Metta 17 - Пәймана Ну (Инщил)

Шагьрт Иса нава нур у рʼумәтеда дьбиньн

¹ Пәй шәш рʼожарʼа Иса тʼәви Хԝә Пәтрус, Аԛуб у бьре ԝи Йуһʼәнна һьлдан у рʼакьрьнә чʼийаки бьльнд, ль ԝьр әԝ тʼәне бун.

² Һьнге рʼәнге Ԝи ль бәр чʼәʼве ԝан һатә гӧһастьне. Рʼуйе Ԝи мина тәʼве бьрьԛи у кʼьнщед Ԝи жи мина нуре чил-ԛәрԛаш бун.

³ Ньшкева Муса у Елйас ԝанва хӧйа бун у тʼәви Ԝи хәбәр дан.

⁴ Һьнге Пәтрус Исарʼа гот: «Хӧдан! Чаԝа рʼьнд ә кӧ әм вьр ьн! Һәгәр Тӧ бьхԝази, әзе се һʼолька ль ве дәре чекьм, йәке Тәрʼа, йәке Мусарʼа, йәке жи Елйасрʼа».

⁵ Әԝи һе хәбәр дьда, ньшкева әʼԝрәки рʼонайи һат у сәр ԝан кьрә си, дәнгәк жь әʼԝр һат у гот: «Әв ә Кӧрʼе Мьни дәлал, кӧ Әз же рʼази мә. Гӧһдарийа Ԝи бькьн!»

⁶ Гава шагьрта әԝ дәнг бьһист, дәвәрʼуйа чун у рʼьсасе әԝ гьртьн.

⁷ Ле Иса незики ԝан бу, дәст да ԝан у гот: «Рʼабьн, нәтьрсьн».

⁸ Ԝана жи сәре хԝә бьльнд кьр у пештьри Иса кәсәк нәдитьн.

⁹ Чахе жь чʼийе дьһатьнә хԝаре, Иса тʼәми да ԝан у гот: «Әԝ дитьна кӧ ԝә дит кәсирʼа нәбежьн, һʼәта кӧ Кӧрʼе Мерьв жь нав мьрийа рʼанәбә».

¹⁰ Шагьртед Ԝи же пьрсин: «Ле чьма ԛанунзан дьбежьн пешийе гәрәке Елйас бе?»

¹¹ Иса ль ԝан вәгәрʼанд у гот: «Рʼаст ә, пешийе Елйасе бе у һәр тьшти ԝе диса бинә щи.

¹² Ле Әз ԝәрʼа дьбежьм, кӧ Елйас һатийә жи, ле әԝ нас нәкьрьн у чаԝа кӧ хԝәстьн, ӧса сәре ԝи кьрьн. Ԝе ӧса жи сәре Кӧрʼе Мерьв бькьн».

¹³ Һьнге шагьрта фәʼм кьр, кӧ бона Йуһʼәннайе ньхӧмдар ԝанарʼа гот.

Иса кӧрʼькәки щьнакʼәти ԛәнщ дькә

¹⁴ Чахе һатьнә щәм әʼлаләте, мәрьвәк незики Иса бу, бәр чок да у готе:

¹⁵ «Хӧдан, ль кӧрʼе мьн ԝәрә рʼәʼме! Әԝ һиве дькʼәвә у гәләки щәфа дьбинә. Щарна дькʼәвә нава агьр у щарна жи нава аве.

¹⁶ Мьн әԝ ани щәм шагьртед Тә, ле ԝана нькарьбу әԝ ԛәнщ кьра».

¹⁷ Иса гот: «Ньсьле нәбаԝәр у хальфи! Һʼәта кʼәнге Әзе тʼәви ԝә бьм? Һʼәта кʼәнге Әзе ԝә сәбьр кьм? Әԝи биньнә вьр щәм Мьн».

¹⁸ Иса ле һьлат, щьн же дәркʼәт, кӧрʼьк перʼа-перʼа ԛәнщ бу.

¹⁹ Һьнге шагьрт тʼәне һатьнә щәм Иса у же пьрсин: «Мә чьма нькарьбу әԝ щьн дәрхьста?»

²⁰ Иса готә ԝан: «Бона кембаԝәрийа ԝә. Әз рʼаст ԝәрʼа дьбежьм, һәгәр баԝәрийа ԝә ԝәкә һʼәбәкә тʼохьме хәрдале һәбә, һуне ви чʼийайирʼа бежьн: ‹Жь вьр дәрбази ԝи али бә!› у ԝе дәрбаз бә. У бона ԝә тьштәки нәбуйине ԝе тʼӧнәбә.

²¹ Ле әв щьсьне һа пе тьштәки дьн дәрнайе, пештьри бь дӧа у бь рʼожийа».

Иса диса дәрһәԛа мьрьна хԝәда дьбежә

²² Гава шагьрт Щәлиледа щьвийан, Иса ԝанарʼа гот: «Кӧрʼе Мерьв ԝе бькʼәвә дәсте мәрьва,

²³ әԝе Ԝи бькӧжьн, ле рʼожа сьсийа ԝе рʼабә». У әԝана гәләки бәр хԝә кʼәтьн.

Хәрщдайина пʼарьстгәһе

²⁴ Чахе әԝ һатьнә Кәфәрнаһуме, хәрщгьред дӧзиве бона пʼарьстгәһе һатьнә щәм Пәтрус у готьне: «Дәрсдаре ԝә хәрще дӧзиве надә?»

²⁵ Әԝи гот: «Бәле». Чахе Пәтрус һатә мале, пешийе Иса жь ԝи пьрси: «Шьмһʼун! Тӧ чаԝа тʼәхмин дьки? Пʼадшед дьнйайе хәрщ йан бащ жь кʼе дьстиньн, жь бажарванед хԝә, йан жь хәриба?»

²⁶ Пәтрус готе: «Жь хәриба». Иса готә ԝи: «Кӧ ӧса йә бажарван аза нә.

²⁷ Ле ԝәки әм ван пʼьшк нәкьн, һәрʼә голе шәԝке бавеже у мәʼсийе пешьн кӧ дәрдькʼәвә, бьгьрә дәве ԝи вәкә у те наләки чарзиве бьбини. Әԝи һьлдә, дәԝса Мьн у хԝә бьдә ԝан».