Petrûs II 3 - Пәймана Ну (Инщил)

Созе һатьна Хӧдан

¹ Дәлално, әва иди нәʼма дӧда йә әз ԝәрʼа дьньвисьм. Әз бь ван нәʼма дькьм кӧ фькьра ԝәйә сафи һʼьшйар кьм, биньмә бира ԝә.

² Дьхԝазьм ԝәки һун готьнед пʼехәмбәред пироз, кӧ пешда готьбун у ԝе тʼәмийа Хӧдан у Хьлазкьр, кӧ бь шандийа һатьнә готьне бир биньн.

³ Бәри һәр тьшти ве йәке заньбьн кӧ рʼожед ахьрийеда мәрьве дәрен, ԛәрфе хԝә хԝәденаса бькьн, әԝе бь хԝәстьна дьле хԝә бьмәшьн

⁴ у ԝе бежьн: «Кʼа әԝ созе һатьна Ԝи? Бавед мә әʼмьре Хԝәде щи анин чун, ле һәр тьшт һе жь ԝәхте әʼфьрандьна дьнйайеда ӧса манә».

⁵ Йед аһа кӧ дьфькьрьн, ве йәке давежьнә пьшт гӧһе хԝә, кӧ һе пешда бь хәбәра Хԝәде әʼзман һәбун у әʼрд жь нава аве у бь аве пʼәйда бу.

⁶ У бь аве жи дьнйа бәре нӧԛ бу, ӧнда бу.

⁷ Ле әʼрд у әʼзманед ньһа жи хут бь ԝе хәбәре тенә хԝәйкьрьне, кӧ бь агьр ӧнда бьн. Әԝ бона Рʼожа Ахрәте тенә һьштьне, кʼижанеда мәрьвед нәпʼак ԝе ӧнда бьн һәрʼьн.

⁸ Ле бьра әв йәк ԝәва тәʼри нәминә, дәлално: Щәм Хӧдан рʼожәк мина һʼәзар сали йә у һʼәзар сал жи мина рʼожәке йә.

⁹ Хӧдан созе Хԝә дәрәнги найехә, чаԝа һьнәк дьфькьрьн. Әԝ бь думька дьреж ль ԝә сәбьр дькә, нахԝазә тʼӧ кәс ӧнда бә, ле дьхԝазә ԝәки һʼәму жь гӧнәкьрьне вәгәрʼьн.

¹⁰ Ле Рʼожа һатьна Хӧдан ԝе мина дьзәки бе. Һьнге әʼзмане бь ԛужинийа мәзьн бәтавәбьн у тьштед бьн пʼәрʼе ԝанда жи ԝе бьшәԝьтьн ԝеран бьн, дьнйа у һәр тьштед ԝеда жи ԝе ӧнда бьн һәрʼьн.

¹¹ Һәгәр әв һәр тьшт ԝе бь ви аԝайи ԝеран бьн һәрʼьн, һун гәрәке мәрьвнә чаԝа бьн? Гәрәке һун жийина һʼәлал у хԝәденасийеда бьмәшьн,

¹² һивийа Рʼожа Хԝәде бьн у һатьна Ԝи ләз хьн. Ԝе рʼоже әʼзмане бьшәԝьтьн, ԝеран бьн, агьре жи тьштед бьн пʼәрʼе ԝеда бьһʼәлинә.

¹³ Ле әм һивийа әʼрдәки ну у әʼзманед ну нә, ль гора созе Ԝи, кʼижанада һәԛийе бьминә.

¹⁴ Аԝа дәлално, һун кӧ һивийа ван йәка нә, бькьн кӧ Әԝ ԝә беләкʼә у беԛӧсур әʼдьлайийеда тʼәви Хԝә бьбинә.

¹⁵ Сәбьра Хӧдане мә хьлазбун һʼәсаб кьн, чаԝа Паԝлосе бьре мәйи дәлал жи бь ԝе сәрԝахтийа кӧ жь Хԝәдеда жерʼа һатийә дайине, ԝәрʼа ньвиси.

¹⁶ Һʼәму нәʼмед хԝәда жи әԝ бона ван тьшта хәбәр дьдә. Ԝанда чәнд тьшт һәнә кӧ зәʼмәт тенә фәʼмкьрьне, кӧ йед нәзанә бебьнгәһ шаш шьровәдькьн, ӧса жи ньвисаред пирозә майин у хԝәха дьбьнә байисе сәре хԝә.

¹⁷ Аԝа дәлално, һе бәреда һун кӧ ве йәке заньн, һаш жь хԝә һәбьн, кӧ нәбә һун бь хальфандьна мәрьвед беолитийе жь рʼе дәркʼәвьн у жь щийе хԝәйи шьдийайи бькʼәвьн.

¹⁸ Ле кʼәрәм у занәбуна Хӧдан у Хьлазкьре мә Иса Мәсиһда бьгьһижьн. Шькьр жь Ԝирʼа, ньһа у һʼәта һʼәтайе! Амин.