Marqos 11 - Пәймана Ну (Инщил)

Иса бь рʼумәт дькʼәвә Оршәлиме

¹ Гава әԝ незики Оршәлиме бун у гьһиштьнә чʼийайе Зәйтʼуне у гӧндед Бәйтфаще у Бәйтанйайе, һьнге Иса дӧ шагьртед Хԝә шандьн

² у ԝанрʼа гот: «Һәрʼьнә ԝи гӧнде пешбәри хԝә. Һәма чаԝа кӧ һун бькʼәвьне, һуне щәʼшькәкә гьредайи бьбиньн кӧ һе кәсәк ле сийар нәбуйә. Әԝе вәкьн у биньн.

³ У һәгәр йәк жь ԝә бьпьрсә у бежә: ‹Һун чьма ве йәке дькьн?› бежьне: ‹Хӧданрʼа лазьм ә у ԝе дәстхԝәда бьшинә вьр›».

⁴ Әԝ шагьрт чун у ль бәр дәри ль кʼуче, щәʼшькәкә гьредайи дитьн. Гава вәдькьрьн,

⁵ һьнәкед ԝьр сәкьни пьрсин: «Һун чь дькьн? Чьма ԝе щәʼшьке вәдькьн?»

⁶ Шагьрта щаба ԝан ӧса да, чаԝа кӧ Иса ԝанрʼа готьбу. У әԝ һьштьн.

⁷ Щәʼшьк Исарʼа анин, кʼьнщед хԝә авитьнә сәр ԝе у Әԝ ль ԝе сийар бу.

⁸ Гәләка кʼьнщед хԝә сәр рʼе рʼадьхьстьн, һьнәка жи жь кʼәԝшен чʼьԛьлед дара дьбьрʼин, сәр рʼе рʼадьхьстьн.

⁹ Йед ль пешийа Ԝи у пәй Ԝи кӧ дьчун дькьрьнә ԛирʼин: «Һосанна! Бьмбарәк ә Әԝе кӧ бь наве Хӧдан те!

¹⁰ Бьмбарәк ә әԝ Пʼадшатийа баве мә Даԝьдә кӧ те. Һосанна Йе Һәри Жорьнрʼа!»

¹¹ Иса кʼәтә Оршәлиме, чу пʼарьстгәһе. Чʼәʼве Хԝә ль һәр тьшти гәрʼанд, ле чьмки иди евар бу, тʼәви һәр донздәһа чу Бәйтанйайе.

Дара һежирейә һʼьшкбуйи

¹² Рʼожа дьне, гава әԝ жь Бәйтанйайе дәрдькʼәтьн, Иса бьрʼчи бу.

¹³ Дурва дарәкә һежирейә бәлгдайи дит, бәрбь ԝе чу, кʼа тьштәке сәр һәбә. Гава гьһиштә даре, пештьри бәлга тьштәк нәдит, чьмки һе нә ԝәхте һежира бу.

¹⁴ Һьнге Әԝи ԝе дарерʼа гот: «Бьра иди тʼӧ кәс тʼӧ щар бәре тә нәхԝә». Шагьртед Ԝи әв готьн бьһистьн.

Иса пʼарьстгәһе паԛьж дькә

¹⁵ У әԝ һатьнә Оршәлиме. Иса кʼәтә пʼарьстгәһе у дәстпекьр әԝед кӧ пʼарьстгәһеда дькʼьрʼин у дьфьротьн дәрхьстьнә дәрва. Тʼәхтед пʼәрәгӧһерʼа у кʼӧрсийед кәвоткфьроша ԝәлгәрʼандьн

¹⁶ у нәһьшт, кӧ тʼӧ кәс тьштәки пʼарьстгәһерʼа дәрбаз кә.

¹⁷ Әԝ һин кьрьн у гот: «Чьма нә ньвисар ә: ‹Мала Мьн ԝе бона һʼәму мьләта мала дӧа бе һʼәсабе›? Ле ԝә әԝ кьрийә ‹шкәфта ԛачаха›».

¹⁸ Сәрәкед кʼаһина у ԛанунзана әв йәк кӧ бьһистьн, дәстпекьрьн кӧ чаԝа бькьн Ԝи бькьнә фәсале бькӧжьн. Әԝана жь Ԝи дьтьрсийан, чьмки тʼәмамийа әʼлаләте сәр һинкьрьна Ԝи зәндәгьрти мабу.

¹⁹ Гава кӧ рʼо чу ава, Әԝ жь бажер дәркʼәтьн.

Дәрса дара һежире

²⁰ Сәре сьбәһе, гава әԝана бәр дарерʼа дәрбаз бун, дитьн кӧ әԝ дара һежире рʼаԝе хԝәва һʼьшк буйә.

²¹ Кʼәтә бира Пәтрус у әԝи Исарʼа гот: «Дәрсдар, дина Хԝә бьде, әԝ дара һежирейә кӧ Тә ньфьрʼ ле кьр һʼьшк буйә».

²² Иса ԝанрʼа гот: «Баԝәрийа ԝә бьра сәр Хԝәде һәбә.

²³ Әз рʼаст ԝәрʼа дьбежьм, кʼи кӧ ви чʼийайирʼа бежә: ‹Рʼабә хԝә бавежә бәʼре› у дӧдьли нәбә, ле баԝәр бькә кӧ готьна ԝи ԝе бьԛәԝьмә, ӧса жи ԝе бьбә.

²⁴ Бона ве йәке Әз ԝәрʼа дьбежьм, һун чь кӧ нава дӧада бьхԝазьн, баԝәр бькьн кӧ ԝә иди стандийә у хԝәстьна ԝә ԝе бе сери.

²⁵ У гава кӧ һун дьсәкьньн у дӧа дькьн, бьбахшиньн, һәгәр тьштәки ԝә һьндава кәсәкида һәбә, ԝәки Баве ԝәйи әʼзмана жи нәһәԛийед ԝә бьбахшинә ԝә.

²⁶ Ле һәгәр һун нәбахшиньн, Баве ԝәйи әʼзмана жи нәһәԛийед ԝә набахшинә ԝә».

Пьрса дәрһәԛа һʼӧкӧме Исада

²⁷ У әԝ диса һатьнә Оршәлиме. Дәма кӧ Иса пʼарьстгәһеда дьгәрʼийа, сәрәкед кʼаһина, ԛанунзан у рʼуспи һатьнә щәм Ԝи

²⁸ у же пьрсин: «Тӧ бь чь һʼӧкӧми ван кьра дьки? Кʼе әв һʼӧкӧм дайә Тә, кӧ Тӧ ван кьра бьки?»

²⁹ Иса ԝанрʼа гот: «Әзе жи тьштәки жь ԝә бьпьрсьм. Һәгәр ԝә щаба Мьн да, Әзе жи ԝәрʼа бежьм, кӧ Әз бь чь һʼӧкӧми ван кьра дькьм:

³⁰ Һʼӧкӧме ньхӧмандьна Йуһʼәнна жь әʼзмен бу йан жь мәрьва? Щаба Мьн бьдьн!»

³¹ Әԝана нав һәвда шеԝьрин у готьн: «Һәгәр әм бежьн: ‹Жь әʼзмен бу›, Әԝе бежә: ‹Ле ԝә чьма әԝ баԝәр нәкьр?›

³² Ле һәгәр әм бежьн: ‹Жь мәрьва бу?..›» Әԝ жь әʼлаләте дьтьрсийан, чьмки һʼәмуйа ԛәбул кьрьбу кӧ Йуһʼәнна рʼаст пʼехәмбәр бу.

³³ Щаба Иса дан у готьн: «Әм ньзаньн». Иса ԝанрʼа гот: «Әз жи ԝәрʼа набежьм кӧ Әз бь чь һʼӧкӧми ван кьра дькьм».