Marqos 12 - Пәймана Ну (Инщил)

Мәсәла рʼәзе тьрийа у рʼәзвана

¹ У бь мәсәла дәст бь хәбәрдане кьр, ԝанрʼа гот: «Мәрьвәки рʼәзе тьрийа дани, дора ԝе сур кьр, һʼәԝзәки тьриһʼьнщьрʼандьне теда кʼола, һеланәкә нобәдара чекьр у әԝ бь кʼьре да рʼәзвана, чу ԝәлатәки дьн.

² Ԝәхтда хӧламәк шандә щәм рʼәзвана, ԝәки жь ԝи рʼәзи бәре пʼара хԝә жь ԝан бьстинә.

³ Ле ԝана әԝ гьрт, кʼӧтан у дәствала вәрʼекьрьн.

⁴ У ԝи диса хӧламәки дьн шандә щәм ԝан, ле ԝана сәри ле шкенанд у әԝ рʼобәт кьрьн.

⁵ Әԝи йәки дьн шанд, ԝана әԝ жи кӧшт. Ԝи гәләкед дьн шандьн, ԝана һьнәк жь ԝан кʼӧтан у һьнәк жи кӧштьн.

⁶ Бона ԝи тʼәне йәк мабу кӧ бьшанда, кӧрʼе хԝәйи дәлал. Хӧләсә рʼабу әԝ жи шанд у гот: ‹Һьлбәт ԝе жь кӧрʼе мьн шәрм бькьн›.

⁷ Ле әв рʼәзванед һан ль һәв шеԝьрин у готьн: ‹Әв ԝаре ԝи йә! Ԝәрьн әм ви бькӧжьн, миратʼе мәрʼа бьминә›.

⁸ Һьнге әԝ гьртьн кӧштьн у щьнйазе ԝи жь рʼәз дәрхьстьнә дәр.

⁹ Дә ижар хԝәйе рʼәз ԝе чь бькә? Нә әԝе бе ԛьрʼа рʼәзвана бинә у рʼәз бьдә һьнәкед дьн?

¹⁰ Чьма ԝә әԝ ньвисар нәхԝәндийә? ‹Әԝ кәвьре кӧ һоста тʼәхсир кьр, әԝ бу сәре әʼнишке.

¹¹ Әв йәк жь алийе Хӧданда ԛәԝьми у ль бәр чʼәʼве мә һʼәйр-һʼӧжмәкʼар ә!›»

¹² Сәрԝеред щьһуйа фәʼм кьрьн, кӧ Иса әв мәсәлә ани сәр ԝан, кьрьн кӧ Ԝи бьгьрьн, ле жь әʼлаләте тьрсийан, кʼәрба Әԝ һьштьн у чун.

Пьрса хәрщдайин у нәдайине

¹³ Паше ԝана һьнәкә жь ферьсийа у пьштгьред Һеродәс шандьнә щәм Ԝи, ԝәки Ԝи бь хәбәред дәве Ԝи бьгьрьн.

¹⁴ Әԝана һатьн у жерʼа готьн: «Дәрсдар! Әм заньн кӧ Тӧ йәки рʼаст и. Мьнәте жь кәси наки, чьмки нав мәрьвада фьрԛийе данайни, ле рʼийа Хԝәде рʼаст һин дьки. Гәло рʼаст ә кӧ әм хәрщ бьдьнә Ԛәйсәр йан на? Әм бьдьн, йан нәдьн?»

¹⁵ Ле дӧрʼутийа ԝан кӧ Исава әʼйан бу гот: «Чьма һун Мьн дьщерʼьбиньн? Мьнрʼа зивәки биньн кӧ Әз бьбиньм».

¹⁶ Ԝана жерʼа зивәк ани. Әԝи жь ԝан пьрси: «Әв наве ньвисар у сьфәт йе кʼе йә?» Ԝана гот: «Йед Ԛәйсәр ьн».

¹⁷ Иса ԝанрʼа гот: «Ԝәки ӧса йә, чь кӧ йед Ԛәйсәр ьн бьдьнә Ԛәйсәр у чь кӧ йед Хԝәде нә бьдьнә Хԝәде». У сәр Ԝи әʼщебмайи ман.

Пьрса рʼабуна мьрийа

¹⁸ Садуԛи, кӧ дьбежьн рʼабуна мьрийа тʼӧнә, һьнәкә жь ԝан һатьнә щәм Иса у же пьрсин:

¹⁹ «Дәрсдар! Муса мәрʼа ньвисийә: ‹Һәгәр бьре йәки безӧрʼәт бьмьрә у жьне стухар бьһелә, бьра бьре ԝи жьна ԝи бьстинә у ԝаре бьре хԝә шин кә›.

²⁰ Аԝа һʼәфт бьра һәбун. Бьре мәзьн жьнәк станд, безӧрʼәт мьр.

²¹ Бьчʼуке ԝи әԝ жьн станд, әԝ жи безӧрʼәт мьр, ӧса жи һатә сәре йе сьсийа.

²² Хӧләсә ван һәр һʼәфт бьра жи әԝ жьн станд у безӧрʼәт мьрьн, пәй ԝанрʼа жи әԝ жьн мьр.

²³ Дә ижар ԝе Рʼожа Рʼабуне, гава мьри рʼабьн, әва жьна ԝе кʼижан бьрайирʼа бькʼәвә? Чьмки һәр һʼәфта жи әԝа стандьбу».

²⁴ Иса ль ԝан вәгәрʼанд у гот: «Нә һун жь дәст ве йәке хальфи нә, кӧ нә ньвисара заньн, нә жи ԛәԝата Хԝәде?

²⁵ Гава йед мьри жь мьрьне рʼабьн, ԝе нә бьзәԝьщьн у нә жи мер кьн, чьмки әԝе мина мьлйакʼәтед әʼзмана бьн.

²⁶ Ле дәрһәԛа рʼабуна мьрийада, чьма ԝә Кʼьтеба Мусада нәхԝәндийә сәрһатийа дара дьрʼийеда кӧ чаԝа Хԝәде Мусарʼа дьбежә: ‹Әз Хԝәдейе Бьраһим, Хԝәдейе Исһаԛ у Хԝәдейе Аԛуб ьм›?

²⁷ Әԝ нә Хԝәдейе мьрийа йә, ле Хԝәдейе зендийа йә. Һун лап хальфи нә!»

Тʼәмийа сәр тʼәмийарʼа

²⁸ Ԛанунзанәки кӧ шәрʼ-дәʼԝе ԝан бьһист у дина хԝә жи дайе, кӧ Иса чаԝа ԛәнщ щаба ԝан да, незики Иса бу у же пьрси: «Кʼижан тʼәми сәр һʼәму тʼәмийарʼа йә?»

²⁹ Иса ле вәгәрʼанд: «Әв ә тʼәмийа сәр тʼәмийарʼа: ‹Бьбьһе, Исраел! Хӧдан Хԝәдейе мә Хӧданәк ә.

³⁰ Хӧдан Хԝәдейе хԝә һʼьз бькә, бь тʼәмамийа дьле хԝә, бь тʼәмамийа щанийа хԝә, бь тʼәмамийа һʼьше хԝә у бь тʼәмамийа ԛәԝата хԝә›.

³¹ Йа дӧда жи әв ә: ‹Һәвале хԝә ԝәкә хԝә һʼьз бькә›. Жь ван мәстьр тʼӧ тʼәми тʼӧнә».

³² Ижар ԛанунзан Ԝирʼа гот: «Рʼаст ә, Дәрсдар! Тә рʼаст гот, кӧ ‹Хӧдан йәк ә у жь Ԝи пештьр йәки майин тʼӧнә›.

³³ У ‹бь тʼәмамийа дьл, бь тʼәмамийа аԛьл, бь тʼәмамийа ԛәԝате Хԝәде һʼьзкьрьн› у ‹һәвале хԝә жи ԝәкә хԝә һʼьзкьрьн› сәр һәр дийарийед тʼәвайишәԝате у ԛӧрбанед майинрʼа йә».

³⁴ Иса дина Хԝә дайе, кӧ ԝи бь аԛьли щаба хԝә да, жерʼа гот: «Тӧ жь Пʼадшатийа Хԝәде нә дур и». Пәй ве йәкерʼа, иди тʼӧ кәси нәԝерьбу тьштәк жь Ԝи бьпьрсийа.

Мәсиһ кӧрʼе кʼе йә?

³⁵ Гава кӧ Иса пʼарьстгәһеда һин дькьр, гот: «Ԛанунзан чаԝа дьбежьн кӧ Мәсиһ кӧрʼе Даԝьд ә?

³⁶ Нә Даԝьд хԝәха пе Рʼӧһʼе Пироз дьбежә? ‹Хӧдан готә Хӧдане мьн: Ль мьле Мьни рʼасте рʼуне, һʼәта кӧ Әз дьжмьнед Тә бькьмә бьне пʼийед Тә›.

³⁷ Аԝа Даԝьд хԝәха кӧ Ԝи ‹Хӧдан› һʼәсаб дькә, иди Әԝ чаԝа дьбә кӧрʼе Даԝьд?» Ԝе әʼлаләта гьран бь дьл у әшԛ гӧһдарийа Иса дькьр.

Ԛанунзанед дӧрʼу

³⁸ Һинкьрьна Хԝәда Әԝи гот: «Һʼәвза хԝә жь ԝан ԛанунзана бькьн, йед кӧ һʼьз дькьн бь чӧхед дьреж бьгәрʼьн, базарада сьлаве бьдьнә ԝан,

³⁹ кʼьништада кʼӧрсийед пешьн бьгьрьн у шайийада жи һәрәма жорьн рʼунен.

⁴⁰ Әвана аликива малед жьнәбийа һʼуфи хԝә дькьн, алийе дьнва жи бона хԝәкʼьфшкьрьне дӧайе хԝә дьреж дькьн. Диԝана ԝане һе гьран бә».

Дийарийа жьнәбийа бәләнгаз

⁴¹ Иса ль пешбәри пʼәрәданга пʼарьстгәһе рʼуньшт у дина Хԝә дайе, кӧ әʼлаләте чаԝа пʼәрә давитьнә пʼәрәданге. Гәләк дәԝләтийа гәләк авитьне.

⁴² Жьнәбикә бәләнгаз жи һат у дӧ пол, кӧ дькьрә ԛӧрʼушәк, авите.

⁴³ Иса шагьртед Хԝә гази щәм Хԝә кьрьн у ԝанрʼа гот: «Әз рʼаст ԝәрʼа дьбежьм, кӧ әве жьнәбийа бәләнгаз жь ван һʼәмуйа зәʼфтьр авитә пʼәрәданге,

⁴⁴ Ван һʼәмуйа жь зедәйа һәбука хԝә авитьне. Ле әве ве бәләнгазийа хԝәда чи ԝе һәбу кӧ пе әʼбуре хԝә бькьра һʼәму авите».