Peyxam 20 - Пәймана Ну (Инщил)

Пʼадшатийа һʼәзар сали

¹ Һьнге мьн дина хԝә дайе, ва мьлйакʼәтәк жь әʼзмен дьһатә хԝаре, кʼьлита гәлийе һәй-ԝайе у зьнщирәкә мәзьн дәсте ԝида бу.

² Әԝи әԝ зийа гьрт, аԝа готи әԝ мәʼре бәре, кӧ хԝәха мирещьн у шәйтʼан ә у һʼәзар сали гьреда.

³ Әԝи әԝ авитә гәлийе һәй-ԝайе, сәр ԝи кʼьлит кьр у мор лехьст, ԝәки иди мьләта нәхальфинә, һʼәта һʼәзар сал тʼәмам бә. Пәй ԝе йәкерʼа әԝ гәрәке бона ԝәхтәки кьн бе бәрʼдане.

⁴ Һьнге мьн кʼӧрси дитьн кӧ әԝ ль сәр ԝан рʼуньштьн, кʼижанарʼа һатә дайине, ԝәки диԝане бькьн. Ӧса жи мьн рʼӧһʼед ԝан дитьн, сәре кʼижана бона шәʼдәтийа Иса у бона хәбәра Хԝәде һатьбунә лехьстьне, кʼижана сәре хԝә ль бәр щәʼнәԝьр у һʼәйкәле ԝи данәнибун у нә жи нишана ԝи һьлдабунә сәр әʼни йан дәсте хԝә. Әвана диса сах бун у тʼәви Мәсиһ һʼәзар сали пʼадшати кьрьн.

⁵ (Ле әԝ мьрийед майин сах нәбун, һʼәта һʼәзар сал тʼәмам бу.) Әв ә рʼабуна мьрийайә пешьн.

⁶ Хԝәзьли у бӧһӧрти-жьбарә йә, әԝе кӧ пʼара ԝи тʼәви рʼабуна мьрийайә пешьн һәйә. Мьрьна дӧда ль сәр ԝан һʼӧкӧм накә, ле әԝе бьбьнә кʼаһинед Хԝәде у Мәсиһ у ԝе тʼәви Ԝи һʼәзар сали пʼадшатийе бькьн.

Ахьрийа мирещьн

⁷ Гава һʼәзар сал тʼәмам бә, мирещьн ԝе жь зьндана хԝә бе бәрʼдане,

⁸ әԝе дәркʼәвә, ԝәки ԝан мьләтед һәр чар ԛӧлбед дьнеда, аԝа готи Гог у Магоге бьхальфинә у ԝан бона шәрʼ ль щики бьщьвинә. Рʼәԛәма ԝан ԝе мина ԛума дәве бәʼре бә.

⁹ Әвана ԝе тʼәмамийа әʼрде бәла бьн у дора ԝаргәһе ордийа щьмәʼта Хԝәде у бажаре һʼьзкьри бьгьрьн. Ле жь әʼзмен агьре бьбарә, ԝан һʼуфи хԝә кә.

¹⁰ Әԝ мирещьне кӧ әԝ хальфандьн, ԝе бе авитьне нава гола агьре кʼьркʼуте, ԝи щийе кӧ щәʼнәԝьр у пʼехәмбәре дәрәԝ теда нә. Ль ԝьр ԝе шәв у рʼож, һʼәта-һʼәтайе бьчәрчьрьн.

Диԝана хьлазийе

¹¹ Һьнге мьн тʼәхтәки мәзьни чили-ԛәрԛаш дит у Йәк ль сәр рʼуньштьбу. Әʼрд у әʼзман жь бәр Ԝи бәтавәбун у дәԝса ԝан кʼьфш нәбу.

¹² Ԝе һьнге мьн мьрийед бьчʼук у мәзьн дитьн кӧ ль бәр тʼәхт сәкьни бун. Кʼьтеб вәбун у кʼьтебәкә дьн жи вәбу, аԝа готи кʼьтеба жийине. Диԝана мьрийа анәгори ԝан кьред ԝанә кʼьтебада ньвисар һатә кьрьне.

¹³ Бәʼре мьрийед хԝә дан, Мьрьне у Дийаре Мьрийа жи мьрийед хԝә дан. Диԝана һәр мәрьвәки жь ԝан анәгори кьрьнед ԝан һатә кьрьне.

¹⁴ Һьнге Мьрьн у Дийаре Мьрийа һатьнә авитьне нава гола егьр. Әв гола егьр мьрьна дӧда йә.

¹⁵ У наве кʼе ве кʼьтеба жийинеда ньвисар тʼӧнәбу, әԝ һатә авитьне нава гола егьр.