Metta 2 - Пәймана Ну (Инщил)

Стәйрнасед рʼоһьлате

¹ Гава Иса Бәйтләһʼма Щьһустанеда, рʼожед пʼадшатийа Һеродәсда бу, һьнге чәнд стәйрнас жь рʼоһьлате һатьнә Оршәлиме

² у готьн: «Кʼане Пʼадше щьһуйайи кӧ гәрәке бьбуйа? Мә стәйрка Ԝи ль рʼоһьлате дит у әм һатьнә, кӧ сәре хԝә ль бәр Ԝи дайньн».

³ Гава Һеродәс пʼадша әв йәк бьһист, тʼәвиһәв бу у тʼәмамийа Оршәлиме жи перʼа.

⁴ Һьнге әԝи һʼәму ԛанунзанед щьмәʼте у сәрәкед кʼаһина щьвандьн у жь ԝан пьрси: «Кʼидәре гәрәке Мәсиһ бьбә?»

⁵ Ԝана жерʼа гот: «Бәйтләһʼма Щьһустанеда, чьмки бь дәсте пʼехәмбәра аһа ньвисар ә:

⁶ ‹Йа Бәйтләһʼма ԝәлате Щьһуда, тӧ ль нав сәрԝеред Щьһудайеда нә йе һәри бьчʼук и, чьмки Сәрԝерәке жь тә рʼабә, кӧ шьвантийе щьмәʼта Мьн Исраеле бькә›».

⁷ Һьнге Һеродәс дьзива гази стәйрнаса кьр у ԝәхте хӧйабуна стәйрке жь ԝан пе һʼәсийа.

⁸ Паше әԝ шандьнә Бәйтләһʼме у гот: «Һәрʼьн бона Кӧрʼьк әʼсәйи пе бьһʼәсьн. Чахе кӧ һун Ԝи бьбиньн, мьнрʼа бежьн, кӧ әз жи бем сәре хԝә ль бәр дайньм».

⁹ Гава ԝана әв тьшт жь пʼадше бьһист, чун. У ва йә әԝ стәйрка кӧ ль рʼоһьлате дитьбун пешийа ԝан чу, һʼәта сәр ԝи щийе кʼӧ Кӧрʼьк ле бу сәкьни.

¹⁰ Гава ԝана әԝ стәйрк дит, гәләки әшԛ у ша бун,

¹¹ чунә һьндӧрʼ, Кӧрʼьк тʼәви дийа Ԝи Мәрйәме дитьн, ль бәр Ԝи дәвәрʼу чун, сәре хԝә ль бәр данин у хьзнед хԝә вәкьрьн, пʼешкʼешед зерʼ, бьхуре әʼрәби у зьмьр данә Ԝи.

¹² Ле ԝан хәԝнеда әʼмьр станд, кӧ вәнәгәрʼьнә щәм Һеродәс, әԝ иди рʼекә дьнва чунә ԝәлате хԝә.

Рʼәва бәр бь Мьсьре

¹³ Гава кӧ әԝ жь ԝьр чун, ва мьлйакʼәтәки Хӧдан хәԝнеда Усьвва хӧйа бу у готе: «Рʼабә Кӧрʼьк у дийа Ԝи һьлдә бьрʼәвә Мьсьре. Ль ԝьр бьминә һʼәта кӧ әз тәрʼа бежьм, чьмки Һеродәсе Кӧрʼьк бьгәрʼә, кӧ Ԝи бькӧжә».

¹⁴ Усьв жи рʼабу Кӧрʼьк у дийа Ԝи һьлдан, шәв чунә Мьсьре

¹⁵ у һʼәта мьрьна Һеродәс әԝана ль ԝьр ман. Әв йәк аһа бу, кӧ әԝ готьна Хӧданә бь заре пʼехәмбәр һатьбу готьне бе сери: «Мьн жь Мьсьре гази Кӧрʼе Хԝә кьр».

Ԛьрʼа зарʼока

¹⁶ Гава Һеродәс дит кӧ әԝ жь стәйрнаса һатә хапандьне, гәләки һерс кʼәт. Әԝи әʼмьр кьр кӧ һʼәму зарʼокед кӧрʼинә ль Бәйтләһʼме у дор-бәре ԝе, йед дӧ сали у жь ԝан бьчʼуктьр һәбун, кӧ бенә кӧштьне, ль гора ԝи ԝәхте кӧ жь стәйрнаса пе һʼәсийа бу.

¹⁷ Һьнге әԝ готьна бь заре Йерәмийа пʼехәмбәр һатә сери:

¹⁸ «Жь Рʼамайе дәнгәк һат, дәнге гьри у шина гьран, Рʼаһел бона зарʼокед хԝә дьгьрийа у нәдьхԝәст кӧ бәр дьлада бен, чьмки иди зарʼок нәмабун».

Һатьна жь Мьсьре

¹⁹ Гава Һеродәс мьр, ва мьлйакʼәтәки Хӧдан ль Мьсьре хәԝнеда Усьвва хӧйа бу

²⁰ у готе: «Рʼабә, Кӧрʼьк у дийа Ԝи һьлдә у һәрʼә ԝәлате Исраеле, чьмки әԝед пәй Кӧрʼьк кʼәтьбун кӧ бькӧштана мьрьнә».

²¹ Усьв жи рʼабу, Кӧрʼьк у дийа Ԝи һьлдан, вәгәрʼийанә ԝәлате Исраеле.

²² Ле гава Усьв бьһист ԝәки Архелайо дәԝса баве хԝә, Һеродәс сәр Щьһустане буйә пʼадша, тьрсийа кӧ һәрʼә ԝьр. Һьнге хәԝнеда әʼмьр станд, кӧ һәрʼә алийе ԛәза Щәлиле.

²³ Әԝ жи чунә бажаре кӧ жерʼа Ньсрәт дьготьн ле һеԝьрин. Әв йәк аһа бу, кӧ әԝ готьна бь заре пʼехәмбәра бе сери кӧ дьбежә: «Әԝе ньсрәти бе готьне».