Metta 26 - Пәймана Ну (Инщил)

Шеԝьра кӧштьна Иса

¹ Гава Иса әв һʼәму хәбәр хьлаз кьрьн, шагьртед Хԝәрʼа гот:

² «Һун заньн кӧ ԝе дӧ рʼожа шунда Щәжьна Дәрбазбуне бә. У Кӧрʼе Мерьв ԝе бе дайине кӧ бе хачкьрьне».

³ Һьнге сәрәкед кʼаһина у рʼуспийед щьмәʼте сәрайа сәрәккʼаһинда кӧ наве ԝи Ԛәйафа бу щьвийан

⁴ у ль һәв шеԝьрин кӧ Иса дьзива бь фелбазийе бьгьрьн, бькӧжьн.

⁵ Ле ԝана дьгот: «Бьра әв йәк щәжьнеда нибә, ԝәки щьмәʼт рʼанәбә сәр ньга».

Иса Бәйтанйайеда те рʼункьрьне

⁶ Чахе Иса ль Бәйтанйайе мала Шьмһʼуне кʼотида бу,

⁷ кʼӧлфәтәкә кӧ дәрданәкә ԝейә алабастьрейи рʼуне бинхԝәш һәбу, һатә щәм Ԝи у чахе Әԝ ль сәр сьфре рʼуньшти бу, әԝе әԝ рʼун рʼетә сәр сәре Ԝи.

⁸ Гава шагьрта әв йәк дит, ль ԝан хԝәш нәһат у готьне: «Чьма әва зийана бу?

⁹ Әва рʼуна ԝе ԛимәтәки бьһа бьһата фьротане у фәԛирарʼа бьһата бәлакьрьне».

¹⁰ Ле әԝ йәк Исава әʼйан бу у ԝанарʼа гот: «Чьма һун хатьре ԝе кʼӧлфәте дькʼәвьн? Әԝе тьштәки ԛәнщ бона Мьн кьр.

¹¹ Фәԛире һәр гав тʼәви ԝә бьн, ле Әзе һәр гав тʼәви ԝә нибьм.

¹² Әԝе бона дәфьнкьрьна Мьн әԝ рʼун рʼетә сәр бәдәна Мьн.

¹³ Әз рʼаст ԝәрʼа дьбежьм, дьнйайеда кʼидәре әва Мьзгинийа бе даннасинкьрьне, ԝе кьрьна ве кʼӧлфәте жи бона биранина ԝе бе готьне».

Щьһуда нәмамийа Иса дькә

¹⁴ Һьнге йәк жь һәр донздәһа кӧ Щьһудайе Исхәрйоти дьһатә готьне, чу щәм сәрәкед кʼаһина

¹⁵ у гот: «Һуне чь бьдьнә мьн, ԝәки әз Ԝи бьдьмә дәсте ԝә?» У ԝана си зив жьмьрин дане.

¹⁶ Жь ԝьр шунда әԝ мәщаләке дьгәрʼийа кӧ чаԝа Иса бьдә дәсте ԝан.

Иса тʼәви шагьртед Хԝә шива Щәжьна Дәрбазбуне дьхԝә

¹⁷ Ль рʼожа пешьнә Щәжьна Нане Шкәва, шагьрт һатьнә щәм Иса у жерʼа готьн: «Тӧ ль кʼӧ дьхԝази Шива Щәжьна Дәрбазбуне бьхԝи, ԝәки әм Тәрʼа һазьр кьн?»

¹⁸ Әԝи жи гот: «Һәрʼьнә бажер, щәм фьлан мәрьви у бежьнә ԝи: ‹Дәрсдар дьбежә: Рʼожа Мьн незик ә. Әзе тʼәви шагьртед Хԝә мала тәда Щәжьна Дәрбазбуне дәрбаз кьм›».

¹⁹ У шагьрта ӧса кьр, чаԝа кӧ Иса ԝанарʼа әʼмьр кьрьбу у шива Щәжьна Дәрбазбуне һазьр кьрьн.

²⁰ Еваре тʼәв һәр донздәһа сәр сьфре рʼуньшт.

²¹ Гава ԝана һе дьхԝар, Иса гот: «Әз рʼаст ԝәрʼа дьбежьм, йәки жь ԝә ԝе нәмамийа Мьн бькә».

²² Шагьрт гәләки бәр хԝә кʼәтьн у һәр йәки жь ԝан готә Ԝи: «Хӧдан, дьбә кӧ әз ьм?»

²³ Әԝи ль ԝан вәгәрʼанд у гот: «Әԝе кӧ пәʼрийе Хԝә тʼәви Мьн тʼаседа кьр, әԝе нәмамийа Мьн бькә.

²⁴ Рʼаст Кӧрʼе Мерьв ԝе ӧса һәрʼә чаԝа кӧ бона Ԝи һатийә ньвисаре, ле ԝәй ль ԝи мәрьве кӧ нәмамийа Кӧрʼе Мерьв бькә! Ԝирʼа һе ԛәнщ бу кӧ әԝ ԛәт дьне нәкʼәта».

²⁵ Щьһудайе кӧ ԝе нәмамийа Ԝи бькьра, ле вәгәрʼанд у готе: «Дәрсдар, дьбә кӧ әз ьм?» Иса ԝирʼа гот: «Тә бь дәве хԝә гот».

Шива Хӧдан

²⁶ Аԝа гава ԝана һе нан дьхԝар, Иса нан һьлда шькьри да, кәркьр да шагьрта у гот: «Һан һьлдьн бьхԝьн. Әва бәдәна Мьн ә».

²⁷ Пәйрʼа кʼас һьлда шькьри да, да ԝан у ԝанарʼа гот: «Һун һʼәму жи жь ве вәхԝьн,

²⁸ әва хуна Мьн ә бона пәймане, кӧ бона бахшандьна гӧнед гәләка те рʼетьне.

²⁹ Ле Әз ԝәрʼа дьбежьм, иди Әз жь вьр шунда тʼӧ щар жь ве мәйа тьрийе вәнахԝьм, һʼәта ԝе рʼожа кӧ Әзе тʼәви ԝә Пʼадшатийа Баве Хԝәда жь йа ну вәхԝьм».

³⁰ Паше ԝана зәбурәк стьра, дәркʼәтьн чунә чʼийайе Зәйтʼуне.

Иса дәрһәԛа инкʼарийа Пәтрусда дьбежә

³¹ Һьнге Иса ԝанарʼа гот: «Ишәв һун һʼәмуйе жи жь Мьн пʼьшк бьн һәрʼьн, чьмки ньвисар ә: ‹Әзе ль шьвен хьм у пәзе жи бәла-бәлайи бә›.

³² Ле гава кӧ Әз жь мьрьне рʼабьм, Әзе бәри ԝә һәрʼьмә Щәлиле».

³³ Пәтрус ле вәгәрʼанд у готе: «Һәгәр һʼәму жи жь Тә пʼьшк бьн һәрʼьн, ле әз тʼӧ щар жь Тә начьм».

³⁴ Иса ԝирʼа гот: «Әз рʼаст тәрʼа дьбежьм, һәма ишәв һе бәри бангдана дик, те се щара Мьн инкʼар ки».

³⁵ Пәтрус Ԝирʼа гот: «Һәгәр щи бе, әзе тʼәви Тә бьмьрьм жи, ле тʼӧ щар Тә инкʼар накьм». Һʼәму шагьрта жи ӧса гот.

Иса ль Гетшәманийе дӧа дькә

³⁶ Һьнге Иса тʼәви ԝан чу ԝи щийе кӧ жерʼа Гетшәмани дьбежьн у шагьртарʼа гот: «Вьра рʼунен, һʼәта Әз һәрʼьм дәра һан дӧа бькьм».

³⁷ Әԝи тʼәви Хԝә Пәтрус у һәр дӧ кӧрʼед Зәбәди һьлдан, кʼәсәр һате у бәр Хԝә кʼәт.

³⁸ Һьнге Иса ԝанарʼа гот: «Дьле Мьн һаԛас дәрд у кʼәдәр ә, мина бәр мьрьне. Вьра бьминьн у тʼәви Мьн һʼьшйар бьн».

³⁹ Һьнәки пешда чу Хԝә дәвәрʼуйа авит дӧа кьр у гот: «Баве Мьн! Һәгәр дьбә, бьра әв кʼаса щәфе сәр Мьнрʼа дәрбаз бә. Ле нә кӧ чаԝа Әз дьхԝазьм, ле бьра хԝәстьна Тә бә».

⁴⁰ Паше һатә щәм шагьрта, әԝ рʼазайи дитьн у готә Пәтрус: «Ԝә нькарьбу кӧ сьһʼәтәке һун тʼәви Мьн һʼьшйар бьмана?

⁴¹ Һʼьшйар бьминьн у дӧа бькьн, ԝәки һун нәкʼәвьнә нава щерʼьбандьне. Бәле рʼӧһʼ рʼази йә, ле бәдән сьст ә».

⁴² Щарәкә дьн жи Иса чу дӧа кьр у гот: «Баве Мьн! Һәгәр набә кӧ әв кʼаса щәфе жь Мьн дәрбаз бә һʼәта кӧ Әз ԝе вәнәхԝьм, бьра хԝәстьна Тә бә».

⁴³ Иса һат, әԝ диса хәԝеда дитьн, чʼәʼвед ԝан жь хәԝе вәнәдьбун.

⁴⁴ У әԝ һьштьн чу, щара сьсийа дӧа кьр, диса әԝ хәбәр готьн.

⁴⁵ Һьнге һатә щәм шагьрта у ԝанарʼа гот: «Һун һәла һе рʼазайи нә у рʼьһʼәт дьбьн? Ва ԝәхт перʼа гьһишт кӧ Кӧрʼе Мерьв бькʼәвә дәсте гӧнәкʼара.

⁴⁶ Рʼабьн әм һәрʼьн. Ва йә әԝе кӧ нәмамийа Мьн дькә незик бу».

Гьртьна Иса

⁴⁷ Әԝи һе хәбәр дьда, ньшкева Щьһудайе кӧ йәк жь ԝан донздәһа бу һат. Әԝи тʼәви хԝә жь алийе сәрәкед кʼаһина у рʼуспийед щьмәʼтеда әʼлаләтәкә гьран анибу, бь дара у шура.

⁴⁸ Аԝа нәмаме Ԝи әʼшәрәт дабу ԝан у готьбу: «Әз кʼижани кӧ рʼамусьм, Әԝ ә, Ԝи бьгьрьн».

⁴⁹ Һьнге Щьһуда незики Иса бу у готе: «Сьлав ль Тә, дәрсдар!» у рʼамуса.

⁵⁰ Иса ԝирʼа гот: «Һәвал, те чь бьки зу бькә!» Ԝе гаве әԝ пешда һатьн, дәст авитьнә Иса у Әԝ гьртьн.

⁵¹ Ньшкева йәки жь әԝед кӧ тʼәви Иса бу, рʼабу шуре хԝә кʼьшанд ль хӧламе сәрәккʼаһин хьст у гӧһе ԝи пәканд.

⁵² Ԝе гаве Иса ԝирʼа гот: «Шуре хԝә бькә щи. Кʼи кӧ шур һьлтинә, әԝе бь шур һәрʼә.

⁵³ Тә тʼьре Әз нькарьм жь Баве Хԝә бьхԝазьм ԝәки перʼа-перʼа донздәһ ордийа зедәтьр мьлйакʼәт бьгьһинә Мьн?

⁵⁴ Ле ньвисар ԝе чаԝа бенә сери кӧ дьбежьн, гәрәке һʼәму аһа бьн?»

⁵⁵ Ԝе гаве Иса әʼлаләтерʼа гот: «Те бежи ԝә сәр ԛачахәкида гьртийә, кӧ һун бь дара у шура һатьнә Мьн бьгьрьн? Нә Әз һәр рʼож тʼәви ԝә пʼарьстгәһеда рʼудьньштьм Мьн һун һин дькьрьн, ле ԝә Әз нәдьгьртьм.

⁵⁶ Ле әв һʼәму тьшт ԛәԝьмин, кӧ ньвисаред пʼехәмбәра бенә сери». Ԝе дәме һʼәму шагьрта Әԝ һьштьн у рʼәвин.

Иса ль бәр щьвина гьрәгьра

⁵⁷ Йед кӧ Иса гьртьн, Әԝ бьрьнә щәм Ԛәйафайе сәрәккʼаһин, ль ԝи щийе кӧ ԛанунзан у рʼуспи щьвийабун.

⁵⁸ Пәтрус жи дурва һʼәта һʼәԝша сәрәккʼаһин пʼе-пʼе пәй Ԝи чу кʼәтә һьндӧрʼ у ль нав нобәдара рʼуньшт, кӧ бьзаньбә ахьри ԝе чаԝа бә.

⁵⁹ Сәрәкед кʼаһина у тʼәмамийа щьвина гьрәгьра жи мьԛабьли Иса шәʼдәтикә дәрәԝ дьгәрʼийан кӧ Ԝи бькӧжьн,

⁶⁰ ле нәдитьн. Гәләк шәʼдед дәрәԝ жи һатьн, диса нәдитьн. Паше дӧ шәʼдед дәрәԝ пешда һатьн

⁶¹ у готьн: «Әви гот: ‹Әз дькарьм пʼарьстгәһа Хԝәде һьлшиньм у нава се рʼожада диса ԝе чекьм›».

⁶² Сәрәккʼаһин рʼабу сәр пʼийа у Ԝирʼа гот: «Бона ван шәʼдәтийа кӧ әвана мьԛабьли Тә дьдьн Тӧ чьма щабәке нади?»

⁶³ Ле Иса дәнге Хԝә нәкьр. Сәрәккʼаһин диса Ԝирʼа гот: «Әз Тә бь Хԝәдейе сах дьдьмә сонде. Мәрʼа бежә, Тӧ йи Мәсиһ, Кӧрʼе Хԝәде?»

⁶⁴ Иса готә ԝи: «Тә бь дәве хԝә гот. Ле Әз ԝәрʼа дьбежьм, жь вьр шунда һуне Кӧрʼе Мерьв ль кʼеләка Йе Һәри Зор, ль мьле Ԝийи рʼасте рʼуньшти у ль сәр әʼԝред әʼзмен те бьбиньн».

⁶⁵ Һьнге сәрәккʼаһин кʼьнщед хԝә ԛәлаштьн у гот: «Әва Хԝәде беһӧрмәт дькә! Иди шәʼдә чи мәрʼа нә? Ва ԝә бьһист Әԝи чаԝа Хԝәде беһӧрмәт кьр!

⁶⁶ Ԝәва чаԝа хӧйа дькә?» Ԝана жи ле вәгәрʼанд у готьн: «Ԝирʼа кӧштьн дькʼәвә».

⁶⁷ Ԝе гаве тʼуйи рʼуйе Ԝи кьрьн, бь кʼӧлма лехьстьн, һьнәка жи шәмаԛ ле дьдан

⁶⁸ у дьготьне: «Мәсиһ, пʼехәмбәртийе мәрʼа бькә, кʼа кʼи бу кӧ Тә хьст?»

Пәтрус Иса инкʼар дькә

⁶⁹ Ԝи чахи Пәтрус дәрва ль һʼәԝшеда рʼуньштьбу. Щарик һатә щәм ԝи у готе: «Тӧ жи тʼәви Исайе Щәлиле буйи».

⁷⁰ Ле әԝи ль бәр һʼәмуйа инкʼар кьр у гот: «Әз ньзаньм тӧ чь дьбежи».

⁷¹ Чахе әԝ чу бәр дәргәһ, йәкә дьн әԝ дит у готә әԝед кӧ ль ԝьр бун: «Әве һан жи тʼәви Исайе Ньсрәте бу».

⁷² Әԝи диса бь сонд инкʼар кьр гот: «Әз ԝи мәрьви нас накьм».

⁷³ Хеләке шунда әԝед кӧ ль ԝьр бун чунә щәм Пәтрус у готьне: «Һәбә-тʼӧнәбә тӧ жи жь ԝан и, чьмки хәбәрдана тә тә дьфьрошә».

⁷⁴ Һьнге әԝи ньфьрʼ хԝә кьр, сонд хԝар у гот: «Әз ԝи мәрьви нас накьм». Ԝе гаве дик банг да

⁷⁵ у Пәтрус әԝ готьна Иса ани бира хԝә кӧ ԝирʼа готьбу: «Бәри бангдана дик, те се щара Мьн инкʼар ки». Дәркʼәтә дәрва у кʼәлә-кʼәл гьрийа.