Metta 7 - Пәймана Ну (Инщил)

Һинкьрьна дәрһәԛа ломәкьрьнеда

¹ Лома нәкьн, кӧ ломә ль ԝә нәбьн.

² Һун чь лома бькьн, әԝ ломә жи ԝе ль ԝә бьбьн у һун бь чь чапе бьпивьн, бь ԝе чапе жи ԝәрʼа ԝе бе пиване.

³ Тӧ чьма ԛьршьке чʼәʼве бьре хԝәда дьбини, ле кʼеране чʼәʼве хԝәда набини?

⁴ Йан жи чаԝа тӧ дькари бежи бьре хԝә: ‹Бьһелә кӧ әз ԛьршьк жь чʼәʼве тә дәрхьм›, ле ва йә кʼеран чʼәʼве тәда һәйә?

⁵ Дӧрʼу! Пешийе кʼеране чʼәʼве хԝә дәрхә. Паше те ԛәнщ бьбини кӧ чаԝа ԛьршьк жь чʼәʼве бьре хԝә дәрхи.

⁶ Тьште бӧһӧрти нәдьнә са у нә жи дӧрʼед хԝә бавежьнә бәр бәраза. Һәгәр на, бәразе ԝан бьн ньгед хԝәда пʼепәс кьн у сәйе жи вәгәрʼьн ԝә бьдьрʼиньн.

Бьхԝазьн, бьгәрʼьн, дәри хьн

⁷ Бьхԝазьн һуне бьстиньн, бьгәрʼьн һуне бьбиньн, дәри хьн ԝе бәр ԝә вәбә.

⁸ Чьмки кʼи кӧ дьхԝазә дьстинә, кʼи кӧ дьгәрʼә дьбинә у кʼи кӧ дәри дьхә бәр вәдьбә.

⁹ Жь ԝә кʼижан ә әԝ мәрьв, кӧ кӧрʼе ԝи нан же бьхԝазә, әԝ кәвьр бьде?

¹⁰ Йан жи мәʼси бьхԝазә, әԝ мәʼр бьде?

¹¹ Һун кӧ хьраб ьн, заньн тьштед ԛәнщ бьдьнә зарʼед хԝә, ле Баве ԝәйи Әʼзмана ԝе чьԛас тьштед ԛәнщ бьдә әԝед кӧ жь Ԝи дьхԝазьн.

Ԛануна зерʼ

¹² Һәр чь кӧ һун дьхԝазьн мәрьв бона ԝә бькьн, һун жи ӧса ԝанарʼа бькьн. Әв ә мәʼна һинкьрьна Ԛануне у пʼехәмбәра.

Дәре тәнг

¹³ Дәре тәнгрʼа бькʼәвьнә һьндӧрʼ, чьмки фьрә йә әԝ дәри у бәр ә әԝ рʼийа кӧ дьбә бәрбь ӧндабуне у гәләк ьн әԝед кӧ ԝеда дьчьн.

¹⁴ Ле гәләки тәнг ә әԝ дәри у зәʼмәт ә әԝ рʼийа кӧ дьбә бәрбь жийине у һьндьк ьн әԝед кӧ ԝе рʼейе дьбиньн.

Дар у бәре ԝе

¹⁵ Һʼәвза хԝә жь пʼехәмбәред дәрәԝ бькьн. Әԝе бь пʼосте пез бенә щәм ԝә, ле һьндӧрʼва гӧред пʼәрʼани нә.

¹⁶ Һуне ԝана жь бәред ԝан нас бькьн. Гәло кәсәк жь стьрийа тьрийа дьчьнә, йан жи жь дьрʼийа һежира?

¹⁷ Дара ԛәнщ бәре ԛәнщ дьдә, ле дара хьраб бәре хьраб дьдә.

¹⁸ Дара ԛәнщ нькарә бәре хьраб бьдә, нә жи дара хьраб дькарә бәре ԛәнщ бьдә.

¹⁹ Һәр дара кӧ бәре ԛәнщ надә те бьрʼин у авитьне нава агьр.

²⁰ Аԝа һуне ԝана жь кьред ԝан нас бькьн.

Кʼи һежайи Пʼадшатийа Әʼзмана йә

²¹ Нә кӧ әԝе Мьнрʼа дьбежә: ‹Хӧдан! Хӧдан!› ԝе бькʼәвә Пʼадшатийа Әʼзмана, ле әԝе бькʼәве, йе кӧ әʼмьре Баве Мьни Әʼзмана дьԛәдинә.

²² Ԝе Рʼоже гәләке Мьнрʼа бежьн: ‹Хӧдан! Хӧдан! Нә мә бь наве Тә пʼехәмбәрти кьрьн у бь наве Тә щьн дәрхьстьн у бь наве Тә гәләк кʼәрәмәт кьрьн?›

²³ Һьнге Әзе ашкәрә ԝанрʼа бежьм: ‹Жь Мьн дур кʼәвьн, нәһәԛно! Мьн һун тʼӧ щар нас нәкьрьнә›.

Мала йе сәрԝахт у мала йе бефәʼм

²⁴ Аԝа кʼи кӧ ван готьнед Мьн дьбьһе у ԝан дьԛәдинә, әԝ мина мәрьвәки сәрԝахт ә, кӧ мала хԝә сәр кевьр чекьр.

²⁵ Баран бари, ба у лейи рʼабун, ԝе мале хьстьн, ле әԝ мал һьлнәшийа, чьмки һʼиме ԝе сәр кевьр бу.

²⁶ Ле кʼи кӧ ван готьнед Мьн дьбьһе у наԛәдинә, әԝ мина мәрьвәки бефәʼм ә, кӧ мала хԝә сәр ԛуме чекьр.

²⁷ Баран бари, ба у лейи рʼабун, ԝе мале хьстьн у әԝ мал һьлшийа, лап ԝеран бу чу».

Һʼӧкӧме Иса

²⁸ Гава Иса әв готьнед Хԝә сәр һәвда ани, әʼлаләт сәр һинкьрьна Ԝи зәндәгьрти ман,

²⁹ чьмки Әԝи мина йәки хԝәйиһʼӧкӧм әԝ һин дькьрьн, нә кӧ мина ԛанунзанед ԝан.