Metta 6 - Пәймана Ну (Инщил)

Һинкьрьна бона херкьрьне

¹ Һаш жь хԝә һәбьн, кӧ һун ԛәнщийед хԝә бәр мәрьва нәкьн, ԝәки жь ԝан бенә кʼьфше. Йан на, һун жь Баве хԝәйи Әʼзмана һәԛ настиньн.

² Аԝа чахе тӧ хера дьки, пешийа хԝә борʼийе нәхә, чаԝа дӧрʼу кʼьништ у кʼучада дькьн, ԝәки мәрьв пәсьне ԝан бьдьн. Әз рʼаст ԝәрʼа дьбежьм, кӧ ԝана һәԛе хԝә иди стандийә.

³ Ле чахе тӧ хера дьки, бьра дәсте чʼәпе ньзаньбә дәсте рʼасте чь хер кьр,

⁴ кӧ херед тә дьзива бьн. У Баве тәйи тьштед кӧ тӧ дьзива дьки дьбинә, ԝе һәԛе тә бьдә тә.

Һинкьрьна бона дӧа

⁵ Гава һун дӧа дькьн, мина дӧрʼуйа нәбьн. Әԝ һʼьз дькьн кʼьништ у мәйданада бьсәкьньн дӧа бькьн, кӧ бәр мәрьва бенә кʼьфше. Әз рʼаст ԝәрʼа дьбежьм, иди ԝана һәԛе хԝә стандийә.

⁶ Ле чахе тӧ дӧа дьки, бькʼәвә ода хԝә, дәри ль хԝә бьгьрә у Баве хԝәрʼа кӧ найе дитьне дӧайе хԝә бькә. У Баве тәйи тьштед кӧ тӧ дьзива дьки дьбинә, ԝе һәԛе тә бьдә тә.

⁷ Гава кӧ һун дӧа дькьн, мина пʼутпʼарьста пʼьрʼхәбәр нәбьн. Ԝана тʼьре бона пʼьрʼ хәбәрдана ԝан дӧайед ԝане бенә бьһистьне.

⁸ Һун мина ԝан нәбьн, чьмки бәри хԝәстьна ԝә, Баве ԝә занә чь ԝәрʼа лазьм ә.

⁹ Ле һун аһа дӧа бькьн: ‹Баве мәйи Әʼзмана! Наве Тә пироз бә,

¹⁰ Пʼадшатийа Тә бе, әʼмьре Тә бә, чаԝа ль әʼзмен, ӧса жи ль сәр әʼрде.

¹¹ Нане мәйи рʼоже рʼож бь рʼож бьдә мә.

¹² Дәйнед мә бьбахшинә, чаԝа кӧ әм дьбахшиньнә дәйндаред хԝә.

¹³ У мә нәбә щерʼьбандьне, ле мә жь йе хьраб хьлаз кә, чьмки пʼадшати, ԛәԝат у рʼумәт йед Тә нә, һʼәта-һʼәтайе. Амин›.

¹⁴ Һәгәр һун нәһәԛийед мәрьвайә һьндава ԝәда кӧ дькьн бьбахшиньн, Баве ԝәйи Әʼзмана жи ԝе ԝә бьбахшинә.

¹⁵ Ле һәгәр һун нәһәԛийед мәрьва нәбахшиньн, Баве ԝә жи нәһәԛийед ԝә набахшинә.

Һинкьрьна бона рʼожийе

¹⁶ Гава кӧ һун рʼожи дьгьрьн, мина дӧрʼуйа мәʼдәкьри нибьн. Әԝ мәʼде хԝә дькьн, ԝәки мәрьв бьзаньбьн кӧ әԝ рʼожи нә. Әз рʼаст ԝәрʼа дьбежьм, кӧ ԝана һәԛе хԝә стандийә.

¹⁷ Ле чахе тӧ рʼожи дьгьри, сәрчʼәʼве хԝә бьшо, сәре хԝә шә кә,

¹⁸ ԝәки мәрьв ньзаньбьн кӧ тӧ рʼожи йи, ле тʼәне Баве тәйи кӧ найе дитьне заньбә. У Баве тәйи тьштед кӧ тӧ дьзива дьки дьбинә, ԝе һәԛе тә бьдә тә.

Хьзна әʼзмана

¹⁹ Ль сәр дьне хьзне хԝәрʼа нәщьвиньн. Ль ве дәре зәнг у бьзуз хьраб дькьн у дьз дәрәвәдькьн дьдьзьн.

²⁰ Ле хьзне хԝәрʼа ль әʼзмен бьщьвиньн. Ль ԝе дәре зәнг у бьзуз хьраб накьн у дьз жи дәрәвәнакьн надьзьн.

²¹ Чьмки хьзна тә кʼидәре бә, дьле тә жи ԝе ль ԝе дәре бә.

Чʼьра бәдәне

²² Чʼьра бәдәне чʼәʼв ә. Һәгәр чʼәʼве тә пʼак ә, тʼәмамийа бәдәна тәйе рʼонайи бә.

²³ Ле һәгәр чʼәʼве тә хьраб ә, тʼәмамийа бәдәна тәйе тәʼри бә. Аԝа һәгәр әԝ рʼонайа кӧ нав тәда йә тәʼри йә, тәʼри ԝе чьԛас зедә бә!

Хԝәде у һәбука дьнйайе

²⁴ Тʼӧ кәс нькарә дӧ ахарʼа хӧламтийе бькә, чьмки йан ԝе һʼиле ԝи жь йәки һәрʼә у йе дьне һʼьз бькә, йан жи ԝе ԛәдьре йәки бьгьрә у йе дьне беһӧрмәт кә. Һун нькарьн һьн Хԝәдерʼа, һьн жи һәбукерʼа хӧламтийе бькьн.

Һинкьрьна дәрһәԛа хәмкьрьнеда

²⁵ Ләма әз ԝәрʼа дьбежьм, бона әʼмьре хԝә хәма нәкьн, кӧ һуне чь бьхԝьн у чь вәхԝьн, нә жи бона бәдәна хԝә, кӧ һуне чь ль хԝә кьн. Нә әʼмьр жь хԝарьне ԛимәттьр ә у бәдән жи жь кʼьнща?

²⁶ Дина хԝә бьдьнә тәйрәдед әʼзмен. Әԝана нә дьрʼәшиньн, нә дьдьрун у нә жи әʼмбарада дьщьвиньн, ле Баве ԝәйи Әʼзмана рʼьсԛе ԝан дьгьһинә. Нә һун жь ԝан ԛимәттьр ьн?

²⁷ Иди жь ԝә кʼи дькарә бь хәмед хԝә дәԛәке сәр әʼмьре хԝәда зедә кә?

²⁸ У бона кʼьнща һун чьма хәм дькьн? Дина хԝә бьдьнә сосьнед чоле, чаԝа шин дьбьн, нә дьхәбьтьн у нә жи дьрʼесьн.

²⁹ Ле әз ԝәрʼа дьбежьм, кӧ Сьлеман жи ль нава тʼәмамийа ԝе хер-хьзна хԝәда мина жь ԝан йәке хԝә нәкьр.

³⁰ Һәгәр гиһайе чоле, кӧ иро һәйә у сьбе давежьнә нава егьр, Хԝәде ӧса дьхәмьлинә, ле чьԛас зедә ԝе ль ԝә кә, кембаԝәрно?

³¹ Иди хәм нәкьн у нәбежьн: ‹Әме чь бьхԝьн?› йан: ‹Чь вәхԝьн?› йан жи: ‹Чь ль хԝә кьн?›

³² Пʼутпʼарьст ль пәй ԝан һʼәму тьшта дькʼәвьн, ле Баве ԝәйи Әʼзмана занә кӧ һун һʼәԝще ԝан һʼәму тьшта нә.

³³ Ле бәре пешьн ль Пʼадшатийа Хԝәде бьгәрʼьн у бькьн кӧ рʼастийа Ԝи бьԛәдиньн у әԝ һʼәмуйе ԝәрʼа бенә дайине.

³⁴ Иди бона рʼожа сьбе хәма нәкьн, чьмки рʼожа сьбе ԝе бона хԝә хәма бькә. Хәмед рʼоже бәси ԝе нә.