Peyxam 15 - Пәймана Ну (Инщил)

Һʼәфт мьлйакʼәт у һʼәфт бәла

¹ Һьнге мьн ль әʼзмен нишанәкә дьнә мәзьн у әщеб дит, һʼәфт мьлйакʼәтед хԝәйе һʼәфт бәлайед ахьрийе пе кʼижана ԝе хәзәба Хԝәде бьһата сери.

² Ԝи чахи мьн тьштәки мина бәʼрәкә шушә егьрва тʼәвайи дит, ӧса жи әԝед кӧ щәʼнәԝьр, һʼәйкәле ԝи у һʼәсабе наве ԝи бьндәст кьрьбун. Әвана сәр бәʼра шушә сәкьни бун, чәнгед кӧ Хԝәде дабунә ԝан дәстед ԝанда бун

³ у стьрана Мусайе хӧламе Хԝәде у стьрана Бәрх дьстьран: «Кьред Тә мәзьн у әʼщеб ьн Хӧдан Хԝәдейе Һʼәму Зорайийе! Рʼийед Тә рʼаст у сәр һәԛийе нә, йа Пʼадшайе мьләта.

⁴ Хӧдан, кʼи жь Тә ԝе нәтьрсә у рʼумәте нәдә ԝи наве Тә? Чьмки Тӧ тʼәне Йе пироз и. Һʼәму мьләте бәрбь Тә бен у сәре хԝә бәр Тә дайньн, чьмки кьред Тәйә рʼаст хӧйа бун».

⁵ Пәй ван тьштарʼа мьн дина хԝә дайе, ва пʼарьстгәһа әʼзмен вәбу, аԝа готи Коне Шәʼдәтийе.

⁶ Әԝ һәр һʼәфт мьлйакʼәтед хԝәйе һәр һʼәфт бәла жь пʼарьстгәһе дәркʼәтьн. Кʼьтанед паԛьжә бьрԛок ль ԝан бун у мәлахтед зерʼин ль сингед ԝан бун.

⁷ Һьнге жь һәр чар рʼӧһʼбәра йәки һʼәфт тʼасед зерʼинә хәзәба ԝи Хԝәдейива тʼьжи, Йе кӧ һʼәта-һʼәтайе Сах ә, данә ԝан һәр һʼәфт мьлйакʼәта.

⁸ Пʼарьстгәһ дуйе рʼумәта Хԝәде у ԛәԝата Ԝива тʼьжи бу у тʼӧ кәс нькарьбу бькʼәта пʼарьстгәһе, һʼәта кӧ һәр һʼәфт мьлйакʼәта, һәр һʼәфт бәла нәанина сери.