Metta 8 - Пәймана Ну (Инщил)

Иса йәки жь кʼотибуне паԛьж дькә

¹ Паше Иса жь чʼийе һатә хԝаре, әʼлаләтәкә гьран да пәй Ԝи чу.

² Һьнге йәки кʼоти һат хԝә авитә бәр Ԝи у готе: «Хӧдан! Һәгәр бьхԝази, Тӧ дькари мьн паԛьж ки».

³ Иса дәсте Хԝә дьреж кьре ле кʼәт у готе: «Әз дьхԝазьм. Паԛьж бә!» У дәстхԝәда әԝ жь кʼотибуне паԛьж бу.

⁴ Һьнге Иса жерʼа гот: «Бьньһерʼә, тʼӧ кәсирʼа тьштәки нәбежи, ле һәрʼә хԝә нишани кʼаһин кә у һʼәдийа кӧ Муса тʼәми дайә бьдә, ԝәки һʼәмуйарʼа бьбә шәʼдәти».

Иса хӧламе сәрсәдәки ԛәнщ дькә

⁵ Гава Иса кʼәтә Кәфәрнаһуме, сәрсәдәк һатә щәм Ԝи, һиви же кьр у готе:

⁶ «Хӧдан, хӧламе мьн шьлушәʼт малда пʼалдайә, гәләки щәфе дьбинә».

⁷ Иса готә ԝи: «Әзе бем ԝи ԛәнщ кьм».

⁸ Сәрсәд ле вәгәрʼанд у готе: «Хӧдан, әз нә һежа мә кӧ Тӧ бейи мала мьн. Ле тʼәне хәбәрәке бежә у хӧламе мьне бь ԝе хәбәре ԛәнщ бә.

⁹ Әз хԝәха жи мәрьвәки бьн һʼӧкӧмда мә у бьн дәсте мьнда жи әскәр һәнә. Әз йәкирʼа дьбежьм: ‹Һәрʼә›, дьчә, йәки дьнрʼа дьбежьм: ‹Ԝәрә›, те у хӧламе хԝәрʼа дьбежьм: ‹Ви тьшти бькә›, дькә».

¹⁰ Гава Иса әв йәк бьһист, зәндәгьрти ма у готә әԝед кӧ пәй ԝи дьчун: «Әз рʼаст ԝәрʼа дьбежьм, Исраеледа жи Мьн баԝәрикә аһа йәкида нәдитийә.

¹¹ Әз ԝәрʼа дьбежьм, кӧ гәләке жь рʼоһьлате у жь рʼоавайе бен у шайийа Пʼадшатийа Әʼзманада тʼәви Бьраһим, Исһаԛ у Аԛуб рʼунен,

¹² ле зарʼед Пʼадшатийе ԝе бенә авитьне тәʼрийа дәрва. Ль ԝьр ԝе бьбә гьри у чʼьркә-чʼьрка дьрана».

¹³ Паше Иса сәрсәдрʼа гот: «Һәрʼә! Бьра ль гора баԝәрийа тә тәрʼа бә». У ԝе дәме хӧламе ԝи ԛәнщ бу.

Иса гәләк нәхԝәша ԛәнщ дькә

¹⁴ Гава Иса һатә мала Пәтрус, хԝәсийа ԝи тʼайеда пʼалдайи дит.

¹⁵ Әԝи дәсте Хԝә да дәсте ԝе у тʼайе же бәрʼда, рʼабу бәрдәсти Ԝирʼа кьр.

¹⁶ Гава рʼо чу ава, гәләк щьнакʼәти анинә щәм Ԝи. Әԝи бь хәбәре рʼӧһʼед һʼәрам дәрхьстьн у һʼәму нәхԝәш ԛәнщ кьрьн.

¹⁷ Әв аһа бу, кӧ әԝ готьна бь заре Ишайа пʼехәмбәр бе сери, кӧ ньвисар ә: «Әԝи нәхԝәшийед мә һьлдан у ешед мә бьрьн».

Щабдарийа йед кӧ пәй Иса дьчьн

¹⁸ Чахе Иса әʼлаләт дора Хԝә дит, әʼмьр ль шагьрта кьр кӧ һәрʼьнә ԝи бәри голе.

¹⁹ Һьнге ԛанунзанәк незики Ԝи бу у готе: «Дәрсдар! Тӧ кʼӧда жи һәрʼи, әзе пәй Тә бем».

²⁰ Иса готә ԝи: «Рʼувийарʼа ԛӧл һәнә, тәйрәдед әʼзменрʼа жи һелин, ле бона Кӧрʼе Мерьв щик тʼӧнә кӧ сәре Хԝә ле дайнә».

²¹ Шагьртәки Ԝи готе: «Хӧдан! Изьне бьдә мьн кӧ әз пешийе һәрʼьм баве хԝә дәфьн кьм».

²² Ле Иса жерʼа гот: «Тӧ пәй Мьн ԝәрә. Бьра мьри мьрийе хԝә дәфьн кьн».

Иса фьртоне дьсәԛьрʼинә

²³ Гава Иса кʼәтә ԛәйьке, шагьртед Ԝи тʼәви Ԝи чун.

²⁴ Ньшкева фьртонәкә мәзьн ль голе рʼабу, ӧса кӧ ԛәйьк пелада ӧнда дьбу. Ле Әԝ рʼазайи бу.

²⁵ Һьнге шагьрт незики Ԝи бун, әԝ һʼьшйар кьрьн у готьне: «Хӧдан! Мә хьлаз кә! Әм ӧнда дьбьн!»

²⁶ Иса готә ԝан: «Чьма һун ӧса тьрсонәк ьн кембаԝәрно?» Ԝе дәме рʼабу ль байе у голе һьлат у һʼәму тьшт сәԛьрʼин.

²⁷ Мәрьвед тʼәви Ԝи әʼщебмайи ман у готьн: «Әв кʼи йә, кӧ ба у гол жи ельми Ԝи дьбьн?»

Иса дӧ щьнакʼәтийа ԛәнщ дькә

²⁸ Гава Иса дәрбази ԝи алийе тʼопрахед Гәрдарине бу, дӧ щьнакʼәти жь нав горʼьстана дәркʼәтьн у рʼасти Ԝи һатьн. Әԝ ӧса һар бун, кӧ кәсәк нькарьбу ԝе рʼерʼа дәрбаз буйа.

²⁹ Ԝана кьрә ԛирʼин у готьн: «Тӧ чь жь мә дьхԝази, Кӧрʼе Хԝәде? Жь ԝәхт зутьр һати щәфе бьди мә?»

³⁰ Жь ԝана ԝедатьр сурики бәразайи мәзьн дьчʼерийа.

³¹ Щьна рʼәща жь Ԝи кьр у готьне: «Һәгәр Тӧ мә дәрдьхи, бьһелә әм һәрʼьн бькʼәвьнә нава сурийе бәраза».

³² Әԝи готә ԝан: «Һәрʼьн!» Әԝ жи дәркʼәтьн чун кʼәтьнә нава бәраза у әԝ сури пева жорда рʼәви, хԝә жь кәнделда авитьнә голе у хәньԛин.

³³ Бәразван рʼәвин чунә бажер, чь кӧ һатьбу сәре щьнакʼәтийа готьн.

³⁴ Һьнге һʼәму мәрьвед бажер дәркʼәтьнә пешийа Иса у гава Әԝ дитьн, рʼәща жь Ԝи кьрьн кӧ жь әʼрде ԝан һәрʼә.