Petrûs II 1 - Пәймана Ну (Инщил)

Сьлавкьрьн

¹ Жь Шьмһʼун Пәтрусе хӧлам у шандийе Иса Мәсиһ, ԝанрʼа, йед кӧ бь һәԛийа Хԝәде Хьлазкьре мә Иса Мәсиһ әԝ баԝәрийа хԝәйиԛимәт стандьн, чаԝа мә станд:

² Дә бьра кʼәрәм у әʼдьлайи бь ԝе занәбуна Хԝәде у Хӧдане мә Иса ль сәр ԝә зедә бә.

Гази у бьжартьна Хԝәде

³ Ԛәԝата хԝәдетийа Ԝи һәр тьште кӧ ль жийина хԝәденасийе дькʼәвә пʼешкʼеши мә кьр, бь ԝе занәбуна мәйә һьндава Ԝида, Йе кӧ бь сайа рʼумәт у ԛәнщийа Хԝә гази мә кьр.

⁴ Бь ви аԝайи Әԝи созед һәрә мәзьнә ԛимәт данә мә, ԝәки әм бь ԝан тʼәви бьнйатʼа хԝәдетийе бьн у жь ԝе бош-бәталийа кӧ жь дьлһавьжийед дьне пешда те бьрʼәвьн.

⁵ Һәма бона ве йәке һәр алийава хирәт кьн, сәр баԝәрийа хԝәда ԛәнщийе зедә кьн, сәр ԛәнщийеда занәбуне,

⁶ сәр занәбуне хԝәгьртьне, сәр хԝәгьртьне сәбьре, сәр сәбьре хԝәденасийе,

⁷ сәр хԝәденасийе һʼӧба хушк-бьра у сәр һʼӧба хушк-бьра һʼьзкьрьне.

⁸ Чьмки һәгәр әв шӧрәтана нава ԝәда һәнә у зедә дьбьн, һун бекер у бебәр наминьн нава ԝе занәбуна ԝәйә һьндава Хӧдане мә Иса Мәсиһда.

⁹ Ле ль щәм кʼе әв шӧрәтана тʼӧнәнә, әԝ чʼәʼвада һаԛас мәʼрьм ә, ԝәки ԛәт набинә у бир кьрийә кӧ жь гӧнед хԝәйә бәре паԛьж буйә.

¹⁰ Бона ве йәке хушк-бьрано, һе бькьн кӧ ԝе гази у жьбарәбуна хԝә тʼәстиԛ кьн. Һун кӧ ве йәке бькьн, тʼӧ щар накʼәвьн.

¹¹ Бь ви аԝайи дәргәһе ль бәр ԝә бь мәрʼдани вәбә, кӧ бькʼәвьнә Пʼадшатийа һʼәта-һʼәтайейә Хӧдан у Хьлазкьре мә Иса Мәсиһ.

¹² Бона ве йәке әз һәр гав дьхԝазьм кӧ ван тьшта бькьмә бира ԝә, чаԝа һун заньн у сәр ԝе рʼастийа кӧ гьһиштийә ԝә жи һʼимгьрти нә.

¹³ Әз ве йәке жи рʼаст дьбиньм, ԝәки һʼәта ви ԛальбида мә биньмә бира ԝә.

¹⁴ Чьмки заньм кӧ әзе зутьрәке ви ԛальби жь хԝә бехьм, чаԝа кӧ Хӧдане мә Иса Мәсиһ әʼлами мьн кьрийә.

¹⁵ Аԝа әзе бькьм, кӧ пәй чуйина мьнрʼа жи, һун һәр гав бькарьбьн ван тьшта биньнә бира хԝә.

Йед кӧ бь чʼәʼва рʼумәта Иса Мәсиһ дитьн

¹⁶ Әм нә кӧ пәй чʼьловискийед һостатийә бәрхԝәдәрхьсти кʼәтьбун гава мә дәрһәԛа ԛәԝат у һатьна Хӧдане мә Иса Мәсиһда ԝәрʼа гот, ле мә бь чʼәʼвед хԝә мәзьнайийа диндара Ԝи дит.

¹⁷ Әԝи жь Бав Хԝәде рʼумәт у һӧрмәт станд, гава жь ԝе Рʼумәта Ԛәшәнг дәнг һат у гот: «Әԝ ә Кӧрʼе Мьни дәлал, жь кʼижани Әз рʼази мә».

¹⁸ Мә хԝәха әв дәнг бьһист, гава жь әʼзмен һат, һьнге әм тʼәви Ԝи сәре чʼийайе бӧһӧрти бун.

¹⁹ Аԝа готьнед пʼехәмбәртийе жи бона мә һе мак дьбьн. Ԛәнщ ә ԝәки һун дина хԝә бьдьнә ԝан, чьмки әԝ мина чʼьраке нә, кӧ тәʼрийеда рʼонайе дьдә, һʼәта сьбәһ зәлал бә у стәйрка бәрбьрʼо дьле ԝәда дәре.

²⁰ Ле пешийе ве йәке заньбьн кӧ тʼӧ кәс хԝәсәрихԝә нькарә пʼехәмбәртийед ньвисаре шьровәкә.

²¹ Чьмки тʼӧ пʼехәмбәрти бь хԝәстьна дьле мәрьва нәһатийә дайине, ле мәрьва бь рʼебәрийа Рʼӧһʼе Пироз жь Хԝәдеда хәбәр данә.