Marqos 8 - Пәймана Ну (Инщил)

Иса чар һʼәзара тʼер дькә

¹ Ԝан рʼожада диса әʼлаләтәкә гьран щьвийа. Тьштәки ԝани хԝарьне тʼӧнәбу кӧ бьхԝарана, Иса гази шагьртед Хԝә кьр у гот:

² «Гӧне Мьн ль ве әʼлаләте те. Әв се рʼож ә тʼәви Мьн ә у тьштәки ԝани хԝарьне тʼӧнә.

³ Һәгәр Әз ԝан бьрʼчи вәрʼекьмә малед ԝан, дьле ԝане рʼева хԝәва һәрʼә у жь ван һьнәк жи жь щийед дур һатьнә».

⁴ Шагьртед Ԝи ле вәгәрʼандьн у готьн: «Ль ве бәрʼийе әме жь кʼӧ һаԛас нан дәст хьн, кӧ ве щьмәʼте тʼер кьн?»

⁵ Иса жь ԝан пьрси: «Чәнд нанед ԝә һәнә?» Ԝана гот: «Һʼәфт».

⁶ Һьнге әʼмьр кьр кӧ әʼлаләт сәр әʼрде рʼуне. Әԝи әԝ һʼәфт нан һьлдан шькьри да, әԝ кәркьрьн у паше данә шагьртед Хԝә, кӧ дайньнә бәр әʼлаләте. Ԝана әԝ данинә бәр ԝан.

⁷ У чәнд мәʼсийед ԝанә һур жи һәбун. Иса бона ԝан жи шькьри да у гот: «Ван жи дайньнә бәр әʼлаләте».

⁸ Ԝана хԝар у тʼер бун. Паше һʼәфт зәмбил жь һурькед бәрмайи бәрәв кьрьн.

⁹ Әԝед кӧ хԝарьн, ԝәкә чар һʼәзар мәрьва бун. Гава кӧ Иса әԝ вәрʼекьрьн,

¹⁰ перʼа-перʼа тʼәви шагьртед Хԝә кʼәтә ԛәйьке у чунә ԛәза Далманутайе.

Кʼәрәмәтәке чаԝа нишан жь әʼзмана дьхԝазьн

¹¹ Ферьси һатьн у дәстпекьрьн Исарʼа кʼәтьнә дәʼԝе. Әԝ дьщерʼьбандьн у жь Ԝи нишанәк жь әʼзмен дьхԝәстьн.

¹² Кʼур кʼәсәр һате у гот: «Чьма әва ньсьла ль нишанәке дьгәрʼә? Әз рʼаст ԝәрʼа дьбежьм кӧ ви ньсьлирʼа нишанәк найе дайине».

¹³ Ԝи әԝ һьштьн, диса кʼәтә ԛәйьке у дәрбази ԝи бәри голе бу.

Һәвиртьрʼшке ферьсийа у Һеродәс

¹⁴ Ижар шагьрта бир кьрьбу кӧ хԝәрʼа нан һьлдана. Ль щәм ԝан, ԛәйькеда пештьри нанәки тьштәки ԝани хԝарьне тʼӧнәбу.

¹⁵ Иса тʼәми да ԝан у гот: «Мьԛати хԝә бьн, һʼәвза хԝә жь һәвиртьрʼшке ферьсийа у ӧса жи йе Һеродәс бькьн».

¹⁶ Ле әԝана нав һәвда хәбәр дьдан у дьготьн: «Нане мә тʼӧнә, ләма аһа дьбежә».

¹⁷ Исава әʼйан бу кӧ әԝ чь дьбежьн у ԝанрʼа гот: «Һун чьма нав һәвда хәбәр дьдьн, кӧ нане ԝә тʼӧнә? Һәла һе һун фәʼм накьн? У сәре ԝәда рʼунани, һәла һе һун нагьһижьнә гьлийа?

¹⁸ Чʼәʼве ԝә һәнә, һун набиньн? Гӧһе ԝә һәнә, һун набьһен? Чаԝа найе бира ԝә,

¹⁹ чахе Мьн пенщ нан бона пенщ һʼәзар мәрьва кәркьрьн? Ԝә жь һурькед бәрмайи чәнд сәләйед тʼьжи бәрәв кьрьн?» Ԝан ле вәгәрʼанд у готьн: «Донздәһ».

²⁰ «У гава Мьн һʼәфт нан бона чар һʼәзар мәрьва кәркьрьн, ԝә чәнд зәмбилед тʼьжи бәрмайи бәрәв кьрьн?» Ԝан гот: «Һʼәфт».

²¹ Иса ԝанрʼа гот: «Ле чьма һун һе фәʼм накьн?»

Ль Бәйтсайдайе ԛәнщкьрьна корәки

²² У әԝ һатьнә Бәйтсайдайе. Һьнәка мәрьвәки кор ани щәм Иса у лава же кьрьн, кӧ дәсте Хԝә дайнә сәр ԝи.

²³ Әԝи жи дәсте мәрьве кор гьрт, жь гӧнд дәрхьстә дәр, тʼуйи чʼәʼвед ԝи кьрьн у дәстед Хԝә данинә сәр ԝи, пьрси: «Тӧ тьштәки дьбини?»

²⁴ Әԝи жи ль жоре ньһерʼи у гот: «Әз мәрьва дьбиньм, ле мина дара нә, кӧ дьгәрʼьн».

²⁵ Диса Иса дәстед Хԝә данинә сәр чʼәʼвед ԝи, кор зурʼ бу ньһерʼи у чʼәʼвед ԝи вәбун, һәр тьшт зәлал дит.

²⁶ Иса әԝ шандә мала ԝи у жерʼа гот: «Нәкʼәвә нава гӧнд».

Пәтрус шәʼдәтийе ль сәр Иса дьдә

²⁷ Иса тʼәви шагьртед Хԝә чу гӧндед Ԛәйсәрийа Филипойе у рʼеда жь шагьртед Хԝә пьрси: «Бь тʼәхмина мәрьва Әз кʼи мә?»

²⁸ Ԝан ле вәгәрʼанд у готьн: «Һьнәк дьбежьн ‹Йуһʼәннайе ньхӧмдар ә›, һьнәкед дьн дьбежьн ‹Елйас ә›, һьнәкед майин жи дьбежьн ‹йәк жь пʼехәмбәра йә›».

²⁹ Иса жь ԝан пьрси: «Ле һун чь дьбежьн? Бь тʼәхмина ԝә Әз кʼи мә?» Пәтрус ле вәгәрʼанд у готе: «Тʼӧ Мәсиһ и».

³⁰ Әԝи тʼәми ль ԝан кьр, кӧ дәрһәԛа Ԝида кәсирʼа тьштәки нәбежьн.

Иса дәрһәԛа щәфа у мьрьна Хԝәда дьбежә

³¹ Пәй ве йәкерʼа Иса дәстпекьр шагьртед Хԝә һин кьр, кӧ гәрәке Кӧрʼе Мерьв гәләки щәфе бькʼьшинә, жь алийе рʼуспийа, сәрәкед кʼаһина у ԛанунзанада бе тʼәхсиркьрьне у кӧштьне, ле рʼожа сьсийа жь мьрьне рʼабә.

³² Әԝи әв йәк зәлал гот. Һьнге Пәтрус Әԝ да алики у ле һьлат.

³³ Ле Иса сәр мьле Хԝәва зьвьрʼи у ль шагьртед Хԝә ньһерʼи, ль Пәтрус һьлат у гот: «Жь бәр чʼәʼве Мьн бәтавәбә, щьно! Чьмки нет-фькьра тә нә жь Хԝәде йә, ле жь мәрьвайе йә».

³⁴ Паше Иса гази әʼлаләте у шагьртед Хԝә кьрьн, ԝанрʼа гот: «Һәгәр йәк дьхԝазә ль пәй Мьн бе, бьра хԝә инкʼар кә, хаче хԝә һьлдә у пәй Мьн бе.

³⁵ Чьмки кʼи кӧ дьхԝазә әʼмьре хԝә хьлаз кә, әԝе ԝи ӧнда кә у кʼи кӧ әʼмьре хԝә бона Мьн у Мьзгинийе ӧнда кә, әԝе ԝи хьлаз кә.

³⁶ Чь фәйдә һәгәр мәрьв тʼәмамийа дьнйайе ԛазьнщ кә, ле әʼмьре хԝә ӧнда кә?

³⁷ Йан жи мәрьв чь дькарә бәр әʼмьре хԝәва бьдә?

³⁸ Әԝе кӧ Мьн у хәбәред Мьн нав ви ньсьле хальфи у гӧнәкʼарда шәрм һʼәсаб кә, Кӧрʼе Мерьв жи ԝе ԝи шәрм һʼәсаб кә, гава рʼумәта Баве Хԝәва тʼәви мьлйакʼәтед пироз бе».