Marqos 4 - Пәймана Ну (Инщил)

Мәсәла тʼохьмрʼәш

¹ Иса диса ль дәве голе дәст бь һинкьрьне кьр. Әʼлаләтәкә ӧса мәзьн ль дора Ԝи щьвийа, кʼәрба Әԝ кʼәтә ԛәйька ль сәр голе у рʼуньшт. Тʼәмамийа әʼлаләте ль дәве голе бу

² у Ԝи бь мәсәла әԝ һини гәләк тьшта дькьрьн. Һинкьрьна Хԝәда гот:

³ «Гӧһдари! Тʼохьмрʼәш рʼабу чу кӧ тʼохьм бьрʼәшинә.

⁴ Чахе әԝи тʼохьме хԝә дьрʼәшанд, һьнәк же кʼәтьнә дәве рʼе, тәйрәдә һатьн у әԝ хԝарьн.

⁵ У һьнәк кʼәтьнә сәр әʼрде кәвьри, ль ԝьр кӧ хԝәли кем бу. Әԝ зу шин бун, чьмки тәлаше хԝәлийе нә кʼур бу.

⁶ Чахе тәʼв дәркʼәт, әԝ чʼьлмьсин у чьмки рʼаԝед ԝан тʼӧнәбун, һʼьшк бун.

⁷ У һьнәкед дьн кʼәтьнә нава стьрийа, стьри рʼабун әԝ хәньԛандьн у бәр нәдан.

⁸ У һьнәкед дьн жи кʼәтьнә нава әʼрде ԛәнщ у шин бун, мәзьн бун у һьнәка си, һьнәка шест, һьнәка сәд щар бәр дан».

⁹ У Иса ԝанрʼа гот: «Гӧһе кʼейи бьһистьне һәйә бьра бьбьһе».

Иса чьма бь мәсәла хәбәр дьдә

¹⁰ Гава Иса тʼәне ма, йед дора Ԝи гьртьбун тʼәви һәр донздәһа, бона ван мәсәла же пьрсин.

¹¹ Әԝи щаба ԝан да у гот: «Ԝәрʼа һатийә дайине кӧ һун сӧрʼед Пʼадшатийа Хԝәде бьзаньбьн, ле бона ԝан, йед кӧ дәрва нә, һәр тьшт бь мәсәла те готьне,

¹² ԝәки: ‹Чьԛаси бьньһерʼьн жи, нәбиньн, чьԛаси бьбьһен жи, фәʼм нәкьн, ԝәки нәбә кӧ вәгәрʼьн у ль ԝан бе афукьрьне›».

Шьровәкьрьна мәсәла тʼохьмрʼәш

¹³ Һьнге Иса ԝанрʼа гот: «Һун ве мәсәле фәʼм накьн? Ле иди һуне һʼәму мәсәла чаԝа фәʼм бькьн?

¹⁴ Тʼохьмрʼәш хәбәре дьрʼәшинә.

¹⁵ Әԝед ль дәве рʼе кӧ хәбәр ле те чандьне, әԝ ьн, кӧ гава дьбьһен, перʼа-перʼа мирещьн те у хәбәра дьле ԝанда чанди дәрдьхә.

¹⁶ Әԝед ль сәр әʼрде кәвьри әԝ ьн, кӧ гава хәбәре дьбьһен, әԝ зу бь әшԛ у ша ԝе ԛәбул дькьн,

¹⁷ ле чьмки рʼаԝед ԝан тʼӧнәнә, әԝ дьреж тʼаԝ накьн. У гава бона хәбәре рʼасти тәнгасийа йан зерандьне тен, зу жь рʼе дькʼәвьн.

¹⁸ У әԝед нава стьрийада һатьнә чандьне әԝ ьн, кӧ хәбәре дьбьһен,

¹⁹ хәмед ве дьнйайе, дәрәԝед дәԝләтийе у хԝәстьна тьштед дьн дькʼәвьнә наве у хәбәре дьхәньԛиньн, әԝ бе бәр дьминьн.

²⁰ У әԝед әʼрде ԛәнщда һатьнә чандьне әԝ ьн, кӧ хәбәре дьбьһен, ԛәбул дькьн, һьнәк си, һьнәк шест у һьнәк жи сәд щар бәр дьдьн».

Чʼьра сәр пʼечʼьре

²¹ У Иса ԝанрʼа гот: «Гава чʼьре тиньнә һьндӧрʼ, бона чь тиньн? Бона бьн сәльке, йан бона бьн ньвине? Нә тиньн кӧ дайньнә сәр пʼечʼьре?

²² Тʼӧ тьште вәшарти тʼӧнәйә кӧ нәйе ашкәрәкьрьне у нә жи тьштәки дьзива һәйә кӧ нәкʼәвә бәр рʼонайе.

²³ Гӧһе кʼейи бьһистьне һәйә бьра бьбьһе».

²⁴ Иса ԝанрʼа гот: «Дина хԝә бьдьнә тьштед кӧ һун дьбьһен. Һун бь чь чапе бьпивьн, бь ԝе пиване жи ԝе ԝәрʼа бе пиване у сәрда жи ԝе һе зедә бә.

²⁵ Чьмки кʼерʼа кӧ һәйә, ԝе һе ле зедә бә у кʼерʼа кӧ тʼӧнә, чь һәйә жи ԝе же бе стандьне».

Мәсәла тʼохьме шин дьбә

²⁶ У Иса гот: «Пʼадшатийа Хԝәде мина ве йәке йә: Мәрьвәк тʼохьм дьрʼәшинә нав әʼрде.

²⁷ У шәв у рʼож рʼадьзе, рʼадьбә, тʼохьм шин дьбә, бьльнд дьбә у хԝәха пе наһʼәсә кӧ әв чаԝа дьбә.

²⁸ Әʼрд жь хԝә бәр дьдә, пешийе зил, паше сьмбьл, пәйрʼа жи гәньме гьһишти сьмбьлда.

²⁹ Гава кӧ бәр дьгьһижә, мәрьв иди дәʼсе давеже, чьмки дәма нандьруне перʼа гьһиштийә».

Мәсәла һʼәба тʼохьме хәрдале

³⁰ У Иса гот: «Әм Пʼадшатийа Хԝәде мина чь бьшьбиньн? Йан жи әм ԝе бь кʼижан мәсәле шьровәкьн?

³¹ Әԝ мина һʼәбәкә тʼохьме хәрдале йә кӧ жь һʼәму тʼохьмед кӧ сәр әʼрде тенә чандьне һуртьр ә.

³² Ле гава әԝ те чандьне дьгьһижә, жь һʼәму пʼьнщарʼа мәстьр дьбә у чʼьԛьлед мәзьн дьдә, ӧса кӧ тәйрәдед әʼзмен дькарьн хԝә бьдьнә бьн сийа ԝе».

Иса бь мәсәла хәбәр дьдә

³³ Бь гәләк мәсәлед бь ви аԝайи ԝанрʼа һаԛас хәбәр дьда, чьԛас кӧ ԝана дькарьбу фәʼм бькьра.

³⁴ Бе мәсәлә ԝанрʼа тьштәк нәдьгот, ле шагьртед Хԝәрʼа башԛә һәр тьшт шьровәдькьр.

Иса фьртоне дьсәԛьрʼинә

³⁵ Ԝе рʼоже, гава рʼо чу ава, Иса шагьртед Хԝәрʼа гот: «Әм дәрбази ԝи бәри голе бьн».

³⁶ Шагьрт жь әʼлаләте ԛәтийан, кʼәтьнә ԝе ԛәйька кӧ Иса теда бу у ԝана Әԝ тʼәви хԝә бьр. Ԛәйькед дьн жи тʼәви Ԝи бун.

³⁷ Дә ижар фьртонәкә мәзьн ль ԝан рʼабу, пела ӧса ль ԛәйьке дьхьст, кӧ иди әԝ бу бь аве тʼьжи бьбуйа.

³⁸ Ле Иса пашийа ԛәйькеда сәре Хԝә данибу сәр бәʼлги у рʼазабу. Ԝана Әԝ һʼьшйар кьр у готьне: «Дәрсдар, нә хәма Тәйә кӧ әм ӧнда дьбьн?»

³⁹ Иса рʼабу, ль байе һьлат у әʼмьри сәр голе кьр гот: «Бьсәкьнә, кәрʼ бә!» Фьртоне дани у һʼәму тьшт сәԛьрʼин.

⁴⁰ Иса ԝанрʼа гот: «Һун чьма дьтьрсьн? Һе чаԝа баԝәрийа ԝә тʼӧнә?»

⁴¹ Саԝәкә гьран ль ԝана гьрт у һәвдӧрʼа готьн: «Гәло әв кʼи йә, кӧ ба у гол жи ельми Ԝи дьбьн?»