Metta 27 - Пәймана Ну (Инщил)

Иса дьбьнә бәр Пилато

¹ Гава сьбәһ сафи бу, тʼәмамийа сәрәкед кʼаһина у рʼуспийед щьмәʼте ль һәв шеԝьрин кӧ Иса чаԝа бьдьнә кӧштьне.

² Әԝ гьредан, бьрьн данә дәсте Пилатойе ԝәли.

Ахьрийа Щьһуда

³ Һьнге Щьһудайе кӧ нәмамийа Ԝи кьр, дит кӧ Иса һатә нәһәԛкьрьне, пʼошман бу, әԝ си зив вәгәрʼандә сәрәкед кʼаһина у рʼуспийа

⁴ у гот: «Мьн гӧнә кьр. Әз бумә сәбәбе хуна бесущ». Ԝана жи готә ԝи: «Чи мәрʼа нә? Тӧ зани».

⁵ Әԝи жи әԝ зив авитьнә нав пʼарьстгәһе, дәркʼәт чу хԝә хәньԛанд.

⁶ Сәрәкед кʼаһина зив һьлдан у готьн: «Нә рʼаст ә кӧ әм ван бькьнә нав хьзна пʼарьстгәһе, чьмки әԝ һәԛе хуне йә».

⁷ Һьнге әԝ ль һәв шеԝьрин у бь ԝан зива Әʼрде Ахинкәр кʼьрʼин, бона тʼьрбед хәриба.

⁸ Ләма әԝ әʼрд һʼәта иро жи «Әʼрде Хуне» те готьне.

⁹ Һьнге әԝ готьна бь заре Йерәмийа пʼехәмбәр һатә сери: «Си зив ԛимәт дан, ԝәкә ԝи ԛимәте кӧ һьнәкә жь зарʼед Исраеле ԛайл бун

¹⁰ у әԝ данә Әʼрде Ахинкәр, чаԝа кӧ Хӧдан мьнрʼа әʼмьр кьр».

Пьрса Пилато

¹¹ Иса бәр ԝәли сәкьни, ԝәли жь Ԝи пьрси у гот: «Тӧ йи пʼадше щьһуйа?» Иса ԝирʼа гот: «Тә бь дәве хԝә гот».

¹² Ле чахе сәрәкед кʼаһина у рʼуспийа давитьнә Ԝи, Әԝи ԛәт щаба кәсәки нәда.

¹³ Һьнге Пилато Ԝирʼа гот: «Тӧ набьһейи чьԛас шькийате Тә дькьн?»

¹⁴ Әԝи диса щаба кәсәки нәда, һʼәта ԝәли жи шаш ма.

Диԝанеда һʼӧкӧме кӧштьне ль сәр Иса дәрдьхьн

¹⁵ Әʼдәте ԝәли бу кӧ ль щәжьнеда бь хԝәстьна әʼлаләте гьртик ԝанрʼа бәрʼда.

¹⁶ Һьнге гьртики ԝани кʼьфш һәбу, кӧ наве ԝи Барабас бу.

¹⁷ Гава кӧ әԝана щьвийан, Пилато ԝанарʼа гот: «Һун кʼижани дьхԝазьн кӧ әз бона ԝә бәрʼдьм, Барабас йан Исайе кӧ Мәсиһ те готьне?»

¹⁸ Әԝи заньбу кӧ жь дәст һʼәвсудийе Иса дабунә дәсте ԝи.

¹⁹ Гава әԝ ль һәрәма диԝане рʼуньштьбу, кʼӧлфәта ԝи щаб шанд у гот: «Кʼаре тә әԝи Бесущ нәкʼәтийә, чьмки ве шәва дәрбазбуйи хәԝнеда бона Ԝи гәләк тьшт сәр мьнрʼа дәрбаз бун».

²⁰ Ле сәрәкед кʼаһина у рʼуспийа әʼлаләт рʼази кьр, кӧ Барабас бьхԝазьн у Иса ӧнда кьн.

²¹ Ԝәли диса ԝанарʼа гот: «Һун жь ван һәр дӧйа кʼижани дьхԝазьн кӧ әз ԝәрʼа бәрʼдьм?» Ԝана жи гот: «Барабас!»

²² Пилато ԝанарʼа гот: «Ле әз Исайе кӧ Мәсиһ жерʼа дьбежьн чаԝа бькьм?» Һʼәмуйа жи гот: «Бьра бе хачкьрьне!»

²³ Ԝәли гот: «Ле Әви чь хьраби кьрийә?» Һьнге ԝана һе кьрә ԛирʼин у готьн: «Бьра бе хачкьрьне!»

²⁴ Пилато жи дит, ԝәки тьштәк кʼаре надә, ле һе шәрʼ у дәʼԝ дәстпедьбә, ав һьлда ль бәр әʼлаләте дәстед хԝә шуштьн у гот: «Әз жь хуна Ви бесущ ьм. Һун хԝәха бьньһерʼьн».

²⁵ У тʼәмамийа щьмәʼте щаба ԝи да у гот: «Бьра хуна Ԝи ль сәр мә у ль сәр зарʼед мә бә!»

²⁶ Һьнге Пилато Барабас ԝанарʼа бәрʼда, ле Иса да бәр ԛамчийа у да дәсте ԝан кӧ бе хачкьрьне.

Әскәр ԛәрфе хԝә ль Иса дькьн

²⁷ Һьнге әскәред ԝәли Иса бьрьнә һьндӧрʼе ԛәсьре у тʼәмамийа рʼәфа әскәра сәр Ԝи щьвийа.

²⁸ Кʼьнще Ԝи же ехьстьн у чӧхәки соре гәвәз ле кьрьн.

²⁹ Паше тʼащәк жь стьрийа вәгьртьн данә сәре Ԝи у ԛамишәк жи данә дәсте Ԝийи рʼасте. Һьнге бәр Ԝи чок дан, ԛәрфе хԝә пе кьрьн у готьн: «Хԝәш бә, Пʼадше Щьһуда!»

³⁰ Тʼуйи Ԝи кьрьн, ԛамиш һьлдан сәре Ԝи хьстьн.

³¹ Пәй ԛәрфкьрьнерʼа чӧхе сор жь Ԝи ехьстьн у кʼьнще Ԝи лекьрьн у данә пешийа хԝә бьрьн кӧ Ԝи хач кьн.

Хачкьрьна Иса

³² Чахе әԝ дәркʼәтьнә дәрва, әскәра йәки курени дит кӧ наве ԝи Шьмһʼун бу, пʼейи сәр ԝи кьрьн кӧ хаче Ԝи һьлдә.

³³ Әԝана гьһиштьнә ԝи щийе кӧ жерʼа Голгота дьготьн, кӧ те фәʼмкьрьне: «Щийе Ԛафа».

³⁴ Шәрава зьрав тʼәвкьри дане кӧ вәхԝә. Ле чахе Әԝи тәʼм кьр, нәхԝәст вәхԝә.

³⁵ Әԝ хач кьрьн, сәр кʼьнще Ԝи пʼәшк авитьн у ль нав хԝәда бәла кьрьн.

³⁶ Паше ԝе дәре рʼуньштьн у нобәдари ль Ԝи кьрьн.

³⁷ Нәһәԛийа Ԝи ньвисин данин феза сәре Ԝи: «ӘВ ИСА, ПʼАДШЕ ЩЬҺУЙА ЙӘ».

³⁸ Һьнге дӧ ԛачах жи тʼәви Ԝи һатьнә хачкьрьне, йәк мьле рʼасте у йе дьн мьле чʼәпе.

³⁹ Әԝед кӧ ԝьррʼа дьчун-дьһатьн Әԝ беһӧрмәт дькьрьн, сәре хԝә дьһʼәжандьн

⁴⁰ у дьготьне: «Нә Тәйе пʼарьстгәһ һьлшанда у се рʼожада чекьра? Дә Хԝә хьлаз кә, һәгәр Тӧ Кӧрʼе Хԝәде йи! Жь хач ԝәрә хԝаре!»

⁴¹ Ӧса жи сәрәкед кʼаһина, ԛанунзана у рʼуспийа тʼәвайи ԛәрфе хԝә Ԝи дькьрьн у дьготьн:

⁴² «Хәлԛ хьлаз кьр, ле Хԝә нькарә хьлаз кә! Әв нинә Пʼадше Исраеле? Дә бьра ньһа жь хач бе хԝаре у әме баԝәрийа хԝә Ԝи биньн.

⁴³ Гӧмана Хԝә дани сәр Хԝәде, дә бьра ньһа Ԝи хьлаз кә, һәгәр Хԝәде жь Ԝи рʼази йә, чьмки гот: ‹Әз Кӧрʼе Хԝәде мә›».

⁴⁴ Ԛачахед кӧ тʼәви Ԝи һатьнә хачкьрьне, ԝана жи ӧса тәʼн ль Ԝи дьхьстьн.

Мьрьна Иса

⁴⁵ Нивро жь сьһʼәта донздәһа һʼәта сьһʼәта сьсийа тʼәмамийа әʼрде бу тәʼри.

⁴⁶ Незики сьһʼәта сьсийа Иса бь дәнгәки бьльнд кьрә ԛирʼин у гот: «Ели, Ели, лама сабахтани?» кӧ те фәʼмкьрьне: «Хԝәдейе Мьн, Хԝәдейе Мьн, Тә чьма Әз һьштьм?»

⁴⁷ Әԝе кӧ незик сәкьнибун, гава әв хәбәр бьһистьн, готьн: «Әԝ гази Елйас дькә».

⁴⁸ Йәк жь ԝан бь ләз бәзи, луфька бәʼре һьлда сьркеда кьр, ль сәр ԛамишәкива дани у да Ԝи кӧ вәхԝә.

⁴⁹ Ле һьнәкед дьн готьн: «Бьсәкьнә. Әм бьбиньн, кʼа Елйасе бе Ԝи хьлаз кә?»

⁵⁰ Иса диса бь дәнгәки бьльнд кьрә гази у рʼӧһʼе Хԝә да.

⁵¹ Һәма һьнге пʼәрʼда пʼарьстгәһе жь сери һʼәта бьни ԛәльши, бу дӧ тиша. Әʼрд һʼәжийа, кәвьр ԛәльшин,

⁵² тʼьрб вәбун у гәләк мьрийед бӧһӧрти рʼабун.

⁵³ Әԝ жь тʼьрба дәркʼәтьн пәй рʼабуна Исарʼа, чунә Бажаре Пироз у гәләка әԝ дитьн.

⁵⁴ Чахе сәрсәд у әԝед кӧ тʼәви ԝи нобәдарийа Иса дькьрьн, әʼрдһʼәж у әԝ һʼәму тьште ԛәԝьми дитьн, рʼьсасе әԝ гьртьн у готьн: «Рʼасти жи Әва Кӧрʼе Хԝәде бу!»

⁵⁵ Ль ԝе дәре гәләк кʼӧлфәт жи һәбун, кӧ дурва дьньһерʼин. Әԝ жь Щәлиле ль пәй Иса һатьбун, бәрдәсти Ԝирʼа кьрьбун.

⁵⁶ Мәрйәма Мәждәлани, Мәрйәма дийа Аԛуб у Усьв у дийа һәр дӧ кӧрʼед Зәбәди ль нав ԝанда бун.

Дәфьнкьрьна Иса

⁵⁷ Бәре еваре мәрьвәки дәԝләти жь Аримәтйайе һат, кӧ наве ԝи Усьв бу. Әԝ жи йәк жь шагьртед Иса бу.

⁵⁸ Әԝ чу щәм Пилато у щьнйазе Иса жь ԝи хԝәст. Ԝе гаве Пилато әʼмьр кьр кӧ щьнйаз бе дайине.

⁵⁹ Усьв щьнйаз һьлда, ԛәдәке кʼьтанийи паԛьжда кʼәфән кьр

⁶⁰ у дани нав тʼьрба хԝәйә ну кӧ ԛәйеда кʼолабу. Паше әԝи кәвьрәки мәзьн һоли бәр дәре тʼьрбе кьр у чу.

⁶¹ Мәрйәма Мәждәлани у Мәрйәма дьн ль ԝе дәре бун у пешбәри тʼьрбе рʼуньштьбун.

Нобәдаред тʼьрбе

⁶² Рʼожа дьн кӧ пәй рʼожа тʼьвдарәккьрьне бу, сәрәкед кʼаһина у ферьсийа ль щәм Пилато щьвийан

⁶³ у готьн: «Әм хӧлам, те бира мә, кӧ әԝи дәрәԝин сахтийа Хԝәда готьбу: ‹Әзе рʼожа сьсийа жь мьрьне рʼабьм›.

⁶⁴ Ньһа әʼмьр кә кӧ һʼәта рʼожа сьсийа мьԛати тʼьрбе бьн, нәбә кӧ шагьртед Ԝи бен Ԝи бьдьзьн у щьмәʼтерʼа бежьн: ‹Әԝ жь мьрьне рʼабуйә›. Иди хальфандьна пашийе жь йа пешийе хьрабтьр бә».

⁶⁵ Пилато ԝанрʼа гот: «Ва нә ԝәрʼа әскәред нобәдар. Һәрʼьн чаԝа кӧ һун заньн ӧса жи мьԛати тʼьрбе бьн».

⁶⁶ Әԝ жи чун мьԛати тʼьрбе бун, кәвьр мор кьрьн у әскәред нобәдар ль бәр данин.