Peyxam 1 - Пәймана Ну (Инщил)

Пешготьна Йуһʼәнна

¹ Әва әʼйантийа Иса Мәсиһ ә, кʼижан Хԝәде да Ԝи, ԝәки әԝ ԝан тьштед кӧ гәрәке зутьрәке бьԛәԝьмьн, нишани хӧламед Ԝи кә. Иса пе дәсте мьлйакʼәте Хԝә шанд у әʼлами хӧламе Хԝә Йуһʼәнна кьр.

² Йуһʼәнна жи шәʼдәтийа һәр тьштед кӧ ԝи дитьбун да, аԝа готи шәʼдәтийа готьна Хԝәде, ӧса жи шәʼдәтийа әʼламәтийа Иса Мәсиһә рʼаст.

³ Хԝәзи ль ԝи, кӧ ве йәке бьхунә у хԝәзи ль ԝан, йед кӧ ван хәбәред пʼехәмбәртийе бьбьһен у тьштед кӧ веда һатьнә ньвисаре дьле хԝәда хԝәй кьн, чьмки ԝәхт незик ә.

Нәʼмә һәр һʼәфт щьвинарʼа, йед кӧ ль ԛәза Асйайе нә

⁴ Жь Йуһʼәнна, һәр һʼәфт щьвинарʼа, йед кӧ ԛәза Асйайеда нә: Кʼәрәм у әʼдьлайийа Ԝи ль ԝә бә, Йе кӧ һәйә, Йе кӧ һәбу, Йе кӧ ԝе бе у жь һәр һʼәфт рʼӧһʼед кӧ ль бәр тʼәхте Ԝи нә,

^5-6 ӧса жи жь Иса Мәсиһе шәʼде амьн, Ньхӧрийе жь нава мьрийа у сәрԝере пʼадшед әʼрде. Дә бьра рʼумәт у ԛӧдрәт Ԝирʼа бә һʼәта-һʼәтайе, Йе кӧ мә һʼьз дькә у әм пе хуна Хԝә жь гӧнед мә аза кьрьн у әм кьрьн кʼаһинед пʼадшатийе, ԝәки Баве Ԝи Хԝәдерʼа әм хьзмәткʼарийе бькьн. Амин!

⁷ Ва йә әʼԝрава Әԝ те. Һәр чʼәʼве Ԝи бьбинә, һʼәта әԝед кӧ нәкʼса Ԝи ԛӧл кьрьн жи. Һʼәму мьләтед дьнйайе ԝе ль сәр Ԝи шин у кʼәдәр бьн. Бәле. Амин!

⁸ «Әз Алфа у Омега мә», Хӧдан Хԝәдейе Һʼәму Зорайийе дьбежә, Йе кӧ һәйә, Йе кӧ һәбу у Йе кӧ ԝе бе.

«Йәки мина инсан»

⁹ Әз, Йуһʼәннайе бьре ԝә мә, йәктийа Исада һәвал-пʼаре ԝе тәнгасийе, пʼадшатийа Ԝи у сәбьра ԝә мә. Әз бона хәбәра Хԝәде у шәʼдәтийа бона Иса ԝе гьраведа бум, кӧ жерʼа Патмос дьбежьн.

¹⁰ Рʼожа Хӧданда Рʼӧһʼе Пироз һатә сәр мьн у мьн ль пьшт хԝә дәнгәки бьльнди мина дәнге борʼийе бьһист,

¹¹ кӧ гот: «Чь тьште кӧ тӧ дьбини, кʼьтебеда бьньвисә у һәр һʼәфт щьвинарʼа бьшинә, йед кӧ бажаред Әфәсе, Сьмирнайе, Пәргамайе, Тийатирайе, Сардәйсе, Фьладәлфйайе у Лаԝдькйайеда нә».

¹² Әз сәр ԝи дәнгида вәгәрʼийам кӧ бьбиньм, кʼа кʼи йә мьнрʼа хәбәр дьдә у чахе кӧ әз вәгәрʼийам, мьн һʼәфт шәмданед зерʼин дитьн.

¹³ Нава ԝан шәмданада «йәки мина Кӧрʼе Мерьв» һәбу, кʼьнщәкә дьрежә һʼәта ньга ле бу у мәлахтәки зерʼин ль синге Ԝи бу.

¹⁴ Пʼорʼе сәре Ԝи мина һьрийа ԛәрԛаш у мина бәрфе сьпи бу, чʼәʼвед Ԝи жи мина алава егьр.

¹⁵ Ньгед Ԝи мина сьфьре хаси жь кʼура агьр дәрхьсти, кӧ дьбьрьԛә у дәнге Ԝи мина дәнге хӧлә-хӧла гәләк ава бу.

¹⁶ Дәсте Ԝийи рʼастеда һʼәфт стәйрк һәбун у жь дәве Ԝи шурәки дӧдәвийи туж дәрдькʼәт. Рʼуйе Ԝи мина рʼойе бу кӧ тʼәмамийа ԛәԝата хԝәва шәԝԛ дьдә.

¹⁷ Чахе кӧ мьн Әԝ дит, мина йәки мьри кʼәтьмә бәр ньгед Ԝи. Әԝи дәсте Хԝәйи рʼасте дани сәр мьн у готә мьн: «Нәтьрсә, Әз ьм Йе Пешьн у Пашьн.

¹⁸ Әз Йе сах ьм. Әз Йе мьри бум, ле ва йә әз сах ьм һʼәта-һʼәтайе. У Әз ьм хԝәйе кʼьлитед Мьрьне у Дийаре Мьрийа.

¹⁹ Аԝа бьньвисә чь кӧ тӧ дьбини, чь кӧ ньһа һәнә у чь ԝе паше бьбьн.

²⁰ Сӧрʼа ван стәйрка, йед кӧ тә дәсте Мьни рʼастеда дитьн, ӧса жи һәр һʼәфт шәмданед зерʼин әв ә: Әԝ һәр һʼәфт стәйрк, мьлйакʼәтед һәр һʼәфт щьвина нә у әԝ һәр һʼәфт шәмдан, һәр һʼәфт щьвин ьн.