Metta 9 - Пәймана Ну (Инщил)

Иса шьлушәʼтәки ԛәнщ дькә у гӧнед ԝи дьбахшинә

¹ Иса кʼәтә ԛәйьке пашда вәгәрʼийа һатә бажаре Хԝә.

² Ԝе дәре шьлушәʼтәк ньвинеда пʼалдайи анинә щәм. Гава Иса баԝәрийа ԝан дит, готә йе шьлушәʼт: «Лаԝо, сәр хԝә бә! Гӧнед тә һатьнә бахшандьне».

³ Һьнге жь ԛанунзана һьнәк нав хԝәда фькьрин: «Әва ньге Хԝә Хԝәдерʼа давежә».

⁴ Фькьред ԝан Исава әʼйан бун у гот: «Һун чьма дьле хԝәда тьште хьраб дьфькьрьн?

⁵ Кʼижан рʼьһʼәт те готьне: ‹Гӧнед тә һатьнә бахшандьне›, йан ‹Рʼабә у бьгәрʼә›?

⁶ Ле ԝәки һун бьзаньбьн кӧ һʼӧкӧме Кӧрʼе Мерьв һәйә ль сәр дьне гӧна бьбахшинә», һьнге готә йе шьлушәʼт: «Рʼабә ньвина хԝә һьлдә, һәрʼә мала хԝә!»

⁷ Әԝ жи рʼабу чу мала хԝә.

⁸ Гава әʼлаләте әв йәк дит, хофе әԝ гьртьн у шькьри данә Хԝәде, кӧ әв һʼӧкӧм дайә мәрьва.

Иса гази Мәтта дькә

⁹ Иса жь ԝьр пешда чу, йәки кӧ наве ԝи Мәтта бу ль щийе хәрщһьлдане рʼуньшти дит у готе: «Пәй Мьн ԝәрә». Әԝ жи рʼабу пәй Иса чу.

¹⁰ Гава Иса мала Мәттада сәр сьфре рʼуньштьбу, гәләк хәрщгьр у гӧнәкʼаред дьн һатьн тʼәви Иса у шагьртед Ԝи рʼуньштьн.

¹¹ Чахе ферьсийа әв йәк дит, шагьртед Ԝирʼа готьн: «Чьма Дәрсдаре ԝә тʼәви хәрщгьр у гӧнәкʼара дьхԝә у вәдьхԝә?»

¹² Ле гава Иса әв йәк бьһист ԝанарʼа гот: «Сахләм нә һʼәԝще һʼәким ьн, ле нәхԝәш.

¹³ Һәрʼьн мәʼна ван хәбәра һин бьн: ‹Әз рʼәʼме дьхԝазьм, нә кӧ ԛӧрбане›. Әз нәһатьмә гази йед рʼаст кьм, ле гази гӧнәкʼара».

Пьрса рʼожигьртьне

¹⁴ Һьнге шагьртед Йуһʼәнна һатьнә щәм Ԝи у готьне: «Чьма әм у ферьси гәләк щара рʼожи дьгьрьн, ле шагьртед Тә рʼожи нагьрьн?»

¹⁵ Иса готә ԝан: «Ԛәт дьбә кӧ хԝәндийед дәʼԝате шине бькьн, һʼәта кӧ зәʼва тʼәви ԝан ә? Ле рʼоже бен, гава зәʼва жь ԝан бе һьлдане, һьнге ԝе рʼожи бьгьрьн.

¹⁶ Кәсәк пе пʼарчʼе ну кʼьнща кәвьн пʼинә накә, чьмки пʼарчʼе кʼьнща кәвьнва дьрути ԝе зоре ль кʼьнща кәвьн бькә у щийе ԛәльши ԝе һе ль бәр һәв һәрʼә.

¹⁷ Нә жи шәрава ну дькьнә мәшкед кәвьн. Һәгәр ӧса бә, мәшке бьтʼәԛьн, шәраве бьрʼьжә у мәшке жи хьраб бьн. Ле шәрава ну дькьнә мәшке ну у һәр дӧ жи тенә хԝәйикьрьне».

Ԛизька мьри у кʼӧлфәтәкә нәхԝәш

¹⁸ Гава Иса һе әв йәка ԝанарʼа дьгот, һәма һьнге сәрԝерәк һат хԝә авитә бәр ньге Ԝи у готе: «Ԛиза мьн һежа мьрийә. Ле ԝәрә дәсте хԝә дайнә сәр ԝе у әԝе бьжи».

¹⁹ Иса рʼабу тʼәви шагьртед Хԝә да пәй ԝи чу.

²⁰ У ва кʼӧлфәтәкә нәхԝәш, кӧ донздәһ салед ԝе бун сәр хуне вәбьбу, пьштева һат у рʼишийед кʼьнще Иса кʼәт.

²¹ Әԝе нета хԝәда данибу: «Һәгәр әз тʼәне кʼьнще Ԝи кʼәвьм, әзе ԛәнщ бьм».

²² Иса сәр мьле Хԝәва вәгәрʼийа әԝ дит у готе: «Әʼвде! Сәр хԝә бә! Баԝәрийа тә тӧ ԛәнщ кьри». У ԝе дәме әԝ кʼӧлфәт ԛәнщ бу.

²³ Гава Иса гьһиштә мала сәрԝер, дина Хԝә дайе, ԝе ԛарʼә-ԛарʼа әʼлаләте йә у бьлурван жи зәлули ле дьхьн

²⁴ у готә ԝан: «Дәркʼәвьн! Ԛизьк нәмьрийә, ле һеньжийә». Ԝана ԛәрфе хԝә Пе дькьрьн.

²⁵ Ле гава щьмәʼт дәрхьстьнә дәрва, Иса чу һьндӧрʼ дәсте ԝе гьрт у ԛизьк рʼабу сәр хԝә.

²⁶ Әва дәнг-бәʼса тʼәмамийа ԝи ԝәлатида бәла бу.

Иса дӧ кора ԛәнщ дькә

²⁷ Гава Иса жь ԝьр дәркʼәт чу, дӧ мәрьвед кор данә пәй Ԝи кьрьнә ԛирʼин у готьн: «Кӧрʼе Даԝьд! Мә ԝәрә рʼәʼме!»

²⁸ Гава кӧ гьһиштьнә мале, әԝ һәр дӧ кор һатьнә щәм Ԝи. Иса жь ԝан пьрси у гот: «Һун баԝәр дькьн, кӧ Әз дькарьм али ԝә бькьм?» Ԝана гот: «Бәле Хӧдан».

²⁹ Һьнге Иса дәсте Хԝә да чʼәʼвед ԝан у гот: «Ль гора баԝәрийа ԝә ԝәрʼа бә».

³⁰ Ԝе дәме чʼәʼвед ԝан вәбун. Иса һʼьшк тʼәми ль ԝан кьр у гот: «Һаш жь хԝә һәбьн, кӧ тʼӧ кәс ве йәке нәһʼәсә».

³¹ Ле әԝ дәркʼәтьн, тʼәмамийа ԝи ԝәлатида нав у дәнге Ԝи бәла кьрьн.

Иса лал ԛәнщ дькә

³² Чахе әԝана дәркʼәтьн чун, һьнәка щьнакʼәтики лал ани щәм Иса.

³³ Гава Әԝи щьн дәрхьст, йе лал хәбәр да. Әʼлаләт әʼщебмайи ма у гот: «Ль Исраеле жи тьштәки аһа тʼӧ щар нәԛәԝьмийә».

³⁴ Ле ферьсийа гот: «Әԝ бь һʼӧкӧме сәрԝере щьна щьна дәрдьхә».

Гӧне Иса ль щьмәʼте те

³⁵ Иса һʼәму гӧнд у бажара дьгәрʼийа, кʼьништед ԝанда һин дькьр, Мьзгинийа Пʼадшатийе даннасин дькьр у ль нав щьмәʼте һʼәму щурʼә нәхԝәши ԛәнщ дькьрьн.

³⁶ Гава Әԝи әʼлаләт дит, гӧне Ԝи ль ԝан һат, чьмки әԝана мина пәзе бе шьван, бәрʼәдайи у бәлабуйи бун.

³⁷ Һьнге Әԝи шагьртед Хԝәрʼа гот: «Нандьрун гәләк ә, ле пʼалә һьндьк ьн.

³⁸ Аԝа һиви жь Хԝәйе дьруне бькьн, ԝәки пʼала нандьруна Хԝәрʼа бьшинә».