Peyxam 10 - Пәймана Ну (Инщил)

Мьлйакʼәт у кʼьтеба бьчʼукә гӧломатккьри

¹ Һьнге мьн мьлйакʼәтәки дьнейи зор дит кӧ жь әʼзмен дьһатә хԝаре. Әʼԝр ле ԝәргьрти бу у кʼәскәсор ль сери бу, рʼуйе ԝи мина рʼойе бу, ньгед ԝи жи мина стунед егьр бун.

² Дәсте ԝида кʼьтебәкә бьчʼукә вәкьри һәбу, ньге хԝәйи рʼасте дани сәр бәʼре, ньге хԝәйи чʼәпе жи дани сәр бәже

³ у бь дәнге бьльнд мина мьрʼинийа шер кьрә ԛарʼин. Чахе кӧ ԝи кьрә ԛарʼин, һәр һʼәфт гӧрʼинийед әʼԝра пе дәнгед хԝә хәбәр дан.

⁴ Гава ԝан һәр һʼәфт гӧрʼинийед әʼԝра хәбәр дан, мьн кьр кӧ бьньвисьм, ле жь әʼзмен дәнгәк һат у гот: «Әԝ тьштед кӧ һәр һʼәфт гӧрʼинийед әʼԝра готьн, ԝан әʼйан нәкә, нәньвисә».

⁵ Һьнге әԝ мьлйакʼәте кӧ мьн дитьбу, ԝәки ԝи ньгәк данибу сәр бәʼре у йәк жи сәр бәже, дәсте хԝәйи рʼасте бәрбь әʼзмен бьльнд кьр

⁶ у пе Әԝи сонд хԝар кӧ һʼәта-һʼәтайе Сах ә, аԝа готи пе Ԝи Йе кӧ әʼзман, һʼәмуйед ԝеда, әʼрд, һʼәмуйед ԝеда у бәʼр, һʼәмуйед ԝеда әʼфьрандьнә у гот: «Иди ԝәхте дәрәнги нәкʼәвә.

⁷ Ле гава мьлйакʼәте һʼәфта дәнг ль борʼийе хә, һьнге ԝе әԝ сӧрʼа тʼьвдира Хԝәде бе сери, йа кӧ Ԝи әʼлами хӧламед Хԝә пʼехәмбәра кьрьбу».

⁸ Пәй ве йәкерʼа ԝи дәнге кӧ мьн жь әʼзмен бьһистьбу, диса тʼәви мьн хәбәр да у гот: «Һәрʼә, ԝе кʼьтеба вәкьри жь дәсте ԝи мьлйакʼәти һьлдә, йе кӧ ль сәр бәʼре у бәже сәкьни йә».

⁹ Әз жи чумә щәм ԝи мьлйакʼәти у мьн жерʼа гот: «Кʼа ԝе кʼьтеба бьчʼук бьдә мьн». Әԝи мьнрʼа гот: «Һан ве һьлдә у бьхԝә. Әве нав-дьле тәда тәʼл бә, ле дәве тәда ԝе мина һьнгьв ширьн бә».

¹⁰ Һьнге мьн кʼьтеба бьчʼук жь дәсте мьлйакʼәт һьлда у хԝар. Дәве мьнда мина һьнгьв ширьн бу, ле чахе мьн әԝ хԝар, мьн нав-дьле хԝәда тәʼлайи кʼьфш кьр.

¹¹ Ԝи чахи мьнрʼа һатә готьне: «Гәрәке тӧ диса ль сәр гәләк щьмәʼта, мьләта, зьмана у пʼадша пʼехәмбәртийе бьки».