Metta 21 - Пәймана Ну (Инщил)

Иса бь рʼумәт дькʼәвә Оршәлиме

¹ Гава әԝ незики Оршәлиме бун, һатьнә гӧнде Бәйтфаще, чʼийайе Зәйтʼуне. Һьнге Иса дӧ шагьртед Хԝә шандьн

² у ԝанарʼа гот: «Һәрʼьнә ԝи гӧнде пешбәри хԝә у һуне кʼәрәкә гьредайи щәʼшьк бәр бьбиньн. Ԝан кʼәра вәкьн биньнә щәм Мьн.

³ Һәгәр йәк ԝәрʼа тьштәки бежә, һун бежьн: ‹Хӧданрʼа лазьм ьн› у әԝе зу ԝан бьшинә».

⁴ Әва ӧса ԛәԝьми, кӧ әԝ готьна бь заре пʼехәмбәр бе сери:

⁵ «Бежьнә бажаре Сийоне: ‹Ва Пʼадше тә те щәм тә, бәрбьһер, ль кʼәре у щәʼшька кʼәре сийарбуйи›».

⁶ Шагьрт чун у чаԝа кӧ Иса тʼәми дабу ԝан ӧса кьрьн.

⁷ Кʼәр у щәʼшьк анин, кʼьнщед хԝә авитьнә сәр ԝан у Әԝ ль ԝан сийар бу.

⁸ Әʼлаләтәкә гьран кʼьнщед хԝә сәр рʼе рʼадьхьстьн, һьнәка жи чʼьԛьле дара дьбьрʼин у сәр рʼе рʼадьхьстьн.

⁹ Әʼлаләта кӧ ль пешийа Ԝи у ль пәй Ԝи дьчу, дькьрә ԛирʼин у дьгот: «Һосанна Кӧрʼе Даԝьдрʼа! Бьмбарәк ә Әԝе кӧ бь наве Хӧдан те! Һосанна Йе Һәри Жорьнрʼа!»

¹⁰ Гава Иса кʼәтә Оршәлиме, тʼәмамийа бажер һʼәжийа у пьрсин: «Әв кʼи йә?»

¹¹ Әʼлаләте гот: «Әва Исайе Пʼехәмбәр ә, жь Ньсрәта Щәлиле».

Иса пʼарьстгәһеда

¹² Иса кʼәтә пʼарьстгәһе у һʼәмуйед кӧ пʼарьстгәһеда тʼӧщарәти дькьрьн дәрхьстьн. Тʼәхтед пʼәрәгӧһерʼа у кʼӧрсийед кәвоткфьроша ԝәлгәрʼандьн

¹³ у готә ԝан: «Ньвисар ә: ‹Мала Мьн мала дӧа ԝе бе һʼәсабе›, ле ԝә әԝ кьрийә ‹шкәфта ԛачаха›!»

¹⁴ Ль ԝьр пʼарьстгәһеда кор у сәԛәт һатьнә щәм Ԝи у Әԝи әԝ ԛәнщ кьрьн.

¹⁵ Ле гава кӧ сәрәкед кʼаһина у ԛанунзана әԝ кʼәрәмәтед кӧ Иса кьрьн дитьн у ӧса жи әԝ зарʼед кӧ пʼарьстгәһеда дькьрьнә ԛирʼин у дьготьн: «Һосанна Кӧрʼе Даԝьдрʼа!» һерс кʼәтьн

¹⁶ у готьнә Ԝи: «Тӧ дьбьһейи әв чь дьбежьн?» Иса ԝанарʼа гот: «Бәле. Ԝә ԛәт нәхԝәндийә кӧ: ‹Тә бь заред тʼьфал у дәргуша пәсьндайин ани сери›?»

¹⁷ У Әԝи әԝ ль ԝьр һьштьн, жь бажер дәркʼәт, чу Бәйтанйайе у шәв ль ԝьр ма.

Дара һежирейә һʼьшкбуйи

¹⁸ Сьбәһе зу, чахе Әԝ вәгәрʼийа бажер, бьрʼчи бу.

¹⁹ Сәр рʼе дарәкә һежире дит, незики ԝе бу, ле пештьри бәлга тьштәки дьн пева нәдит у дарерʼа гот: «Жь вьр шунда тӧ һʼәта-һʼәтайе бәр нәди!» У дар перʼа-перʼа һʼьшк бу.

²⁰ Гава шагьрта әв йәк дит, зәндәгьрти ман у готьн: «Чаԝа әв дара һежире перʼа-перʼа һʼьшк бу?»

²¹ Иса щаба ԝан да у гот: «Әз рʼаст ԝәрʼа дьбежьм, һәгәр баԝәрийа ԝә һәбә у дӧдьли нәбьн, һуне нә тʼәне чь кӧ һатә сәре ве дара һежире бькьн, ле һәгәр һун ви чʼийайирʼа жи бежьн: ‹Рʼабә хԝә бавежә бәʼре›, ԝе бьбә.

²² Һәгәр баԝәрийа ԝә һәбә, һун чь кӧ нава дӧада бьхԝазьн, һуне бьстиньн».

Пьрса дәрһәԛа һʼӧкӧме Исада

²³ Гава Әԝ һатә пʼарьстгәһе у щьмәʼт һин кьр, сәрәкед кʼаһина у рʼуспийед щьмәʼте һатьнә щәм Ԝи у готьне: «Тӧ бь чь һʼӧкӧми ван кьра дьки? У кʼе әв һʼӧкӧм дайә Тә?»

²⁴ Иса ль ԝан вәгәрʼанд у гот: «Әзе жи тьштәки жь ԝә бьпьрсьм. Һәгәр ԝә щаба Мьн да, Әзе жи ԝәрʼа бежьм Әз бь чь һʼӧкӧми ван кьра дькьм.

²⁵ Һʼӧкӧме ньхӧмандьна Йуһʼәнна жь кʼӧ бу, жь әʼзмен бу, йан жь мәрьва бу?» Әԝана нав һәвда шеԝьрин у готьн: «Һәгәр әм бежьн: ‹Жь әʼзмен бу›, Әԝе мәрʼа бежә: ‹Ле ԝә чьма әԝ баԝәр нәкьр?›

²⁶ Ле һәгәр әм бежьн: ‹Жь мәрьва бу›, әм жь әʼлаләте дьтьрсьн, чьмки һʼәмуйа ԛәбул дькьр кӧ Йуһʼәнна пʼехәмбәр бу».

²⁷ Ԝана щаба Иса да у готьн: «Әм ньзаньн». Әԝи ԝанрʼа гот: «Әз жи ԝәрʼа набежьм кӧ Әз бь чь һʼӧкӧми ван кьра дькьм.

Мәсәла дӧ кӧрʼа

²⁸ Һун чаԝа тʼәхмин дькьн? Дӧ кӧрʼед мәрьвәки һәбун. Әԝи кӧрʼе хԝәйи мәзьнрʼа гот: ‹Лаԝо! Иро һәрʼә нав рʼәз, шьхӧл бькә›.

²⁹ Әԝи ле вәгәрʼанд у гот: ‹Әз начьм›, ле паше пʼошман бу у чу.

³⁰ Һьнге бав чу щәм йе дьн әԝи жи аһа гот: ‹Бәле, әзе һәрʼьм баво›, ле нәчу.

³¹ Ньһа жь ван һәр дӧ кӧрʼа кʼижани гӧрʼа баве хԝә кьр?» Ԝана готә Ԝи: «Йе мәзьн». Иса жи готә ԝан: «Әз рʼаст ԝәрʼа дьбежьм, кӧ хәрщгьр у чʼәʼвдәр ԝе бәри ԝә бькʼәвьнә Пʼадшатийа Хԝәде.

³² Чьмки Йуһʼәнна һат кӧ рʼийа рʼастийе нишани ԝә кә, ԝә әԝ баԝәр нәкьр, ле хәрщгьр у чʼәʼвдәра әԝ баԝәр кьрьн. Ԝә әв тьшт дит жи, ле диса һун ль хԝә мӧкӧрʼ нәһатьн, кӧ ԝә әԝ баԝәр бькьра.

Мәсәла рʼәзе тьрийа у рʼәзвана

³³ Мәсәләкә дьн жи бьбьһен. Мәрьвәки хԝәйимьлкʼ һәбу, рʼәзе тьрийа дани, дора ԝе сур кьр һʼәԝзәки тьриһʼьнщьрʼандьне теда кʼола, һеланәкә нобәдара чекьр у әԝ бь кʼьре да рʼәзвана, чу ԝәлатәки дьн.

³⁴ Гава ԝәхте бәрдайине незик бу, әԝи хӧламед хԝә шандьнә щәм рʼәзвана, ԝәки жь бәре рʼәзе ԝи жерʼа биньн.

³⁵ Рʼәзвана хӧламед ԝи гьртьн, йәк кʼӧтан, йе дьн кӧштьн у йәки дьн жи данә бәр кәвьра.

³⁶ Әԝи хӧламнә дьн шандьн, жь йед пешьн гәләктьр у ԝана ӧса жи анинә сәре ԝан.

³⁷ Ахьрийе, кӧрʼе хԝә шандә щәм ԝан у гот: ‹Һьлбәт ԝе жь кӧрʼе мьн шәрм бькьн›.

³⁸ Ле гава рʼәзван чʼәʼв кӧрʼе ԝи кʼәтьн, һәврʼа готьн: ‹Әв ԝаре ԝи йә. Ԝәрьн әм ви бькӧжьн у бьбьнә хԝәйе миратʼа ԝи›.

³⁹ У әԝ гьртьн жь рʼәз дәрхьстьнә дәр у кӧштьн.

⁴⁰ Ле гава хԝәйе рʼәз бе, ԝе чь сәре ԝан рʼәзвана бькә?»

⁴¹ Готьнә Ԝи: «Ԝе ԛьрʼа ԝан нәһәԛа бинә у рʼәз бьдә рʼәзванед ӧса, йед кӧ ԝе ԝәхтда бәре рʼәзе ԝи бьдьне».

⁴² Иса готә ԝан: «Ԝә ньвисареда ԛәт нәхԝәндийә? ‹Әԝ кәвьре кӧ һоста тʼәхсир кьр, әԝ бу сәре әʼнишке. Әв йәк жь алийе Хӧданда ԛәԝьми у ль бәр чʼәʼве мә һʼәйр-һʼӧжмәкʼар ә!›

⁴³ Бона ве йәке Әз ԝәрʼа дьбежьм, кӧ Пʼадшатийа Хԝәде ԝе жь ԝә бе стандьне у мьләтәки ӧсарʼа бе дайине, ԝәки бона Ԝи бәр бинә.

⁴⁴ Кʼи кӧ бькʼәвә сәр ви кәвьри, ԝе һурдәхԝәши бә у әԝ кәвьр бькʼәвә сәр кʼе, ԝе ԝи бьһʼьнщьрʼинә».

⁴⁵ Гава сәрәкед кʼаһина у ферьсийа мәсәлед Ԝи бьһистьн, фәʼм кьрьн кӧ Әԝ бона ԝан дьбежә.

⁴⁶ Кьрьн кӧ Ԝи бьгьрьн, ле жь әʼлаләте тьрсийан, чьмки Әԝ ԝәкә пʼехәмбәрәки ԛәбул дькьрьн.