Metta 1 - Пәймана Ну (Инщил)

Рʼькʼьнйата Иса

¹ Әв ә рʼәԛәма рʼькʼьнйата Иса Мәсиһ, рʼькʼьнйата Даԝьд, рʼькʼьнйата Бьраһим:

² Бьраһимрʼа Исһаԛ бу, Исһаԛрʼа Аԛуб бу, Аԛубрʼа Щьһуда у бьрава бун,

³ Щьһударʼа Перес у Зәра бун, (наве дийа ԝан Тʼамар бу), Пересрʼа Һәсрун бу, Һәсрунрʼа Рʼам бу,

⁴ Рʼамрʼа Аминадав бу, Аминадаврʼа Нәһшон бу, Нәһшонрʼа Сәлмон бу,

⁵ Сәлмонрʼа Боԝаз бу, (наве дийа ԝи Рʼәхаб бу), Боԝазрʼа Овед бу, (наве дийа ԝи Рʼутʼ бу), Оведрʼа Йеша бу

⁶ у Йешарʼа Даԝьд пʼадша бу. Даԝьд пʼадшарʼа Сьлеман бу, (дийа ԝи бәре кʼӧлфәта Урийа бу),

⁷ Сьлеманрʼа Рʼәһобоԝам бу, Рʼәһобоԝамрʼа Әбийа бу, Әбийарʼа Асаф бу,

⁸ Асафрʼа Йеһошәфат бу, Йеһошәфатрʼа Йорам бу, Йорамрʼа Узийа бу,

⁹ Узийарʼа Йотам бу, Йотамрʼа Аһаз бу, Аһазрʼа Һьзԛийа бу,

¹⁰ Һьзԛийарʼа Мьнашә бу, Мьнашәрʼа Амос бу, Амосрʼа Йошийа бу

¹¹ у Йошийарʼа Йәхонийа у бьрава бун. Ԝи чахи щьмәʼт сьргун чу Бабилоне.

¹² Ле пәй сьргунчуйина Бабилонеда, жь Йәхонийарʼа Шалтийел бу, Шалтийелрʼа Зәрубабәл бу,

¹³ Зәрубабәлрʼа Абийуд бу, Абийудрʼа Елйаԛим бу, Елйаԛимрʼа Азур бу,

¹⁴ Азуррʼа Садоԛ бу, Садоԛрʼа Ахин бу, Ахинрʼа Елйуд бу,

¹⁵ Елйудрʼа Елазар бу, Елазаррʼа Мәтан бу, Мәтанрʼа Аԛуб бу,

¹⁶ Аԛубрʼа Усьв бу, мере Мәрйәме, йа кӧ Иса жь ԝе ԝәльди, кӧ Мәсиһ те готьне.

¹⁷ Аԝа жь Бьраһим һʼәта Даԝьд чардәһ ньсьл дәрбаз бьбун, жь Даԝьд һʼәта сьргунчуйина Бабилонеда чардәһ ньсьл у жь сьргунчуйина Бабилонеда һʼәта Мәсиһ диса чардәһ ньсьл бун.

Буйина Иса

¹⁸ Буйина Иса Мәсиһ бь ви тьһәри бу. Мәрйәма дийа Ԝи Усьврʼа нишанкьри бу, ле дәргистийа хԝәда Мәрйәм бь һʼӧкӧме Рʼӧһʼе Пироз һʼәмлә кʼьфш бу.

¹⁹ Ле Усьве дәргистийе ԝе кӧ мәрьвәки рʼаст бу, нәхԝәст ԝе рʼурʼәш кә, фькьри кӧ дьзива ԝе бәрʼдә.

²⁰ Чахе Усьв һе сәр ве йәке дьфькьри, ва мьлйакʼәтәки Хӧдан хәԝнеда ԝива хӧйа бу у готе: «Усьве кӧрʼе Даԝьд! Нәтьрсә, кӧ дәргистийа хԝә Мәрйәме бьстини. Әԝи кӧ ԝе жь ԝе бьбә, әԝ жь Рʼӧһʼе Пироз ә.

²¹ Әԝе кӧрʼәки бинә у те наве Ԝи Иса дайни, чьмки Әԝе щьмәʼта Хԝә жь гӧнед ԝан хьлаз кә».

²² Әв һәр тьшт аһа ԛәԝьми, ԝәки әԝ готьна Хӧданә бь заре пʼехәмбәр бе сери кӧ дьбежә:

²³ «Ва ԛиза бькʼьр ԝе һʼәмлә бә, кӧрʼәке жерʼа бьбә у наве Ԝи Иммануйел ԝе дайньн», кӧ те фәʼмкьрьне: «Хԝәде тʼәви мә йә».

²⁴ Гава Усьв жь хәԝе һʼьшйар бу, әԝи ль гора готьна мьлйакʼәте Хӧдан кьр, дәргистийа хԝә станд.

²⁵ Ле сәре хԝә ԝерʼа данәни, һʼәта кӧ әԝ кӧрʼ жерʼа бу. У наве Ԝи Иса дани.