Peyxam 2 - Пәймана Ну (Инщил)

Тʼәми у ширәтед бона щьвина бажаре Әфәсе

¹ Мьлйакʼәте щьвина Әфәсерʼа бьньвисә беже: Әԝи кӧ һʼәфт стәйрк дәсте Ԝийи рʼастеда у нава һʼәфт шәмданед зерʼинда дьгәрʼә, аһа дьбежә:

² Әз һаш жь кьред тә, хәбата тә у сәбьра тә һәмә. Әз заньм кӧ тӧ нькари ль хьраба тʼәʼмул ки. Тә әԝ жи щерʼьбандьн, йед кӧ хԝә шанди һʼәсаб дькьн, ле рʼаст нә ӧса нә, тә дит кӧ әԝ дәрәԝин ьн.

³ Сәбьра тә һәйә, бона наве Мьн тә щәфа кʼьшанд у нәԝәстийайи.

⁴ Ле газьнәкә Мьн ль тә һәйә, кӧ тӧ мина бәре Мьн һʼьз наки.

⁵ Аԝа ньһа бинә бира хԝә, кӧ тӧ жь кʼӧ дәре кʼәтийи у жь гӧнәкьрьне вәгәрʼә, кьред хԝәйә пешийе бькә. Һәгәр на, Әзе бемә щәм тә у шәмдана тә жь щийе ԝе һьлдьм.

⁶ Ле тьштәки рʼьнд ль щәм тә һәйә, кӧ дьжәни ԝан кьред николойийа, чаԝа кӧ Әз жи дьжәньме.

⁷ Гӧһе кʼе һәйә бьра бьбьһе, кӧ Рʼӧһʼ чь дьбежә щьвина. Әԝе кӧ сәркʼәвә, Әзе изьне бьдьмә ԝи, ԝәки жь ԝе дара жийине бьхԝә, йа кӧ бӧһьшта Хԝәдеда йә.

Тʼәми у ширәтед бона щьвина бажаре Сьмирнайе

⁸ Мьлйакʼәте щьвина Сьмирнайерʼа бьньвисә беже: Әԝи Пешьн у Пашьн, Йе кӧ мьр у жь нава мьрийа рʼабу аһа дьбежә:

⁹ Әз һаш жь тәнгаси у бәләнгазийа тә һәмә, ле бәле тӧ дәԝләти йи! Ӧса жи һаш жь бӧхданед ԝан һәмә, йед кӧ хԝәрʼа дьбежьн: ‹Әмә щьһу нә›. Әԝ нә щьһу нә, ле әԝ жь кʼьништа мирещьн ьн.

¹⁰ Жь ԝан тәнгасийа нәтьрсә, кʼижане бенә сәре тә. Ва мирещьн ԝе жь ԝә һьнәка бавежә кәле, ԝәки һун бенә щерʼьбандьне у һуне дәһә рʼожа щәфе бькʼьшиньн. Һʼәта мьрьне амьн бьминә, Әзе тʼаще жийине бьдьмә тә.

¹¹ Гӧһе кʼе һәйә бьра бьбьһе, кӧ Рʼӧһʼ чь дьбежә щьвина. Әԝе кӧ сәркʼәвә жь мьрьна дӧда ԝе ԛәт зьраре нәбинә.

Тʼәми у ширәтед бона щьвина бажаре Пәргамайе

¹² Мьлйакʼәте щьвина Пәргамайерʼа бьньвисә беже: Әԝе кӧ шуре Ԝийи дӧдәвийи туж һәйә аһа дьбежә:

¹³ Әз һаш жь тә һәмә кӧ тӧ ль кʼӧ дәре дьмини, аԝа готи ль ԝи щийе кӧ тʼәхте мирещьн ле йә. Тӧ наве Мьн ԛәԝин дьгьри у тә баԝәрийа хԝәйә һьндава Мьнда ԝан рʼожа жи инкʼар нәкьр, гава шәʼде Мьни амьн Антипас нава ԝәда һатә кӧштьне, ԝи щийе кӧ мирещьн ле дьминә.

¹⁴ Ле газьнәкә Мьн ль тә һәйә, кӧ ль ԝе дәре һьнәк мәрьвед тә һәнә, кӧ пәй һинкьрьна ԝи Бьлами дьчьн, йе кӧ Балаԛ һин кьр, кӧ зарʼед Исраел жь рʼе дәрхә, ԝәки әԝ ԛӧрбанед пʼута бьхԝьн у бенамусийе бькьн.

¹⁵ Ӧса жи һьнәк мәрьвед тә жи һәнә кӧ пәй һинкьрьна николойийа дьчьн.

¹⁶ Аԝа жь гӧнәкьрьне вәгәрʼә, һәгәр на, Әзе зутьре бемә щәм тә у пе шуре дәве Хԝә тʼәви ԝан мәрьва шәрʼ кьм.

¹⁷ Гӧһе кʼе һәйә бьра бьбьһе, кӧ Рʼӧһʼ чь дьбежә щьвина. Әԝе кӧ сәркʼәвә Әзе жь ԝи манайе вәшарти бьдьмә ԝи у ӧса жи кәвьрәки сьпи бьдьме, кӧ ԝе навәки ну ль сәр кевьр ньвисар бә у тʼӧ кәсе ԝи нави ньзаньбә, пештьри йе кӧ ԝи кәвьри бьстинә.

Тʼәми у ширәтед бона щьвина бажаре Тийатирайе

¹⁸ Мьлйакʼәте щьвина Тийатирайерʼа бьньвисә беже: Кӧрʼе Хԝәде аһа дьбежә, Йе кӧ чʼәʼвед Ԝи мина алава егьр ьн у ньгед Ԝи мина ԝи сьфьре хаси кӧ дьбьрьԛә:

¹⁹ Әз һаш жь кьред тә, һʼьзкьрьна тә, баԝәрийа тә, хьзмәткʼари у сәбьра тә һәмә. Әз заньм кӧ кьред тәйә пашԝәхтийе жь йед пешийе зедәтьр ьн.

²⁰ Ле газьнәкә Мьн ль тә һәйә, кӧ тӧ ԝе жьне, Изабеле сәбьр дьки, кӧ хԝә пʼехәмбәр һʼәсаб дькә. Әԝа пе һинкьрьна хԝә хӧламед Мьн жь рʼе дәрдьхә, ԝәки бенамусийе бькьн у ԛӧрбанед пʼута бьхԝьн.

²¹ Мьн ԝәхт да ԝе, ԝәки әԝ жь гӧнәкьрьне вәгәрʼә, ле әԝ нахԝазә дәсте хԝә жь бенамусийа хԝә бькә.

²² Ва Әзе ԝе бавежьмә нава щи-ньвине у йед кӧ тʼәви ԝе бенамусийе жи дькьн, бькьмә һʼаләки гьран, һәгәр жь кьред хԝә вәнәгәрʼьн.

²³ Әзе зарʼед ԝе хьм, бькӧжьм у һʼәму щьвине бьзаньбьн кӧ Әз ьм, Йе дьл у нета әʼнәнә дькә. Әзе ль анәгори кьрьнед ԝә һәр йәки бьдьмә ԝә.

²⁴ Ле бәле Әз ԝә, йед майинрʼа дьбежьм кӧ Тийатирайеда нә, ле пәй ве һинкьрьне нәкʼәтьнә, әԝ ‹Сӧрʼед мирещьнә кʼур› ньзаньн чаԝа кӧ әԝ дьбежьн. Әз барәки дьн надьмә сәр мьле ԝә,

²⁵ ле тʼәне чи ԝә һәйә ԛәԝин бьгьрьн, һʼәта кӧ Әз бем.

^26-27 Әԝе кӧ сәркʼәвә у һʼәта хьлазийе кьред ль гора дьле Мьн бькә, Әзе ԝи һʼӧкӧме сәр мьләта бьдьмә ԝи, кʼижан Мьн жь Баве Хԝә һьлдайә у әԝе пе шьвдара һʼәсьни шьвантийе ль ԝан бькә, мина фьраԛед чʼьни ԝе бьпʼьшьринә.

²⁸ У Әзе стәйрка сьбейә зу бьдьмә ԝи.

²⁹ Гӧһе кʼе һәйә бьра бьбьһе, кӧ Рʼӧһʼ чь дьбежә щьвина.