Metta 4 - Пәймана Ну (Инщил)

Щерʼьбандьна Иса

¹ Һьнге Рʼӧһʼ Иса бьрә бәрʼийе, кӧ жь Мирещьн бе щерʼьбандьне.

² Әԝи чьл рʼож у чьл шәви рʼожи гьрт, пәйрʼа бьрʼчи бу.

³ Йе кӧ дьщерʼьбинә незики Ԝи бу у готе: «Һәгәр Тӧ Кӧрʼе Хԝәде йи, дә бежә ван кәвьра кӧ бьбьнә нан».

⁴ Ле Иса ле вәгәрʼанд у готе: «Ньвисар ә: ‹Инсан тʼәне бь нен нажи, ле бь һәр хәбәра кӧ жь дәве Хԝәде дәрдькʼәвә›».

⁵ Һьнге мирещьн Әԝ бьрә Бажаре Пироз, сәр бьльндщийа бане пʼарьстгәһе да сәкьнандьне

⁶ у готә Ԝи: «Һәгәр Тӧ Кӧрʼе Хԝәде йи, дә Хԝә бавежә хԝаре, чьмки ньвисар ә: ‹Хԝәде ԝе тʼәмийа Тә бьдә мьлйакʼәтед Хԝә у ԝе Тә сәр дәсте Хԝә бьгьрьн, ԝәки ньге Тә кәвьр нәкʼәвә›».

⁷ Иса готе: «Әв жи ньвисар ә: ‹Хӧдан Хԝәдейе хԝә нәщерʼьбинә›».

⁸ Һьнге мирещьн Әԝ бьр рʼакьрә сәр чʼийаки гәләки бьльнд у һʼәму пʼадшатийед дьнйайе, рʼәԝша ԝанва нишани Ԝи дан

⁹ у готә Ԝи: «Һәгәр Тӧ дәвәрʼуйа бейи, сәре Хԝә ль бәр мьн дайни, әзе ван һʼәмуйа бьдьмә Тә».

¹⁰ Һьнге Иса готе: «Дури Мьн һәрʼә, щьно! Чьмки ньвисар ә: ‹Сәре хԝә ль бәр Хӧдан Хԝәдейе хԝә дайнә у тʼәне Ԝирʼа хӧламтийе бькә!›»

¹¹ Ԝи чахи мирещьн Әԝ һьшт чу у ва мьлйакʼәт һатьн жерʼа бәрдәсти кьрьн.

Иса ԛәза Щәлиледа дәст бь кʼаре Хԝә дькә

¹² Гава Иса бьһист, ԝәки Йуһʼәнна һатә гьртьне, Әԝ рʼабу чу Щәлиле.

¹³ Әԝи Ньсрәт һьшт, чу Кәфәрнаһума дәве гола Щәлиле, ль нав синоре Зәбулоне у Нәфтәлийе щи-ԝар бу.

¹⁴ Әв йәк аһа бу, кӧ әԝ готьна бь заре Ишайа пʼехәмбәр бе сери:

¹⁵ «Ԝәлате Зәбулоне у ԝәлате Нәфтәлийе, ль сәр рʼийа бәрбь голе, ԝи алийе Урдӧне, Щәлила нәщьһуйа,

¹⁶ әԝ щьмәʼта кӧ нав тәʼристанийеда рʼуньштьбу, рʼонайикә мәзьн дит у әԝед кӧ ль ԝәлат у сийа мьрьнеда рʼуньштьбун, рʼонайи жь ԝанарʼа дәркʼәт».

¹⁷ Жь һьнгева Иса дәст бь даннасинийе кьр у гот: «Жь гӧнәкьрьне вәгәрʼьн, чьмки Пʼадшатийа Әʼзмана незик буйә».

Иса гази һәр чар мәʼсигьра дькә

¹⁸ Чахе Иса ль дәве гола Щәлиле дьгәрʼийа, рʼасти дӧ бьра һат, Шьмһʼуне кӧ жерʼа Пәтрус дьһатә готьне у Әндраԝьсе бьре ԝи. Ԝана тʼорʼ давитә голе, чьмки мәʼсигьр бун.

¹⁹ Иса ԝанарʼа гот: «Пәй Мьн ԝәрьн, Әзе ԝә бькьмә нечʼирванед мәрьва».

²⁰ Ԝана жи һәма ԝе дәме тʼорʼед хԝә һьштьн у пәй Ԝи чун.

²¹ Гава Иса жь ԝи щийи һьнәки пешда чу, рʼасти дӧ бьред дьн жи һат, Аԛубе Зәбәди у Йуһʼәннайе бьре ԝи. Ԝана тʼәви баве хԝә, Зәбәди ԛәйькеда тʼорʼед хԝә һивез дькьрьн. Иса гази ԝан жи кьр.

²² Ԝана жи һәма ԝе дәме ԛәйьк у баве хԝә һьштьн у пәй Ԝи чун.

Иса даннасин дькә, һин дькә у ԛәнщ дькә

²³ Иса ль тʼәмамийа Щәлиле дьгәрʼийа, кʼьништед ԝанда һин дькьр у Мьзгинийа Пʼадшатийе дьда у һәр щурʼә еш у нәхԝәши жи кӧ нав щьмәʼтеда һәбун ԛәнщ дькьрьн.

²⁴ Нав-дәнге Ԝи ль тʼәмамийа Сурйайе бәла бу, щьмәʼте һәр щурʼә мәрьвед нәхԝәш анинә щәм Ԝи, йед кӧ щурʼә-щурʼә еш у щәфада бун: Йед щьнакʼәти, һивкʼәти, шьлушәʼт у Әԝи әԝ һʼәму жи ԛәнщ кьрьн.

²⁵ Гәләк әʼлаләт жи жь Щәлиле, жь ԛәза Декаполисе, жь Оршәлиме, жь Щьһустане у жь ԝи алийе Урдӧнейи рʼоһьлате пәй Ԝи дьчун.