Petrûs I 1 - Пәймана Ну (Инщил)

Сьлавкьрьн

¹ Жь Пәтрус, Шандийе Иса Мәсиһ, щьмәʼта Хԝәдейә бьжартирʼа, йа кӧ ль ԝәлатед Понтосе, Галатйайе, Кәпәдокйайе, Асйайе у Битенйайеда хәриб бәлабуйи йә.

² Һун ль гора ԝе ԛьрара Бав Хԝәдейә пешда һатьнә бьжартьне у бь Рʼӧһʼе Пироз бӧһӧрти-жьбарә дьбьн, ԝәки гӧһдарийа Иса Мәсиһ бькьн у бь хуна Ԝийә рʼети бенә паԛьжкьрьне: Дә бьра кʼәрәм у әʼдьлайи һе ль ԝә зедә бә.

Рʼазибун бона гӧмана сахийе

³ Шькьр жь Хԝәдерʼа, Баве Хӧдане мә Иса Мәсиһ, кӧ жь рʼәʼма Хԝәйә пʼьрʼ, щарәкә дьн әм дьне хьстьн, бь рʼабуна Иса Мәсиһә жь мьрийа, ԝәки бьбьнә хԝәйе гӧмана сах

⁴ у ԝан соз-ԛьраред нәбәталә нәрʼьзи у нәчʼьлмьси ԝар бьн. Әвана ль әʼзмана ԝәрʼа хԝәйкьри нә.

⁵ У ԛәԝата Хԝәде пе баԝәрийа ԝә, ԝә хԝәй дькә, бона ԝе хьлазбуна һазьркьри, йа кӧ ахьрийа зәменда ԝе хӧйа бә.

⁶ Һун бь ԝе ша дьбьн, рʼаст ә ньһа жи ӧса дьԛәԝьмә кӧ һун һьнәки мәʼдәкьри нә, жь дәст щурʼә-щурʼә щерʼьбандьна.

⁷ Әв йәк дьбә сәбәб, ԝәки хальсийа баԝәрийа ԝә һе бь ԛимәт кʼьфш бә, нә кӧ әԝ зерʼе кӧ нава егьрда те щерʼьбандьне ле диса ӧнда дьбә у бь ви аԝайи әԝ баԝәрийа ԝә ԝе һежайи пәсьн, рʼумәт у ԛәдьр бә, ԝәхте хӧйабуна Иса Мәсиһ.

⁸ Ԝә Әԝ нәдитийә, ле һун Ԝи һʼьз дькьн, ньһа жи набиньн, ле баԝәрийа хԝә Ԝи тиньн у ша нә бь ԝе әшԛа мәзьнә хԝәйирʼумәт, кӧ бь зара найе готьне.

⁹ Чьмки һун хьлазкьрьна рʼӧһʼе хԝә дьстиньн, кӧ мәрәме баԝәрийа ԝә йә.

¹⁰ Бона ве хьлазбуне пʼехәмбәр ле гәрʼийан у кʼәтьбунә бьн әʼнәна у бона ԝе кʼәрәма кӧ ԝе ԝәрʼа бьбуйа пʼехәмбәрти кьрьн.

¹¹ Рʼӧһʼе Мәсиһи нава ԝанда һе пешда ль бәр ԝан вәдькьр, кӧ Мәсиһе щәфе бькʼьшинә у пәйрʼа бькʼәвә рʼумәта Хԝә. У ԝан дькьр кӧ бьзаньбьн кʼа бона кʼәнге у зәманәки чаԝада әв йәке бьԛәԝьмьн.

¹² Ль бәр ԝан вәбу, ԝәки әԝ нә кӧ бона хԝә, ле бона ԝә хәбьтин, гава әԝ тьштед ньһа ԝәрʼа бь дәсте ԝан һатьнә готьне, йед кӧ Мьзгини ԝәрʼа даннасин кьрьн, бь Рʼӧһʼе Пирози кӧ жь әʼзмен һатә шандьне. Мьлйакʼәт жи дәмана ԝан тьштада нә, кӧ һәма бьбиньн.

Һʼьшйар у пироз бьн

¹³ Бона ԝе йәке һун фькьред хԝәда пьштгьредайи у һʼьшйар бьн, тʼам гӧмана хԝә бьдьнә сәр ԝе кʼәрәме, йа кӧ ԝе ԝәрʼа бе дайине, ԝәхте хӧйабуна Иса Мәсиһ.

¹⁴ Мина зарʼед гӧһдар бьн, нәбьнә мина ԝи ԝәхте дьлхԝәстьнед хԝәйә нәзанийа хԝәда.

¹⁵ Ле мина ԝи Пирозе кӧ гази ԝә кьр, һун жи пироз бьн нава һʼәму рʼабун-рʼуньштьна хԝәда.

¹⁶ Чаԝа ньвисар ә: «Пироз бьн, чьмки Әзи пироз ьм».

¹⁷ Һәгәр һун Ԝирʼа Баво дьбежьн, Йе кӧ бе фьрԛи диԝана һәр кәси ԝәкә әʼмәлед ԝи дькә, кӧ ӧса йә ви ԝәхте хәриб-фьрарийа хԝәйә ве дьне бь хофа Хԝәде дәрбаз кьн.

¹⁸ Чьмки һун заньн ԝәки һун жь рʼаԝ-рʼьзьмед кал-бавайә бекер, пе ԝан тьштед кӧ ӧнда дьбьн, аԝа готи зерʼа йан зива нәһатьнә кʼьрʼине,

¹⁹ ле пе хуна Мәсиһә ԛимәт-гьран, кӧ әԝ чаԝа бәрхәки беԛӧсур у беләкʼә бу.

²⁰ Әԝ һе бәри дәстпебуна дьнйайе кʼьфшкьри бу, ле ван ахьрийада бона ԝә әʼйан бу.

²¹ Бь Ԝи ԝә баԝәрийа хԝә Ԝи Хԝәдейи ани, Йе кӧ Әԝ жь нава мьрийа рʼакьр у рʼумәт да Ԝи, ләма баԝәри у гӧмана ԝә сәр Хԝәде йә.

²² Аԝа ԝә гӧһдарийа рʼастийе кьр у бь ви аԝайи хԝә паԛьж кьр, кӧ һʼьзкьрьна ԝә һьндава хушк-бьрада бе һʼьләкʼари бә, ньһа бь дьле сах һәвдӧ ԛайим һʼьз бькьн.

²³ Һун нә кӧ жь һавене пʼучʼ диса дьне кʼәтьнә, ле жь йе нәпʼучʼ, жь хәбәра Хԝәдейә хԝәйиәʼмьрә һʼәта-һʼәтайе.

²⁴ Чьмки «Һʼәму мәрьв мина гиһе нә у тʼәмамийа рʼәԝша ԝан мина гӧле гиһе. Гиһа һʼьшк дьбә у гӧлед ԝе же дьԝарьн,

²⁵ ле хәбәра Хӧдан һʼәта-һʼәтайе дьминә». Әв әԝ хәбәр ә, кӧ бь Мьзгинийе ԝәрʼа һатә дайине.