Marqos 16 - Пәймана Ну (Инщил)

Иса жь мьрьне рʼадьбә

¹ Пәй рʼожа шәмийерʼа Мәрйәма Мәждәлани, Мәрйәма дийа Аԛуб у Сәлома чун бьһарәт кʼьрʼин, ԝәки һәрʼьн ль щьнйазе Иса дьн.

² Рʼожа һʼәфтийейә пешьн сәре сьбәһе зу, ԝәхте рʼо дәркʼәт, әԝ чунә сәр тʼьрбе.

³ Ԝана рʼева һәврʼа дьгот: «Кʼи ԝе бона мә кәвьр жь бәр дәре тʼьрбе һол кә?»

⁴ Чьмки кәвьр гәләки мәзьн бу. У гава кӧ ль жоре ньһерʼин, дина хԝә дане, кӧ кәвьр жь бәр һол кьри йә.

⁵ У чахе чунә һьндӧрʼе тʼьрбе, дина хԝә дане, хортәки чӧхе сьпи ԝәргьрти ԝе ль алийе рʼасте рʼуньшти йә. Кʼӧлфәт гәләк зәндәгьрти ман.

⁶ Ле әԝи ԝанрʼа гот: «Зәндәгьрти нәминьн! Һун ль ԝи Исайе Ньсрәте дьгәрʼьн, Йе кӧ һатә хачкьрьне. Әԝ жь мьрьне рʼабуйә! Әԝ нә ль вьр ә. Ва йә әԝ щийе кӧ Әԝ ле данибу.

⁷ Дә ньһа һәрʼьн бежьнә шагьртед Ԝи у Пәтрус, кӧ Әԝе бәри ԝә һәрʼә Щәлиле. Ль ԝьр һуне Ԝи бьбиньн, чаԝа кӧ Әԝи ԝәрʼа готийә».

⁸ Әԝ кʼӧлфәт жь тʼьрбе дәркʼәтьн рʼәвин, чьмки рʼьсасе әԝ гьртьбун у дьләрьзин. Кәсирʼа жи тьштәк нәготьн, чьмки саԝе ль ԝан гьртьбу.

Иса Хԝә нишани Мәрйәма Мәждәлани дькә

⁹ Гава Иса рʼожа һʼәфтийейә пешьн сьбәһе зу жь мьрьне рʼабу, Ԝи пешийе Хԝә нишани Мәрйәма Мәждәлани кьр, йа кӧ һʼәфт щьн же дәрхьстьбу.

¹⁰ Әԝе жи чу әԝ йәк гиһандә әԝед кӧ тʼәви Иса гәрʼийабун, кӧ шин дькьрьн у дьгьрийан.

¹¹ Ле гава ԝана бьһист кӧ Иса сах ә у Хԝә нишани Мәрйәме кьрийә, баԝәр нәкьрьн.

Иса Хԝә нишани дӧ шагьртед Хԝә дькә

¹² Пәй ван йәкарʼа Әԝи Хԝә дьлԛәки дьнда нишани жь ԝан дӧда кьр, йед кӧ дьчунә кʼәԝшен.

¹³ Әԝана жи чун әԝ хәбәр гиһандьнә йед майин. Ле готьна ԝан жи баԝәр нәкьрьн.

Иса Хԝә нишани йанздәһ шагьрта дькә

¹⁴ Пәй ве йәкерʼа Иса Хԝә нишани йанздәһа кьр, гава әԝ ль сәр сьфре рʼуньштьбун. Әԝи ль ԝан һьлат бона нәбаԝәри у сәрһʼьшкийа ԝан, чьмки ԝана йед кӧ Әԝ жь мьрьне рʼабуйи дитьбун баԝәр нәкьрьн.

¹⁵ У ԝанрʼа гот: «Һәрʼьнә һәр чар алийед дьнйайе у Мьзгинийе бьдьнә һәр мәрьви.

¹⁶ Әԝе кӧ баԝәр бькә у бе ньхӧмандьне ԝе хьлаз бә, ле әԝе кӧ баԝәр нәкә диԝана ԝи ԝе бьбә.

¹⁷ Әԝе кӧ баԝәр дькьн, әв нишане ԝанрʼа дийар бьн: Бь наве Мьн ԝе щьна дәрхьн, бь зьманед ну ԝе хәбәр дьн,

¹⁸ ԝе мәʼра бь дәсте хԝә бьгьрьн у һәгәр әԝ тьштәки жәʼр жи вәхԝьн, тʼӧ зьраре ль ԝан нәбә. Әԝе дәстед хԝә дайньнә сәр нәхԝәша у нәхԝәше ԛәнщ бьн».

Жорһьлатьна Иса

¹⁹ Аԝа Хӧдан Иса пәй ԝе хәбәрдана тʼәви ԝанрʼа һьлкʼьшийа әʼзмен у ль мьле Хԝәдейи рʼасте рʼуньшт.

²⁰ Шагьрт жи чун, ль һәр щийи даннасин кьрьн. Хӧдан пьштоване ԝан бу у бь ван нишана хәбәра Хԝә дьда избаткьрьне, кʼижанед кӧ бь дәсте ԝан дьбун.