Metta 14 - Пәймана Ну (Инщил)

Кӧштьна Йуһʼәннайе ньхӧмдар

¹ Һьнге Һеродәсе сәрԝере Щәлиле бона Иса бьһист,

² хӧламед хԝәрʼа гот: «Әва Йуһʼәннайе ньхӧмдар ә жь нав мьрийа рʼабуйә. Ләма жи пе ԝи кʼәрәмәт тенә кьрьне».

³ Чьмки Һеродәс Йуһʼәнна гьртьбу гьредабу у авитьбу кәле, рʼуйе Һеродийа жьна Филипойе бьре хԝәда.

⁴ Чьмки Йуһʼәнна Һеродәсрʼа чәнд щара готьбу: «Нә рʼаст ә кӧ тӧ Һеродийайе бьстини».

⁵ У Һеродәс жи дьхԝәст әԝ бькӧшта, ле жь щьмәʼте дьтьрсийа, чьмки щьмәʼте Йуһʼәнна чаԝа пʼехәмбәр ԛәбул дькьр.

⁶ Гава рʼожа буйина Һеродәс һат, ԛиза Һеродийайе шайийеда бона ԝан рʼәԛьси у дьле Һеродәс гәләки хԝәш һат.

⁷ Әԝи сонд хԝар у готә ԛизьке: «Тӧ чь бьхԝази әзе бьдьмә тә».

⁸ Ԛизьк жи жь дийа хԝә һатьбу ширәткьрьне у готе: «Кʼа ль вьр, сәр сьнийе сәре Йуһʼәннайе ньхӧмдар бьдә мьн».

⁹ Пʼадша бәр хԝә кʼәт, ле чьмки ль бәр тʼәглифкьрийа сонд хԝарьбу, әʼмьр кьр кӧ хԝәстьна ԝе бе дайине.

¹⁰ Әԝи шанд кәледа сәре Йуһʼәнна да лехьстьне

¹¹ у сәре ԝи ль сәр сьнийе анин данә кәчʼьке. Кәчʼьке жи дийа хԝәрʼа бьр.

¹² Һьнге шагьртед ԝи һатьн щьнйазе ԝи һьлдан у әԝ дәфьн кьрьн. Паше чун Исарʼа готьн.

Иса пенщ һʼәзара тʼер дькә

¹³ Гава Иса әв йәк бьһист, жь ԝе дәре бь ԛәйьке тʼәне чу щики хәԝлә. Ле гава әʼлаләте бьһист, жь бажара пәйа пәй Ԝи чун.

¹⁴ Чахе Иса жь ԛәйьке дәркʼәт у әʼлаләтәкә гьран дит, һьнге гӧне Ԝи ль ԝан һат у нәхԝәшед ԝан ԛәнщ кьрьн.

¹⁵ Бәре еваре шагьртед Ԝи һатьнә щәм у готьне: «Әв дәр щики хьки-хԝәли йә, иди дәрәнг ә. Изьна әʼлаләте бьдә кӧ һәрʼьнә гӧнда хԝәрʼа хӧрәк бькʼьрʼьн».

¹⁶ Ле Иса ԝанарʼа гот: «Нә һʼәԝщә йә кӧ әԝ һәрʼьн. Һун хӧрәк бьдьнә ԝан».

¹⁷ Ԝана ле вәгәрʼанд у готьне: «Ль вьр пештьри пенщ нан у дӧ мәʼсийа тьштәки мәйи майин тʼӧнә».

¹⁸ Әԝи ԝанарʼа гот: «Ԝан нан у мәʼсийа биньнә щәм Мьн».

¹⁹ Иса әʼмьр кьр кӧ әʼлаләт ль сәр шинайийе рʼунен. Әԝи һәр пенщ нан у һәр дӧ мәʼси һьлдан, бәре Хԝә әʼзменда кьр шькьри да у әԝ нан кәркьрьн. Паше да шагьрта, шагьрта жи да әʼлаләте.

²⁰ Һʼәмуйа жи хԝар тʼер бун у донздәһ сәлә жи тʼьжи һурькед бәрмайи бәрәв кьрьн.

²¹ Әԝед кӧ хԝарьн, пештьри жьн у зарʼа ԝәкә пенщ һʼәзар мери бун.

Иса пʼийа ль сәр аверʼа дьчә

²² Перʼа-перʼа Иса пʼейи сәр шагьрта кьр, кӧ бькʼәвьнә ԛәйьке у пешийа Ԝи дәрбази ԝи бәри голе бьн, һʼәта кӧ Хԝәха әʼлаләте вәрʼекә.

²³ Чахе Әԝи әʼлаләт вәрʼекьр, тʼәне рʼабу чу сәре чʼийе, кӧ дӧа бькә. Гава рʼо чу ава, Әԝ ль ԝьра тʼәне бу,

²⁴ ле ԛәйьк иди жь дәве голе дур кʼәтьбу у нава пелада бу, чьмки ба мьԛабьли ԝе бу.

²⁵ Ԛәрәбәрбанге Иса сәр голерʼа пәйа дьчу незики ԝан дьбу.

²⁶ Ле гава шагьрта дит кӧ Әԝ сәр голерʼа пәйа дьчә, бьздийан у готьнә һәв: «Әв хәйал ә!» У ԝана жь тьрса кьрә ԛирʼин.

²⁷ Ле Иса ԝе дәме дәнг да ԝан у гот: «Сәр хԝә бьн! Әз ьм! Нәтьрсьн!»

²⁸ Пәтрус ле вәгәрʼанд у готе: «Хӧдан, һәгәр Тӧ йи, әʼмьр кә кӧ әз сәр аверʼа бемә щәм Тә».

²⁹ Иса готе: «Ԝәрә!» Пәтрус жь ԛәйьке пәйа бу, сәр аверʼа чу, кӧ һәрʼә щәм Иса.

³⁰ Ле чахе әԝи байе ԛайим дит тьрсийа у иди ԝе нӧԛ буйа, кьрә ԛирʼин: «Хӧдан, мьн хьлаз кә!»

³¹ Ԝе дәме Иса дәсте Хԝә дьрежи ԝи кьр, әԝ гьрт у жерʼа гот: «Кембаԝәро! Чьма тӧ дӧдьли буйи?»

³² Чахе кʼәтьнә ԛәйьке, ба сәкьни.

³³ У әԝед ԛәйькеда сәре хԝә ль бәр Ԝи данин у готьне: «Рʼасти Тӧ Кӧрʼе Хԝәде йи».

Иса Щенисартеда нәхԝәша ԛәнщ дькә

³⁴ Гава әԝ дәрбази ԝи бәри голе бун, ль алийе Щенисартева гьһиштьнә бәже.

³⁵ Бьнәлийед ԝьр Әԝ нас кьрьн, шандьн тʼәмамийа дор-бәра, һʼәму нәхԝәш анинә щәм Ԝи.

³⁶ Ԝана һиви же дькьр кӧ тʼәне рʼишийед кʼьнще Ԝи кʼәвьн. У һʼәмуйед кӧ ле дькʼәтьн жь нәхԝәшийед хԝә ԛәнщ дьбун.