Peyxam 16 - Пәймана Ну (Инщил)

Һʼәфт тʼасед хәзәба Хԝәде

¹ Һьнге мьн дәнгәки бьльнд жь пʼарьстгәһе бьһист кӧ готә һәр һʼәфт мьлйакʼәта: «Һәрʼьн, һәр һʼәфт тʼасед хәзәба Хԝәде бьрʼежьнә сәр әʼрде».

² Мьлйакʼәте пешьн чу тʼаса хԝә рʼетә сәр әʼрде, пʼьзькед пʼисә хьраб ль сәр ԝан мәрьва дәркʼәтьн, йед кӧ нишана щәʼнәԝьр ль сәр ԝан бу у сәре хԝә ль бәр һʼәйкәле ԝи данибун.

³ Йе дӧда тʼаса хԝә рʼетә сәр бәʼре, бәʼр бу мина хуна мьрийа у һʼәму һʼәйԝанед бәʼреда ԛьрʼ бун.

⁴ Йе сьсийа тʼаса хԝә рʼетә сәр чʼәма у авед канийа, әԝ бунә хун.

⁵ Ԝи чахи мьн дәнге мьлйакʼәте ава бьһист кӧ гот: «Тӧ сәр рʼастийе йи, Йе һәйи, Йе һәбуйи у Йе пироз и, кӧ Тә диԝанед бь ви аԝайи кьрьн.

⁶ Чьмки ԝан хуна щьмәʼта Хԝәде у пʼехәмбәра рʼет у Тә хун ль ԝан да вәхԝарьне. Рʼаст әԝ хӧре ве йәке нә».

⁷ Һьнге мьн дәнге горигәһе бьһист, кӧ аһа гот: «Бәле, йа Хӧдан Хԝәдейе Һʼәму Зорайийе, диԝанед Тә рʼаст у һәԛ ьн».

⁸ Мьлйакʼәте чара тʼаса хԝә рʼетә сәр рʼойе у ԝерʼа һатә дайине, кӧ мәрьвайе бь егьр бьԛәлинә.

⁹ Һьнге мәрьв жь дәст шәԝата гәрмайийе һатьнә ԛәландьне у кʼьфьри наве Хԝәде кьрьн, кӧ һʼӧкӧме Ԝи ль сәр ван бәла һәйә. Ле әԝ жь кьред хԝәйә хьраб вәнәгәрʼийан, ԝәки шькьри бьдана Ԝи.

¹⁰ Мьлйакʼәте пенща тʼаса хԝә рʼетә сәр тʼәхте щәʼнәԝьр у тәʼристани һатә сәр пʼадшатийа ԝи, жь еше мәрьва зьмане хԝә дьгәстьн

¹¹ у жь дәст еша у пʼьзька кʼьфьри ль Хԝәдейе әʼзмен кьрьн, ле жь кьред хԝәйә хьраб вәнәгәрʼийан.

¹² Мьлйакʼәте шәша тʼаса хԝә рʼетә сәр чʼәме Фьратейи мәзьн, ава чʼем чʼькийа, ԝәки рʼе бона пʼадшед рʼоһьлате бе һазьркьрьне.

¹³ Һьнге мьн дина хԝә дайе, ва се рʼӧһʼед һʼәрамә мина бәԛа, жь дәве ԝи зийайи, жь дәве щәʼнәԝьр у жь дәве пʼехәмбәре дәрәԝ дәрдькʼәтьн.

¹⁴ Әвана әԝ рʼӧһʼед щьна бун, йед кӧ нишанед әʼщеб дькьн. Әԝ дьчьнә щәм һʼәму пʼадшед дьнйайе, ԝәки ԝан бьщьвиньн, бона шәрʼе ԝе Рʼожа Мәзьнә Хԝәдейе Һʼәму Зорайийе.

¹⁵ «Ва йә Әзе мина дьза бем! Хԝәзи ль ԝи, йе кӧ һʼьшйар дьминә у кʼьнщед хԝә хԝәй дькә, ԝәки тәʼзи нәгәрʼә у әʼйба ԝи хӧйа нәбә!»

¹⁶ Һьнге ԝан рʼӧһʼа әԝ пʼадша щьвандьнә ԝи щийи кӧ бь ибрани жерʼа «Һармәгәдон» те готьне.

¹⁷ Мьлйакʼәте һʼәфта тʼаса хԝә рʼетә сәр һәԝе у жь тʼәхте пʼарьстгәһе дәнгәки бьльнд дәркʼәт у гот: «Һатә сери!»

¹⁸ Һьнге бьруске ле да, бу гӧрʼинийа дәнге әʼԝра у әʼрд ӧса ԛайим һʼәжийа, кӧ жь ԝе рʼожа инсан дьне кʼәтийә һʼәта ньһа әʼрд аһа нәһʼәжийайә. Әʼрдһʼәж һаԛас ԛайим бу!

¹⁹ Бажаре мәзьн бу се пʼара у бажаред мьләта ԝеран бун. Бабилона мәзьн һатә бира Хԝәде, ԝәки ԝе кʼаса хԝәйә шәрава хәзәба гьранва бьдә ԝе.

²⁰ Һʼәму гьрав бәтавәбун у чʼийа иди нәһатьнә хӧйане.

²¹ Жь әʼзмен тәйрока гьрә ԝәкә пенщи килограме сәр мәрьвада бари. Мәрьва жь дәст ледана тәйроке кʼьфьри ль Хԝәде кьрьн, чьмки әва бәла гәләки гьран бу.