Metta 5 - Пәймана Ну (Инщил)

Даннасинийа сәре чʼийе

¹ Чахе Иса әʼлаләт дит, һьлкʼьшийа чʼийе, рʼуньшт у шагьртед Ԝи һатьнә щәм Ԝи.

² Әԝи дәст бь һинкьрьна Хԝә кьр у ԝанрʼа гот:

Һинкьрьна бона хԝәзьлийа рʼаст

³ «Хԝәзи ль рʼӧһʼфәԛира, чьмки Пʼадшатийа Әʼзмана йа ԝан ә.

⁴ Хԝәзи ль һʼәзнийа, чьмки бәр дьлед ԝанда ԝе бе һатьне.

⁵ Хԝәзи ль шкәстийа, чьмки әʼрде пʼара ԝан бә.

⁶ Хԝәзи ль ԝан, кӧ тʼи у бьрʼчийе рʼастиԛәдандьне нә, чьмки әԝе тʼер бьн.

⁷ Хԝәзи ль дьлрʼәʼма, чьмки әԝе рʼәʼме бьбиньн.

⁸ Хԝәзи ль дьлпаԛьжа, чьмки әԝе Хԝәде бьбиньн.

⁹ Хԝәзи ль ԝан, кӧ әʼдьлайийе дькьн, чьмки әԝе зарʼед Хԝәде бенә һʼәсабе.

¹⁰ Хԝәзи ль ԝан, кӧ бона рʼастиԛәдандьне тенә зерандьне, чьмки Пʼадшатийа Әʼзмана йа ԝан ә.

¹¹ Хԝәзи ль ԝә, гава бона наве Мьн ԝә беһӧрмәт кьн, бьзериньн у һәр щурʼә бӧхдан ль ԝә бькьн.

¹² Әшԛ у ша бьн, чьмки һәԛе ԝә ль әʼзмана гәләк ә. Бь ви щурʼәйи пʼехәмбәред кӧ бәри ԝә һәбун, зерандьн.

Хԝе у рʼонайи

¹³ Һун хԝейа әʼрде нә. Ле һәгәр хԝе тәʼма хԝә ӧнда кә, паше әԝе бь чь тәʼме бьстинә? Иди ԝе кери тьштәки нәйе. Ԝе бьгьрьн бавежьнә нав дәст-пʼийа.

¹⁴ Һун рʼонайа дьнйайе нә. Һәгәр бажарәк сәре чʼийе йә, найе вәшартьне.

¹⁵ Кәсәк жи чʼьре венахә у накә бьне фьраԛе, ле датинә сәр пʼечʼьре, кӧ рʼонайе бьдә һʼәмуйед кӧ маледа нә.

¹⁶ Ӧса жи бьра рʼонайа ԝә бәр мәрьва шәԝԛ бьдә, кӧ әԝана кьрьнед ԝәйә ԛәнщ бьбиньн у пәсьне Баве ԝәйи әʼзмана бьдьн.

Һинкьрьна бона Ԛануне

¹⁷ Нәфькьрьн кӧ Әз һатьмә ньвисаред пʼехәмбәра у Ԛануне хьраб кьм. Әз нәһатьм кӧ хьраб кьм, ле ԝан һʼәмуйа биньмә сери.

¹⁸ Әз рʼаст ԝәрʼа дьбежьм, бәри дәрбазбуна әʼрд у әʼзман, дәԛәк йан жи һʼәрфәкә бьчʼук жь Ԛануне ԝе тʼӧ щар ӧнда нәбә, һʼәта кӧ һʼәму бенә сери.

¹⁹ Аԝа кʼи жь ван тʼәмийа йәкә һәрә бьчʼук хьраб кә у мәрьва ӧса һин кә, әԝе Пʼадшатийа Әʼзманада жь һʼәмуйа бьчʼуктьр бе һʼәсабе. Ле кʼи кӧ ԝана пек бинә у һин бькә, әԝе Пʼадшатийа Әʼзманада мәзьн бе һʼәсабе.

²⁰ Ләма Әз ԝәрʼа дьбежьм, һәгәр рʼастийа ԝә жь рʼастийа ԛанунзан у ферьсийа зедәтьр нибә, һун тʼӧ щар накʼәвьнә Пʼадшатийа Әʼзмана.

Һинкьрьна дәрһәԛа һерсе у меркӧштьнеда

²¹ Ԝә бьһистийә кӧ пешийарʼа һатийә готьне: ‹Нәкӧжә! Кʼи кӧ бькӧжә, диԝана ԝи ԝе бе кьрьне›.

²² Ле Әз ԝәрʼа дьбежьм, кʼи сәр бьре хԝә һерс кʼәвә, ԝе бьбә дәйндаре диԝане у кʼи бежә бьре хԝә: ‹Бе аԛьл›, әԝе бьбә дәйндаре диԝана щьвина гьрәгьра у кʼи кӧ бежә: ‹Ахмах›, ԝе бьбә дәйндаре агьре доже.

²³ Аԝа һәгәр тӧ һʼәдийа хԝә бини сәр горигәһе у ль ԝьр бе бира тә, кӧ дьле бьре тә жь тә майә,

²⁴ һʼәдийа хԝә ԝе дәре ль бәр горигәһе бьһелә у пешийе һәрʼә бьре хԝәрʼа ль һәв ԝәрә у паше ԝәрә һʼәдийа хԝә бьдә.

²⁵ Чахе нәйаре тә тә кʼаши щәм һʼакьм дькә, рʼеда тʼәви ԝи зу ль һәв ԝәрә. Һәгәр на, әԝе тә бьдә дәсте һʼакьм, һʼакьме жи тә бьдә дәсте бәрдәстийе хԝә у тә бавежә кәле.

²⁶ Әз рʼаст тәрʼа дьбежьм, тӧ жь ԝьр тʼӧ щар дәрнакʼәви һʼәта поле пашьн нәди.

Һинкьрьна дәрһәԛа зьнекʼарийеда

²⁷ Ԝә бьһистийә кӧ һатийә готьне: ‹Зьнийе нәкә›.

²⁸ Ле Әз ԝәрʼа дьбежьм, кʼи бь тәме хьраб жьнәке бьньһерʼә, әԝи дьле хԝәда иди тʼәви ԝе зьнекʼари кьр.

²⁹ Аԝа һәгәр чʼәʼве тәйи рʼасте тә жь рʼе дәрдьхә, ԝи дәрхә у жь хԝә бавежә. Бона тә һе ԛәнщ ә кӧ әндәмәки тә ӧнда бә, ле бәдәна тә пева нәкʼәвә щәʼньме.

³⁰ У һәгәр дәсте тәйи рʼасте тә жь рʼе дәрдьхә, ԝи жекә у бавежә. Тәрʼа һе ԛәнщ ә кӧ әндәмәки тә ӧнда бә, ле бәдәна тә пева нәкʼәвә щәʼньме.

Һинкьрьна дәрһәԛа жьнбәрʼданеда

³¹ Әв жи һатийә готьне: ‹Кʼи кʼӧлфәта хԝә бәрʼдә, бьра кʼахаза жьнбәрʼдане бьдә ԝе›.

³² Ле Әз ԝәрʼа дьбежьм, кʼи кӧ бе сәбәбийа ԛавийе жьна хԝә бәрʼдә, әԝ дьбә сәбәбе зьнекьрьна ԝе, һәгәр диса әԝ мер кә у кʼи кӧ йәкә мербәрʼдайи бьстинә, әԝ зьнийе дькә.

Һинкьрьна бона сонде

³³ Ԝә әв жи бьһистийә кӧ пешийарʼа һатийә готьне: ‹Дәрәԝ сонд нәхԝә у сонде хԝә ль бәр Хӧдан бинә сери›.

³⁴ Ле Әз ԝәрʼа дьбежьм, тʼӧ щар сонд нәхԝьн, нә бь әʼзмен, чьмки әԝ тʼәхте Хԝәде йә,

³⁵ нә жи бь әʼрде, чьмки әԝ щийе бьн пʼийед Ԝи йә, нә жи бь Оршәлиме, чьмки әԝ бажаре Пʼадше мәзьн ә

³⁶ у нә жи бь сәре хԝә сонд бьхԝә, чьмки тӧ нькари муки сьпи ки йан рʼәш ки.

³⁷ Ле бьра готьна ԝә бьбә ‹бәле-бәле› йан жи ‹на-на›. Жь ве зедәтьр жь мирещьн ә.

Һинкьрьна дәрһәԛа һʼәйфһьлданеда

³⁸ Ԝә бьһистийә кӧ һатийә готьне: ‹Чʼәʼв жь бәр чʼәʼвва, дьран жь бәр дьранва›.

³⁹ Ле Әз ԝәрʼа дьбежьм, мьԛабьли хьраба нәсәкьньн. Һәгәр йәк шәмаԛәке ль рʼуйе тәйи рʼасте хә, йе дьн жи бьдә бәр.

⁴⁰ У һәгәр йәк тә кʼаши бәр диԝане кә у бьхԝазә кьрасе тә жь тә бьстинә, пʼоте хԝә жи жерʼа бьһелә.

⁴¹ У һәгәр йәки ԛӧльхеда зоре ль тә бькә, ԝәки километьрәке тә бьбә, тʼәви ԝи дӧда һәрʼә.

⁴² Бьдә ԝи, кʼи жь тә дьхԝазә у бәре хԝә жь ԝи нәгӧһезә, йе кӧ дьхԝазә жь тә дәйн бькә.

Дьжмьнед хԝә һʼьз бькьн

⁴³ Ԝә бьһистийә кӧ һатийә готьне: ‹Һәвале хԝә һʼьз бькә у бьжәнә дьжмьне хԝә›.

⁴⁴ Ле Әз ԝәрʼа дьбежьм, дьжмьнед хԝә һʼьз бькьн у бона ԝан дӧа бькьн, йед кӧ ԝә дьзериньн,

⁴⁵ ԝәки һун бьбьнә зарʼед Баве хԝәйи Әʼзмана. Чьмки Әԝ тәʼва Хԝә дәрдьхә һьн сәр ԛәнща, һьн жи сәр хьраба у баране дьбаринә һьн сәр рʼаста, һьн жи сәр нәрʼаста.

⁴⁶ Һәгәр һун ԝан һʼьз бькьн, кʼижан кӧ ԝә һʼьз дькьн, һуне чь һәԛ бьстиньн? Нә хәрщгьр жи ӧса дькьн?

⁴⁷ У һәгәр һун тʼәне сьлаве бьдьнә бьред хԝә, иди һун чь тьшти жь әԝед дьн зедәтьр дькьн? Нә пʼутпʼарьст жи ӧса дькьн?

⁴⁸ Аԝа кʼамьл бьн, чаԝа кӧ Баве ԝәйи Әʼзмана кʼамьл ә.