Marqos 7 - Пәймана Ну (Инщил)

Рʼаԝ-рʼьзьмед кал-бава у хәбәра Хԝәде

¹ Ферьсийа у һьнәк ԛанунзанед кӧ жь Оршәлиме һатьбун, дора Иса гьртьн.

² Ԝана дит кӧ һьнәкә жь шагьртед Ԝи бь дәстед һʼәрам, аԝа готи дәстнәшушти нан дьхԝьн.

³ Ферьси у һʼәму щьһу пәй рʼаԝ-рʼьзьмед кал у бавед хԝә дьчьн, һʼәта кӧ дәстед хԝә рʼьнд нәшон, нане хԝә нахԝьн

⁴ у жь базаре жи чь тиньн, һʼәта аве нәхьн, нахԝьн. Гәләк әʼдәтед дьн жи һәнә, кӧ жь кал у бава һьлданә у дьԛәдиньн: Мәсәлә, мина шуштьна тʼаса, шәрбька у фьраԛед сьфьрә майин.

⁵ Һьнге ферьси у ԛанунзана жь Иса пьрсин: «Чьма шагьртед Тә пәй рʼаԝ-рʼьзьмед кал у бава начьн у бь дәстед һʼәрам нан дьхԝьн?»

⁶ Әԝи ль ԝан вәгәрʼанд у гот: «Ишайа бона ԝә дӧрʼуйа рʼаст пʼехәмбәрти кьрийә! Чаԝа кӧ һатийә ньвисаре: ‹Әва щьмәʼта бь заре хԝә ԛәдьре Мьн дьгьрә, ле дьле ԝан жь Мьн дур ә.

⁷ Бадиһәԝа Мьн дьһʼәбиньн, тʼәмийед мәрьва чаԝа ԛанунед Мьн щьмәʼте һин дькьн›.

⁸ Һун тʼәмийед Хԝәде дьһельн у пәй рʼаԝ-рʼьзьмед мәрьвайийе дькʼәвьн».

⁹ У гот: «Һун тʼәмийед Хԝәде рʼьнд дьдьнә алики, ԝәки рʼаԝ-рʼьзьмед хԝә хԝәй кьн.

¹⁰ Мәсәлә, Муса готийә: ‹Ԛәдьре де у баве хԝә бьгьрә› у ‹Әԝе кӧ гьлики ԛолайи де у баве хԝәрʼа бежә, гәрәке бе кӧштьне›.

¹¹ Ле һун дьбежьн: ‹Кʼи кӧ дийа хԝә йан баве хԝәрʼа бежә: Әԝ аликʼарийа кӧ гәрәке жь мьн бьгьһижә тә, әԝ «ԛӧрбан» ә›, (аԝа готи дийарик ә кӧ Хԝәдерʼа те дайине)

¹² һун иди наһельн кӧ әԝ тьштәки де у баве хԝәрʼа бькә!

¹³ Бь ви аԝайи, һун бь ԝан рʼаԝ-рʼьзьмед хԝәйә кӧ дәрбази ньсьлед ну дькьн, хәбәра Хԝәде дькьнә хԝәли. У һун гәләк тьштед аһа дькьн».

Тьштед кӧ мерьв дьһʼәрʼьминьн

¹⁴ Һьнге Иса әʼлаләт диса гази щәм Хԝә кьр у готә ԝан: «Һун һʼәму гӧһдарийа Мьн бькьн у фәʼм кьн.

¹⁵ Тьштәки ӧса тʼӧнә, кӧ жь дәрва бькʼәвә нав-дьле мерьв у ԝи бьһʼәрʼьминә, ле әԝ тьштед кӧ жь дьл дәртен, әԝ мерьв дьһʼәрʼьминьн.

¹⁶ Гӧһе кʼейи бьһистьне һәйә бьра бьбьһе».

¹⁷ Гава жь әʼлаләте ԛәтийа һатә мал, шагьртед Ԝи мәʼна ԝе мәсәле же пьрсин.

¹⁸ Иса ль ԝан вәгәрʼанд у гот: «Һун һе нагьһижьнә гьлийа? Чьма һун фәʼм накьн, чь кӧ жь дәрва дькʼәвә нав-дьле мерьв, нькарә ԝи бьһʼәрʼьминә.

¹⁹ Чьмки әԝ нә кӧ дькʼәвьнә дьле ԝи, ле дьчьнә зьке ԝи у жь ԝьр жи дәртен дәрва». (Бь ви аԝайи Иса да кʼьфше, кӧ һʼәму хԝарьн жи һʼәлал ьн.)

²⁰ У гот: «Әԝ тьштед кӧ жь дьле мерьв дәрдькʼәвьн, әԝ ԝи дьһʼәрʼьминьн.

²¹ Чьмки жь һьндӧрʼ, жь дьле мәрьв фькьред хьраб дәрдькʼәвьн: Ԛави, дьзи, кӧштьн,

²² зьнекʼари, тьмайи, хьраби, фелбази, толти, чʼәʼве хьраб, бӧхданбежи, кʼӧбари у беаԛьли.

²³ Әв һʼәму тьштед хьраб жь дьл дәрдькʼәвьн у мерьв дьһʼәрʼьминьн».

Баԝәрийа кʼӧлфәта Финикйа Сурйайе

²⁴ Иса жь ԝе дәре рʼабу чу синоре Суре. Чу маләке у нәдьхԝәст кӧ кәсәк пе бьһʼәсийа, ле нькарьбу Хԝә вәшарта.

²⁵ Кʼӧлфәтәкә кӧ ԛизька ԝе рʼӧһʼе һʼәрамва гьрти бу, бона Иса пе һʼәсийа, ләз һат у хԝә авитә бәр ньгед Ԝи.

²⁶ Әԝ кʼӧлфәт йунан бу, әʼсьле хԝәда жи жь Финикйа Сурйайе бу. Ԝе лава жь Иса кьр, кӧ щьн жь ԛиза ԝе дәрхә.

²⁷ Иса ԝерʼа гот: «Бьһелә бьра пешийе зарʼ тʼер бьн, чьмки нә рʼаст ә кӧ нан бәр зарʼа һьлдьн у бавежьнә бәр са».

²⁸ Әԝе ль Ԝи вәгәрʼанд у гот: «Бәле Хӧдан, нә сә жи ԝан һурькед бәр зарʼайә бьне сьфреда майи дьхԝьн?»

²⁹ Һьнге Әԝи кʼӧлфәтерʼа гот: «Бона хатьре ве готьна тә, тӧ дькари һәрʼи. Щьн жь ԛизька тә дәркʼәт».

³⁰ Кʼӧлфәт жи чу мала хԝә, дина хԝә дайе, ԝе ԛизьк нав ньвинеда пʼалда йә у щьн жи же дәркʼәтийә.

Мәрьвәки кәрʼ у лал хәбәр дьдә

³¹ Пәй ԝе йәкерʼа Иса жь синоре Суре дәркʼәт, нава Сайдерʼа дәрбаз бу, ԛәза Декаполисерʼа һатә гола Щәлиле.

³² Мәрьвәки кәрʼ у лал анинә щәм Ԝи у лава же кьрьн кӧ дәсте Хԝә дайнә сәр ԝи.

³³ Иса әԝ мәрьв жь әʼлаләте ԛәтанд, тʼьлийед Хԝә кьрьнә гӧһед ԝи, дәсте Хԝәда тʼукьр, ль зьмане ԝи да.

³⁴ У бәре Хԝә әʼзменда кьр, кʼәсәр һате у гот: «Әффата!» кӧ те фәʼмкьрьне: «Вәбә!»

³⁵ У дәст хԝәда гӧһед ԝи бьһистьн, зьмане ԝи вәбу у зәлал дәст бь хәбәрдане кьр.

³⁶ Иса тʼәми ль ԝан кьр, кӧ кәсирʼа нәбежьн. Ле Әԝи чьԛас тʼәми ль ԝан дькьр, ԝана һаԛас зедә бәла дькьр.

³⁷ Мәрьв гәләки әʼщебмайи мабун у дьготьн: «Әви һʼәму тьшт ԛәнщ кьр: Һьн кәрʼа дьдә бьһистьне, һьн жи лала дьдә хәбәрдане».