Metta 24 - Пәймана Ну (Инщил)

Иса пешда дәрһәԛа ԝеранбуна пʼарьстгәһеда дьбежә

¹ Гава Иса жь пʼарьстгәһе дәркʼәт чу, шагьрт чунә щәм Ԝи, кӧ авайийед пʼарьстгәһе нишани Ԝи кьн.

² Иса ԝанрʼа гот: «Һун ван һʼәмуйа дьбиньн? Әз рʼаст ԝәрʼа дьбежьм, әв һʼәмуйе жи ԝеран бьн, ль вьр кәвьре ль сәр кәвьр ԛәт нәминә!»

Тәнгаси у зерандьн

³ Чахе Әԝ сәр чʼийайе Зәйтʼуне рʼуньштьбу, шагьртед Ԝи тʼәне һатьнә щәм Ԝи у же пьрсин: «Бежә мә, әв тьшт ԝе кʼәнге бьԛәԝьмьн? У нишана һатьна Тә у ахьрийа ве дьнйайе ԝе чаԝа бә?»

⁴ Иса щаба ԝан да у гот: «Һаш жь хԝә һәбьн, кӧ тʼӧ кәс ԝә нәхапинә,

⁵ чьмки гәләк ԝе пе наве Мьн бен у бежьн: ‹Әз ьм Мәсиһ› у ԝе гәләка бьхальфиньн.

⁶ Һуне дәнге шәрʼа у бәʼса шәрʼа бьбьһен, ле һаш жь хԝә һәбьн кӧ һун хԝә ӧнда нәкьн. Гәрәке әв тьшт бьԛәԝьмьн, ле әԝ һе нә ахьри йә.

⁷ Мьләте рʼабә ль сәр мьләт, пʼадшати ль сәр пʼадшатийе, щи-щийа ԝе хәлайи-щәлайе у әʼрдһʼәже бьбьн.

⁸ Ле әв һʼәму мина еша кʼӧлфәте йә, кӧ дәстпедькә пе дьгьрә.

⁹ Һьнге ԝе ԝә бьдьнә щәфе, ԝә бькӧжьн у бона наве Мьн бәр чʼәʼве һʼәму мьләта рʼәш бьн.

¹⁰ Һьнге гәләке жь рʼе бькʼәвьн, нәмамийа һәвдӧ бькьн у бәр чʼәʼве һәв бькʼәвьн.

¹¹ Гәләк пʼехәмбәред дәрәԝ ԝе дәркʼәвьн у гәләка бьхальфиньн.

¹² Жь дәст зедәбуна нәһәԛийе һʼьзкьрьна гәләка ԝе сар бә.

¹³ Ле кʼи кӧ һʼәта хьлазийе тәйах кә, әԝе хьлаз бә.

¹⁴ У әв Мьзгинийа Пʼадшатийе ԝе ль нав тʼәмамийа дьнйайе бе даннасинкьрьне, кӧ һʼәму мьләтарʼа бьбә шәʼдәти у һьнге хьлази ԝе бе.

Һʼәрамийа Ԝеранкьрьне

¹⁵ Чахе һун ‹һʼәрамийа ԝеранкьрьне› щийе пирозда сәкьни бьбиньн, чаԝа кӧ Данийел пʼехәмбәр гот», (әԝе кӧ дьхунә бьра фәʼм бькә),

¹⁶ «һьнге әԝед кӧ Щьһустанеда нә бьра бьрʼәвьнә чʼийа.

¹⁷ Әԝе кӧ сәр хани йә бьра жорда нәйе хԝаре кӧ жь мала хԝә тьштәки һьлдә.

¹⁸ У әԝе кӧ кʼәԝшенда йә бьра вәнәгәрʼә кӧ пʼоте хԝә һьлдә.

¹⁹ Ле ԝәй ль һʼәмла у дәстдәргуша ԝан рʼожада!

²⁰ Дӧа бькьн, кӧ рʼәва ԝә нәкʼәвә зьвьстане, йан жи рʼожа шәмийе.

²¹ Чьмки һьнге тәнгасикә ӧса мәзьн ԝе бьбә, кӧ жь дәстпебуна дьнйайе һʼәта ньһа мина ԝе нәбуйә у нә жи ԝе бьбә.

²² Һәгәр әԝ рʼож кьн нәбуна, тʼӧ кәс хьлаз нәдьбу, ле бона хатьре бьжартийа әԝ рʼоже кьн бьн.

²³ Һьнге, һәгәр йәк ԝәрʼа бежә: ‹Ва йә Мәсиһ›, йан жи ‹Ԝа йә›, баԝәр нәкьн.

²⁴ Чьмки мәсиһ у пʼехәмбәред дәрәԝ ԝе дәрен, нишан у кʼәрәмәтед мәзьн бькьн, кӧ бькарьбьн бьжартийед Хԝәде жи бьхальфиньн.

²⁵ Ва йә Мьн пешда ԝәрʼа гот.

²⁶ Һәгәр әԝана ԝәрʼа бежьн: ‹Ԝа йә Мәсиһ бәрʼийеда йә›, дәрнәкʼәвьн, йан: ‹Ва йә Әԝ фьлан одеда йә›, баԝәр нәкьн.

²⁷ Чьмки чаԝа бьруск жь рʼоһьлате бьрԛ дьдә у һʼәта рʼоавайе хӧйа дьбә, ԝе һатьна Кӧрʼе Мерьв жи ӧса бә.

²⁸ Бәрәтʼә кʼидәре һәбә, тәйре жи ль ԝьр бьщьвьн.

Һатьна Кӧрʼе Мерьв

²⁹ Ль пәй тәнгасийа ԝан рʼожарʼа, рʼуйе рʼойе ԝе бе гьртьне у һиве жи рʼонайа хԝә нәдә, стәйрке жь әʼзмен бькʼәвьн у тʼопед әʼзмана ԝе жь рʼийед хԝә дәрен.

³⁰ Һьнге нишана Кӧрʼе Мерьв ԝе ль әʼзмен хӧйа бә у һʼәму мьләтед дьнйайе ԝе шине бькьн, гава бьбиньн Кӧрʼе Мерьв ль сәр әʼԝред әʼзмен бь ԛәԝат у рʼумәта мәзьн те.

³¹ Әԝе мьлйакʼәтед Хԝә бь борʼийа дәнге бьльнд бьшинә у ԝе бьжартийед Ԝи жь һәр чар ԛӧлба бәрәв кьн, жь пʼәрʼәки әʼзмана һʼәта пʼәрʼе дьн.

Дәрса дара һежире

³² Жь дара һежире дәрсәке һин бьн. Чахе чʼьԛьлед ԝе тәрʼ дьбьн у бәлгед ԝе дьбьшкьвьн, иди һун заньн кӧ һавин незик ә.

³³ Ӧса жи гава һун ван һʼәму тьшта бьбиньн, бьзаньбьн кӧ әв тьшт незик ә, ль бәр шемике йә.

³⁴ Әз рʼаст ԝәрʼа дьбежьм, әва ньсьла дәрбаз набә, һʼәта кӧ әв һʼәму тьшт нәԛәԝьмьн.

³⁵ Әʼрд у әʼзмане дәрбаз бьн, ле готьнед Мьн тʼӧ щар дәрбаз набьн.

Рʼож у сьһʼәт нә әʼйан ә

³⁶ Ле бона ԝе рʼоже у ԝе сьһʼәте тʼӧ кәс ньзанә, нә мьлйакʼәтед әʼзмана, нә жи Кӧрʼ, ле тʼәне Бав.

³⁷ Чаԝа кӧ рʼожед Нӧһда ԛәԝьми, һатьна Кӧрʼе Мерьв жи ԝе ӧса бьԛәԝьмә.

³⁸ Чаԝа кӧ ԝан рʼожед бәри лейийе мәрьва дьхԝарьн, вәдьхԝарьн, дьзәԝьщин у мер дькьрьн, һʼәта ԝе рʼожа кӧ Нӧһ кʼәтә гәмийе

³⁹ у мәрьв пе нәһʼәсийан, һʼәта кӧ лейи рʼабу у һʼәму жи хәньԛандьн. Һатьна Кӧрʼе Мерьв жи ԝе ӧса бә.

⁴⁰ Һьнге дӧ мәрьв ԝе нав әʼрде хԝәда бьн, йәке бе һьлдане у йе дьне бе һьштьне.

⁴¹ У дӧ кʼӧлфәте сәр дәстарʼәки бьн, йәке бе һьлдане, йа дьн бе һьштьне.

⁴² Аԝа һʼьшйар бьминьн, чьмки һун ньзаньн Хӧдане ԝәйе кʼижан рʼоже бе.

⁴³ Ле ве йәке бьзаньбьн. Һәгәр хԝәйе мале бьзаньбуйа кӧ дьзе кʼижан дәма шәве бьһата, ԝе һʼьшйар бьма у нәһьшта кӧ мала ԝи дәрәвәкьра.

⁴⁴ Бона ве йәке һун жи һазьр бьн, чьмки Кӧрʼе Мерьв ԝе сьһʼәтәкә ӧсада бе, кӧ һун нә чʼәʼвньһерʼи нә.

Хӧламе амьн у хӧламе беамьн

⁴⁵ Аԝа кʼи йә әԝ хӧламе амьн у сәрԝахт, кӧ ахайе ԝи әԝ сәр хӧламед хԝә сәрԝер кʼьфш кьр, кӧ ԝәхтда хԝарьна ԝан бьдә ԝан?

⁴⁶ Хԝәзи ль ԝи хӧлами, кӧ чахе ахайе ԝи бе, әԝи ӧса бьбинә.

⁴⁷ Әз рʼаст ԝәрʼа дьбежьм, әԝе ԝи бькә сәрԝере тʼәмамийа һәбука хԝә.

⁴⁸ Ле һәгәр хӧламе хьраб дьле хԝәда бежә: ‹Ахайе мьн һатьна хԝә дәрәнги ехьст›

⁴⁹ у дәстпекә ль хӧлам-һәвалед хԝә хә у тʼәви йед сәрхԝәш бьхԝә у вәхԝә,

⁵⁰ ахайе ԝи хӧлами ԝе рʼожәкә ӧса бе, кӧ әԝ нә һивийе йә у сьһʼәтәкә ӧса, кӧ әԝ ньзанә.

⁵¹ Әԝе ԝи ԛәт-ԛәти кә у пʼара ԝи ԝе тʼәви дӧрʼуйа кә. Ль ԝьр ԝе бьбә гьри у чʼьркә-чʼьрка дьрана.