Peyxam 13 - Пәймана Ну (Инщил)

Дӧ щәʼнәԝьр дәрдькʼәвьн

¹ Һьнге мьн дина хԝә дайе, ва щәʼнәԝьрәк жь бәʼре дәрдькʼәт. Һʼәфт сәред ԝи у дәһә стьруйед ԝи һәбун, ль сәр стьруйед ԝи дәһә тʼащ бун у ль сәр һәр һʼәфт сәред ԝи жи навед кʼьфьри-зьфьрийа бун.

² Әԝ щәʼнәԝьре кӧ мьн дит, мина пьльнг бу, ньгед ԝи мина ләпе һʼьрʼчʼа бун у дәве ԝи жи мина дәве шера бу. Ви зийайи ԛәԝата хԝә, тʼәхте хԝә у һʼӧкӧме хԝәйи мәзьн да ԝи щәʼнәԝьри.

³ Сәрики ви щәʼнәԝьри те бежи бьриндар ль бәр мьрьне бу, ле бьрина ԝи һатә ԛәнщкьрьне. У тʼәмамийа дьнйайе сәр ԝи щәʼнәԝьри әʼщебмайи ма.

⁴ Ԝан сәре хԝә ль бәр зийе данин, кӧ ԝи һʼӧкӧме хԝә да ԝи щәʼнәԝьри. Ӧса жи сәре хԝә ль бәр щәʼнәԝьр данин у готьн: «Гәло кʼи мина ви щәʼнәԝьри йә? У кʼи дькарә тʼәви ви шәрʼ кә?»

⁵ Әви щәʼнәԝьрирʼа изьн һатә дайине кӧ дәве хԝә бемәʼрифәт вәкә у кʼьфьрийа бькә, ӧса жи ԝирʼа һатә дайине, кӧ чьл дӧ мәһа бь һʼӧкӧме хԝә бькә.

⁶ Әԝи һьндава Хԝәдеда дәве хԝә хьраб вәкьр у наве Ԝи, коне Ԝи у йед кӧ әʼзменда дьминьн беһӧрмәт кьр.

⁷ Изьн ԝирʼа һатә дайине, кӧ тʼәви щьмәʼта Хԝәде шәрʼ кә у сәркʼәвә. Ӧса жи һʼӧкӧме ль сәр һәр бәрәке, щьмәʼте, зьмани у мьләти ԝирʼа һатә дайине.

⁸ Һʼәму бьнәлийед ль рʼубари дьне ԝе сәре хԝә ль бәр ԝи дайньн, навед кʼижана жь ԝәхте әʼфьрандьна дьнйайеда кʼьтеба жийинейә Бәрхе сәржекьрида нәһатьнә ньвисаре.

⁹ Гӧһе кʼе һәйә бьра бьбьһе:

¹⁰ Әԝед кӧ йе дил кʼәтьне нә, ԝе дил бькʼәвьн, әԝед кӧ йед бәр шур кʼәтьне нә, әԝе бәр шур кʼәвьн. Ль вьр ԝе сәбьр у баԝәрийа щьмәʼта Хԝәде кер бе.

¹¹ Һьнге мьн дина хԝә дайе, ва щәʼнәԝьрәки дьн жь әʼрде дәрдькʼәт, дӧ стьруйе ԝийә мина йе бәрха һәбун у мина зийе хәбәр дьда.

¹² Әви тʼәмамийа һʼӧкӧме щәʼнәԝьре пешьн ль бәр ԝи хԝәха дьда хәбате у пʼейи сәр әʼрде у бьнәлийед ԝе дькьр, ԝәки сәре хԝә ль бәр ԝи щәʼнәԝьре пешьн дайньн, йе кӧ бьрина ԝийә кӧ бәрбь мьрьне дьбьр һатьбу ԛәнщкьрьне.

¹³ Ви щәʼнәԝьри нишанед ӧса әʼщебә мәзьн дькьрьн, һʼәта кӧ агьр жи жь әʼзмен ль бәр чʼәʼве мәрьва давитә сәр әʼрде.

¹⁴ Әԝи пе ԝан нишанед кӧ ԝирʼа һатьбунә дайине, ԝәки ль бәр щәʼнәԝьре пешьн бькә, бьнәлийед ль рʼубари дьне дьхальфандьн. Әԝи ԝанрʼа гот, кӧ һʼәйкәләки ԝи щәʼнәԝьри чекьн, йе кӧ бь шур һатьбу бьриндаркьрьне у диса сах бу.

¹⁵ Һʼӧкӧм ԝирʼа һатә дайине, ԝәки рʼӧһʼ бәр һʼәйкәле щәʼнәԝьрда бинә, кӧ һʼәйкәле щәʼнәԝьр хәбәр дә у бькарьбә әԝед кӧ щәʼнәԝьр нәһʼәбиньн бьдә кӧштьне.

¹⁶ Әԝи пʼейи сәр һʼәмуйа кьр, аԝа готи бьчʼук у мәзьна, дәԝләти у бәләнгаза, аза у хӧлама кӧ нишане бьдьнә сәр дәсте хԝәйи рʼасте йан әʼнийа хԝә,

¹⁷ ԝәки тʼӧ кәс нькарьбә нә бькʼьрʼә, нә жи бьфьрошә, пештьри ԝи, йе кӧ нишана щәʼнәԝьр, аԝа готи наве ԝи йан һʼәсабе наве ԝи сәр ә.

¹⁸ Ль вьр сәрԝахти кер те: Һʼьш-аԛьле кʼе һәйә, бьра һʼәсабе щәʼнәԝьр бьжмьрә, чьмки һʼәсабе мәрьвәки йә у һʼәсабе ԝи шәшсьд шест шәш ә.