у ширәтед бона щьвина бажаре Сардәйсе

¹ Мьлйакʼәте щьвина Сардәйсерʼа бьньвисә беже: Әԝи кӧ һʼәфт рʼӧһʼед Хԝәде у һʼәфт стәйркед Ԝи һәнә, аһа дьбежә: Әз һаш жь кьред тә һәмә, наве тә һәйә йане тӧ сах и, ле рʼаст тӧ мьри йи.

² Һʼьшйар бә у әԝед кӧ манә ле ль бәр мьрьне нә, бькә бьра сәр хԝәда бен, чьмки Мьн кьред тә ль бәр Хԝәдейе Хԝә гьһишти нәдитьн.

³ Дә бинә бира хԝә кӧ тә чь стандийә у бьһистийә, гӧрʼа ԝан тьшта бькә у тʼобә кә. Ле һәгәр тӧ һʼьшйар нәби, Әзе мина дьзәки сәр тәда бьгьрьм у те ԛәт ньзаньби кӧ Әзе кʼижан сьһʼәтеда сәр тәда бьгьрьм.

⁴ Ле Сардәйседа чәнд кәсед тә һәнә кӧ ԝан кʼьнщед хԝә нәләԝьтʼандьнә. Әԝе бь кʼьнщед чилә-ԛәрԛаш тʼәви Мьн бьгәрʼьн, чьмки әԝә һежа нә.

⁵ Әԝе кӧ сәркʼәвә, әԝе аһа кʼьнщед чилә-ԛәрԛаш ль хԝә ԝәргьрә. Әзе наве ԝи жь кʼьтеба жийине тʼӧ щар рʼәсит нәкьм у наве ԝи ль бәр Баве Хԝә у ль бәр мьлйакʼәтед Ԝи ашкәрә кьм.

⁶ Гӧһе кʼе һәйә бьра бьбьһе, кӧ Рʼӧһʼ чь дьбежә щьвина.

Тʼәми у ширәтед бона щьвина бажаре Фьладәлфйайе

⁷ Мьлйакʼәте щьвина Фьладәлфйайерʼа бьньвисә беже: Әԝи пироз, Әԝи рʼаст, аһа дьбежә, Йе кӧ хԝәйе кʼьлита Даԝьд ә, кӧ вәдькә у тʼӧ кәс нькарә дадә у дадьдә тʼӧ кәс нькарә вәкә:

⁸ Әз һаш жь кьред тә һәмә. Ва Мьн дәрики вәкьри данийә бәр тә, кӧ тʼӧ кәс нькарә дадә. Әз заньм кӧ ԛәԝата тә һьнәки һәйә у тә готьна Мьн хԝәй кьр у наве Мьн инкʼар нәкьр.

⁹ Бьньһерʼә, һьнәкә жь кʼьништа мирещьн һәнә, йед кӧ дьбежьн: ‹Әмә щьһу нә›, ле рʼаст нә щьһу нә, әԝ дәрәԝа дькьн. Ва Әзе пʼейи сәр ԝан кьм, кӧ әԝ бен у ль бәр ньгед тә та бьн у бьзаньбьн Әз тә һʼьз дькьм.

¹⁰ Тә кӧ тʼәмийа Мьн хԝәй кьр у сәбьр кьр, Әзе жи тә жь ԝи ԝәхте щерʼьбандьне хԝәй кьм, йа кӧ ԝе бе сәр тʼәмамийа дьнйайе, кӧ бьнәлийед ль рʼубари дьне бьщерʼьбинә.

¹¹ Әзе зутьрәке бем, чи тә һәйә ԛәԝин бьгьрә, ԝәки тʼӧ кәс тʼаще тә нәстинә.

¹² Әԝе кӧ сәркʼәвә Әзе ԝи пʼарьстгәһа Хԝәдейе Хԝәда бькьмә стун у әԝе иди дәрнәкʼәвә дәрва. Әзе ль сәр ԝи наве Хԝәдейе Хԝә, ӧса жи наве бажаре Хԝәдейе Хԝә, аԝа готи наве Оршәлима ну бьньвисьм, йа кӧ жь Хԝәдейе Мьн жь әʼзмен ԝе бе хԝаре у Әзе наве Хԝәйи ну жи бьньвисьм.

¹³ Гӧһе кʼе һәйә бьра бьбьһе, кӧ Рʼӧһʼ чь дьбежә щьвина.

Тʼәми у ширәтед бона щьвина бажаре Лаԝдькйайе

¹⁴ Мьлйакʼәте щьвина Лаԝдькйайерʼа бьньвисә беже: ‹Йе Амин› аһа дьбежә, Әԝ шәʼде рʼаст у амьн, чʼәʼвканийа әʼфьрин у хӧльԛийед Хԝәде:

¹⁵ Әз һаш жь кьред тә һәмә, тӧ нә сар и у нә жи гәрм и. Хԝәзи тӧ йан сар буйайи йан жи гәрм.

¹⁶ Ле чьмки тӧ голи йи, нә сар и у нә жи гәрм, Әзе тә жь дәве хԝә бьрʼежьм.

¹⁷ Тӧ дьбежи: ‹Әз дәԝләти мә, ԝе йәкеда гәләк пешда чумә, ԛәт һʼәԝще тʼӧ тьшти нимә›. Ле тӧ ньзани кӧ тӧ мәʼрьм, рʼәбән, бәләнгаз, кор у тәʼзи йи.

¹⁸ Әз ве тʼәмийе дьдьмә тә: Зерʼе кӧ бь егьр һатийә сафикьрьне жь Мьн бькʼьрʼә, ԝәки тӧ дәԝләти би у кʼьнщед чилә-ԛәрԛаш жь Мьн бькʼьрʼә, кӧ ль хԝә ки, ԝәки шәрма тәʼзибуна тә бе ньхамтьне, ӧса жи дәрмане чʼәʼва, кӧ ль чʼәʼвед хԝә ди, ԝәки бьбини.

¹⁹ Әз кʼижана һʼьз дькьм ль ԝан һьлтем у ԝан ширәт дькьм. Бона ве йәке хирәт кә у жь гӧнәкьрьне вәгәрʼә!

²⁰ Ва Әз ль бәр дәри сәкьни мә у ль дери дьхьм. Һәгәр йәк дәнге Мьн бьбьһе у дери ль Мьн вәкә, Әзе һәрʼьмә һьндӧрʼ, тʼәви ԝи нан бьхԝьм у әԝе жи тʼәви Мьн.

²¹ Әԝе кӧ сәркʼәвә, Әзе дәстуре бьдьме кӧ тʼәви Мьн сәр тʼәхте Мьн рʼуне, чаԝа кӧ Әз сәркʼәтьм у тʼәви Баве Хԝә сәр тʼәхте Ԝи рʼуньштьм.

²² Гӧһе кʼе һәйә бьра бьбьһе, кӧ Рʼӧһʼ чь дьбежә щьвина».