Marqos 3 - Пәймана Ну (Инщил)

Иса рʼожа шәмийе мәрьве кӧ дәсте ԝи кʼьшийабу ԛәнщ дькә

¹ У Иса диса кʼәтә кʼьниште. Ль ԝе дәре мәрьвәк һәбу, кӧ дәсте ԝи кʼьшийабу.

² У чʼәʼве һьнәка сәр Ԝи бу, гәло рʼожа шәмийе Әԝе ԝи ԛәнщ кә йан на, ԝәки хәйба Ԝи бькьн.

³ Иса мәрьве дәсткʼьшийайирʼа гот: «Рʼабә ве говәке бьсәкьнә!»

⁴ Паше ԝанрʼа гот: «Рʼожа шәмийе ԛәнщикьрьн щайиз ә, йан хьрабикьрьн? Рʼӧһʼәки хьлаз кьн, йан ӧнда кьн?» Ле ԝан дәнг нәкьр.

⁵ Иса бь һерс ль дора Хԝә ньһерʼи, бона сәрһʼьшкийа ԝан бәр Хԝә кʼәт у ԝи мәрьвирʼа гот: «Дәсте хԝә дьреж кә». Әԝи жи дьреж кьр у дәсте ԝи диса ԛәнщ бу.

⁶ Ферьси дәркʼәтьнә дәрва у перʼа-перʼа тʼәви Һеродәсийа шеԝьрин, кӧ чаԝа Ԝи бьдьнә кӧштьне.

Щьвата ль дәве голе

⁷ Иса тʼәви шагьртед Хԝә чу дәве голе. Жь Щәлиле әʼлаләтәкә гьран пәй Ԝи чу.

⁸ Гава кӧ ԝана кьрьнед Ԝи бьһистьн, жь Щьһустане, Оршәлиме, Идумәйайе, ԝи алийе Урдӧнейи рʼоһьлате, ӧса жи жь ԛәза Сур у Сайде гәләк мәрьв һатьнә щәм Ԝи.

⁹ У Иса жь дәст әʼлаләте шагьртед Хԝәрʼа гот, кӧ Ԝирʼа ԛәйькәке һазьр кьн, ԝәки нәкʼәвә ль бәр дәʼфа.

¹⁰ Чьмки Иса гәләк мәрьв ԛәнщ кьрьн, ӧса кӧ йед нәхԝәш тʼопи сәр дьбун, ԝәки дәсте хԝә бьдана Ԝи.

¹¹ Дәма кӧ рʼӧһʼед һʼәрам Әԝ дьдитьн, ль бәр Ԝи дәвәрʼуйа хԝә давитьнә әʼрде, дькьрьнә ԛирʼин у дьготьн: «Тӧ Кӧрʼе Хԝәде йи!»

¹² Ле Иса һʼьшк тʼәми ль ԝан дькьр, кӧ бона Ԝи нәкьнә дәнги.

Бьжартьна һәр донздәһа

¹³ Иса һьлкʼьшийа чʼийе у мәрьвед кӧ Ԝи дьхԝәстьн гази щәм Хԝә кьрьн. Әԝ жи чунә щәм Ԝи.

¹⁴ Әԝи донздәһ мәрьв бьжартьн, навед ԝан «шанди» дани, кӧ тʼәви Ԝи бьминьн у ԝан бьшинә, ԝәки даннасин кьн.

¹⁵ У һʼӧкӧм да ԝан кӧ щьна дәрхьн.

¹⁶ Һәр донздәһед бьжарти әв ьн: Шьмһʼун (кӧ наве ԝи кьрә Пәтрус),

¹⁷ Аԛубе Зәбәди у Йуһʼәннайе бьре ԝи, (әԝи наве Боанәрщәс ль ԝан кьр, кӧ те фәʼмкьрьне: «Кӧрʼед Гӧрʼинийа Әʼзмен»)

¹⁸ Әндраԝьс, Филипо, Бәртоломәйо, Мәтта, Тʼума, Аԛубе кӧрʼе Һалфаԝо, Тәдайо, Шьмһʼуне ԝәлатпʼарьст

¹⁹ у Щьһудайе Исхәрйоти йе кӧ бу нәмаме Иса.

Иса у Бәлзәбул

²⁰ Паше Иса чу маләке. Диса һаԛас әʼлаләт щьвийа, һʼәта кӧ нькарьбун нане хԝә жи бьхԝарана.

²¹ Гава йед жь хун у ԛьнета Ԝи бьһистьн, дәркʼәтьн Ԝи бьгьрьн, чьмки ԝана дьгот: «Әԝи һʼьше Хԝә ӧнда кьрийә!»

²² У әԝ ԛанунзанед кӧ жь Оршәлиме бәржер бьбун, дьготьн: «Бәлзәбул Ԝида һәйә! Әԝ бь һʼӧкӧме сәрԝере щьна щьна дәрдьхә!»

²³ Иса жи әԝ гази щәм Хԝә кьрьн у бь мәсәла ԝанрʼа гот: «Мирещьн чаԝа дькарә хԝәха хԝә дәрхә?

²⁴ Һәгәр нав пʼадшатикеда тʼьфаԛ тʼӧнәбә, әԝ нькарә бьминә.

²⁵ Мала кӧ бетʼьфаԛи бькʼәве, әԝ мал нькарә бьминә.

²⁶ Һәгәр мирещьн рʼабә һьмбәри хԝә у бьбә дӧтирәти, әԝ нькарә бьминә, ле бәле ԝе хьлазийа ԝи бе.

²⁷ Ле бәле тʼӧ кәс нькарә бькʼәвә мала мерхасәки у һәбука ԝи тʼалан кә, һәгәр пешийе ԝи мерхаси гьренәдә. Гава гьреда, һьнге ԝе бькарьбә мала ԝи тʼалан кә.

²⁸ Әз рʼаст ԝәрʼа дьбежьм, һәр гӧнә у һәр готьна хьраб кӧ бежьн ԝе ль бәндед дьне бенә бахшандьне,

²⁹ ле кʼи кӧ готьнәкә хьраб мьԛабьли Рʼӧһʼе Пироз бежә, тʼӧ щар ль ԝи найе бахшандьне. Әԝе бь ԝи гӧнәйи һʼәта-һʼәтайе сущдар бә».

³⁰ Иса әв йәк гот, чьмки ԝан дьгот: «Рʼӧһʼе һʼәрам Ԝида һәйә».

Де у бьрайед Иса

³¹ Һьнге де у бьрайед Иса һатьн, ль дәрва сәкьнин, йәк шандьнә пәй Ԝи у гази Ԝи кьрьн.

³² Әʼлаләта кӧ ль дора Ԝи рʼуньштьбу готә Ԝи: «Ва дийа Тә у бьрайед Тә дәрва пьрса Тә дькьн».

³³ Иса щаба ԝан да у гот: «Дийа Мьн у бьрайед Мьн кʼи нә?»

³⁴ Һьнге ль йед дора Хԝә рʼуньшти ньһерʼи у гот: «Ва нә де у бьрайед Мьн!

³⁵ Һәр кәсе кӧ хԝәстьна Хԝәде бинә сери, әԝ ә бьре Мьн, хушка Мьн у дийа Мьн».