Marqos 10 - Пәймана Ну (Инщил)

Пьрса жьнбәрʼдане

¹ Иса жь ԝьр рʼабу чу синоре Щьһустане у дәрбази ԝи алийе чʼәме Урдӧне бу. Диса әʼлаләте ль дора Ԝи гьрт у чаԝа әʼдәте Ԝи бу, Әԝи диса әԝ һин кьрьн.

² Жь ферьсийа һьнәк незики Ԝи бун у же пьрсин, ԝәки Ԝи бьщерʼьбиньн: «Гәло ль гора Ԛануне рʼаст ә, кӧ мер жьна хԝә бәрʼдә?»

³ Иса щаба ԝан да у гот: «Муса чь тʼәми да ԝә?»

⁴ Ԝана гот: «Муса изьн да, кӧ мер кʼахаза жьнбәрʼдане бьньвисә у жьне бәрʼдә».

⁵ Ле Иса ԝанрʼа гот: «Жь дәст сәрһʼьшкийа ԝә Муса әв тʼәми ԝәрʼа ньвиси.

⁶ Ле сәре серида, ԝәхте әʼфьрандьне Хԝәде әԝ ‹ԛьсьме мер у жьнеда хӧльԛандьн›.

⁷ ‹Бона ве йәке мере де у баве хԝә бьһелә, хԝә ль жьна хԝә бьгьрә

⁸ у һәр дӧ ԝе бьбьнә бәдәнәк›. Аԝа иди әԝ нә дӧдӧ нә, ле бәдәнәк ьн.

⁹ Бона ве йәке әԝед кӧ Хԝәде әԝ кьрьнә йәк, бьра мәрьв ԝан жь һәвдӧ нәԛәтинә».

¹⁰ Гава әԝ диса малда бун, шагьрта бона ве мәсәле жь Ԝи пьрсин.

¹¹ Иса ԝанрʼа гот: «Кʼи кӧ жьна хԝә бәрʼдә у йәкә дьн бьстинә, һьндава ԝеда зьнекʼарийе дькә

¹² у һәгәр жьн жи мере хԝә бәрʼдә у йәки дьн бьстинә, зьнекʼарийе дькә».

Иса дӧа зарʼока дькә

¹³ Аԝа зарʼок данинә щәм Иса, кӧ дәсте Хԝә дайнә сәр ԝан, ле шагьрт ль йед данин һьлатьн.

¹⁴ Гава кӧ Иса әв йәк дит, һерс кʼәт у ԝанрʼа гот: «Бьра әԝ зарʼок бенә щәм Мьн, пешийа ԝан нәгьрьн, чьмки Пʼадшатийа Хԝәде пʼара йед аһа йә.

¹⁵ Әз рʼаст ԝәрʼа дьбежьм, кʼи Пʼадшатийа Хԝәде мина зарʼокәке ԛәбул нәкә, әԝ тʼӧ щар накʼәвә нава ԝе».

¹⁶ Паше әԝ зарʼ данә һʼәмеза Хԝә, дәсте Хԝә дани сәр ԝан у дӧа ль ԝан кьр.

Йәки дәԝләти ль жийина һʼәта-һʼәтайе дьгәрʼә

¹⁷ Гава Иса рʼийа Хԝәда дьчу, йәк бәрбь Ԝи бәзи, чу ль бәр Ԝи чок да у же пьрси: «Дәрсдаре ԛәнщ, әз чь бькьм, ԝәки жийина һʼәта-һʼәтайе ԝар бьм?»

¹⁸ Иса ԝирʼа гот: «Тӧ чьма Мьнрʼа дьбежи ԛәнщ? Ԛәнщ тʼәне Хԝәде йә, пештьри Ԝи кәсәки дьн тʼӧнә.

¹⁹ Тӧ тʼәмийа зани: ‹Нәкӧжә, зьнекʼарийе нәкә, нәдьзә, шәʼдәтийа дәрәԝ нәдә, худана хәлԛе нәхԝә, ԛәдьре де у баве хԝә бьгьрә›».

²⁰ Әԝи гот: «Дәрсдар, әв һʼәму жи мьн жь щаһьлтийа хԝәда хԝәй кьрьнә».

²¹ Иса ле ньһерʼи, әԝ һʼьз кьр у готе: «Һе кемасикә тә һәйә. Һәрʼә чи тә һәйә бьфьрошә, бәлайи фәԛира кә, һьнге хьзна тә ԝе ль әʼзмен һәбә. У пәй Мьн ԝәрә».

²² Ль сәр ве готьне әԝи рʼәнг авит, мәʼдәкьри чу, чьмки гәләк һәбука ԝи һәбу.

²³ Иса ль дора Хԝә ньһерʼи у шагьртед Хԝәрʼа гот: «Дәԝләтийарʼа чьԛас зәʼмәт ә, кӧ бькʼәвьнә Пʼадшатийа Хԝәде!»

²⁴ Шагьрт сәр ван готьнед Ԝи әʼщебмайи ман, ле Иса диса думайи кьр у гот: «Лаԝно! Ԝанрʼа чьԛас зәʼмәт ә, бькʼәвьнә Пʼадшатийа Хԝәде, йед кӧ гӧмана хԝә датиньнә сәр дәԝләта хԝә!

²⁵ Дәвә ԝе ԛӧла дәрзийерʼа һе рʼьһʼәт дәрбаз бә, нә кӧ дәԝләти бькʼәвә Пʼадшатийа Хԝәде».

²⁶ Шагьрт гәләки әʼщебмайи ман у һәврʼа готьн: «Иди кʼи дькарә хьлаз бә?»

²⁷ Иса ль ԝан ньһерʼи у гот: «Әԝ тьшт жь дәсте мерьв найе, ле жь дәсте Хԝәде те, чьмки Хԝәде дькарә һәр тьшти бькә».

²⁸ Һьнге Пәтрус дәстпекьр жерʼа гот: «Аԝа мә һʼәму тьшт һьштийә у пәй Тә һатьнә».

²⁹ Иса ԝанрʼа гот: «Әз рʼаст ԝәрʼа дьбежьм, тʼӧ кәс тʼӧнә кӧ бона Мьн у Мьзгинийе мал, йан бьра, йан хушк, йан де, йан бав, йан зарʼ, йан әʼрдед хԝә һьштьбьн,

³⁰ у ль ве дьне сәд ԛат мала, бьра, хушка, дийа, зарʼа у әʼрда тʼәви зерандьна нәстинә у дьнйа дьнда жи жийина һʼәта-һʼәтайе.

³¹ Ле гәләкед пеш ԝе бьбьнә йед паш у йед паш ԝе бьбьнә йед пеш».

Иса щара сьсийа дәрһәԛа мьрьна Хԝәда дьбежә

³² Аԝа әԝ ль сәр рʼе бун у һәвраз дьчунә Оршәлиме, Иса ль пешийа ԝан дьчу, шагьрт әʼщебмайи дьман у әԝед ль пәй дьһатьн дьтьрсийан. Әԝи диса һәр донздәһ данә алики у дәстпекьр әԝ тьштед кӧ ԝе сәре Ԝи бьԛәԝьмийана ԝанрʼа гот:

³³ «Бьбьһен! Әм һәвраз дьчьнә Оршәлиме. Кӧрʼе Мерьв ԝе бькʼәвә дәсте сәрәкед кʼаһина у ԛанунзана. Әԝе жерʼа кӧштьне дәрхьн у Ԝи бьдьнә дәсте нәщьһуйа

³⁴ у әԝе ԛәрфе хԝә ль Ԝи бькьн, тʼукьне, бьдьнә бәр ԛамчийа, Ԝи бькӧжьн. У рʼожа сьсийа ԝе жь мьрьне рʼабә».

Хԝәстьна Аԛуб у Йуһʼәнна

³⁵ Һьнге кӧрʼед Зәбәди, Аԛуб у Йуһʼәнна незики Иса бун у готьне: «Дәрсдар, әм дьхԝазьн ԝәки әм жь Тә чь һиви кьн, Тӧ бона мә бьки».

³⁶ Әԝи жи жь ԝан пьрси: «Һун чь дьхԝазьн кӧ Әз бона ԝә бькьм?»

³⁷ Ԝан жерʼа гот: «Изьне бьдә кӧ рʼумәта Тәда жь мә йәк ль мьле Тәйи рʼасте, йе дьн жи ль мьле Тәйи чʼәпе рʼуне».

³⁸ Иса ԝанрʼа гот: «Һун ньзаньн чь дьхԝазьн. Гәло һун дькарьн жь ԝе кʼасе вәхԝьн, йа кӧ Әзе вәхԝьм? Йан жи бь ԝе ньхӧмандьне бенә ньхӧмандьне бь кʼижане Әзе бемә ньхӧмандьне?»

³⁹ Ԝана жерʼа гот: «Әм дькарьн». Иса ԝанрʼа гот: «Бәле һуне вәхԝьн жь ԝе кʼаса кӧ Әзе вәхԝьм у бенә ньхӧмандьне бь ԝе ньхӧмандьна кӧ Әзе пе бемә ньхӧмандьне,

⁴⁰ ле изьна ль мьле Мьни чʼәп у рʼасте рʼуньштьне нә дәсте Мьнда йә. Әԝ щи бона ԝан ьн, кʼижанарʼа һатьнә һазьркьрьне».

⁴¹ Гава һәр дәһә шагьртед дьн әв йәк бьһист, дьле ԝан жь Аԛуб у Йуһʼәнна ма.

⁴² Ле Иса әԝ гази щәм Хԝә кьрьн у гот: «Һун заньн йед кӧ нав мьләтада сәрԝер тенә һʼәсабе, сәрдәстийе ль ԝан дькьн у гьрәгьред ԝан жи һʼӧкӧми сәр ԝан дькьн.

⁴³ Ле нава ԝәда бьра ӧса нибә. Кʼи кӧ нава ԝәда дьхԝазә бьбә йе мәзьн, гәрәке бьбә бәрдәстийе ԝә.

⁴⁴ У кʼи кӧ нава ԝәда дьхԝазә бьбә пеш, гәрәке бьбә хӧламе һʼәмуйа.

⁴⁵ Чьмки Кӧрʼе Мерьв жи нәһатийә кӧ жерʼа бәрдәстийе бькьн, ле ԝәки Әԝ Хԝәха бәрдәстийе бькә у әʼмьре Хԝә бьдә кӧ гәләка бькʼьрʼә».

Иса пʼарскьрәки кор бажаре Әриһайеда ԛәнщ дькә

⁴⁶ Паше әԝ һатьнә Әриһайе. Гава Иса тʼәви шагьртед Хԝә у әʼлаләтәкә гьранва жь бажер дәркʼәт, Кӧрʼе Тимәйо, Бартимәйойе кор ль сәр рʼе рʼуньштьбу пʼарс дькьр.

⁴⁷ Гава бьһист кӧ Исайе Ньсрәте дәрбаз дьбә, дәстпекьр кьрә ԛирʼин у гот: «Исайе Кӧрʼе Даԝьд, ль мьн ԝәрә рʼәʼме!»

⁴⁸ Гәләка ль ԝи һьлат, ԝәки дәнге хԝә бьбьрʼә, ле әԝи һе дькьрә ԛирʼин у дьгот: «Кӧрʼе Даԝьд, ль мьн ԝәрә рʼәʼме!»

⁴⁹ Иса сәкьни у гот: «Гази ԝи кьн». Гази йе кор кьрьн у ԝирʼа готьн: «Чʼәʼве тә рʼоньк! Рʼабә сәр хԝә, гази тә дькә».

⁵⁰ Әԝи жи пʼоте хԝә авит, банзда сәр хԝә у һатә щәм Иса.

⁵¹ Иса же пьрси: «Тӧ чь жь Мьн дьхԝази кӧ Әз бона тә бькьм?» Йе кор жерʼа гот: «Дәрсдар, дьхԝазьм чʼәʼвед мьн бьбиньн».

⁵² У Иса жерʼа гот: «Һәрʼә, баԝәрийа тә тӧ ԛәнщ кьри». У ԝи чахи чʼәʼвед ԝи дитьн, да пәй Иса чу.