Lûqa 24 - Пәймана Ну (Инщил)

Иса жь мьрьне рʼадьбә

¹ Рʼожа йәкшәме сьбәһе зу, ԝан кʼӧлфәта бьһарәтед һазьркьри һьлдан чунә сәр тʼьрбе.

² Ле ԝана кәвьр жь бәр тʼьрбе һолкьри дит.

³ Гава кʼәтьнә һьндӧрʼ, щьнйазе Хӧдан Иса нәдитьн.

⁴ Гава әԝана һе бона ве йәке мәтʼәлмайи мабун, ньшкева дӧ мәри бь кʼьнще нурани ль бәр ԝан сәкьнин.

⁵ У гава кʼӧлфәт жь тьрса кʼәтьнә сәр рʼуйе хԝә, ԝан мәрьва ԝанрʼа гот: «Һун чьма ль Йе сах нава мьрийада дьгәрʼьн?

⁶ Әԝ нә ль вьр ә, Әԝ жь мьрьне рʼабуйә. Биньнә бира хԝә, кӧ чахе һе Щәлиледа бу, чь ԝәрʼа гот:

⁷ ‹Гәрәке Кӧрʼе Мерьв бькʼәвә дәсте мәрьвед нәрʼаст, бе хачкьрьне у рʼожа сьсийа жь мьрьне рʼабә›».

⁸ У ԝана готьна Иса бир анин

⁹ у жь тʼьрбе вәгәрʼийан, әва йәка һәр йанздәһа у һʼәмуйед майинрʼа готьн.

¹⁰ Йед кӧ шандийарʼа готьн, әвана бун: Мәрйәма Мәждәлани, Йоһана у Мәрйәма дийа Аԛуб, бь тʼәви һьнәкед майин.

¹¹ Шандийава чаԝа готьнәкә пʼучʼ хӧйа бу у ԝана кʼӧлфәт баԝәр нәкьрьн.

¹² Ле Пәтрус рʼабу бәрбь тʼьрбе бәзи, ԛуз бу ньһерʼи, тʼәне кʼәфәне Ԝи ԝьр бу у мәтʼәлмайи чу, дьфькьри гәло чаԝа бу.

Ль сәр Рʼийа Әмԝасе

¹³ Ԝе рʼоже дӧ шагьрт дьчунә гӧндәки, кӧ жь Оршәлиме донздәһ километьри дур бу, наве ԝи Әмԝас бу.

¹⁴ Ԝана бь һәврʼа бона һәр тьште ԛәԝьми хәбәр дьдан.

¹⁵ У гава әԝана нав һәвда хәбәр дьдан у дьшеԝьрин, Иса Хԝәха жи незики ԝан бу, тʼәви ԝан чу.

¹⁶ Ле чʼәʼвед ԝан гьрти бун, кӧ Ԝи нас нәкьн.

¹⁷ Иса ԝанрʼа гот: «Һун ве рʼейеда чь һәврʼа хәбәр дьдьн?» Әԝана мәʼдәкьри сәкьнин.

¹⁸ Йәки жь ԝан, кӧ наве ԝи Клепас бу, ле вәгәрʼанд у гот: «Әԝ чаԝа жь Оршәлиме тʼәне Тә нәбьһистийә кӧ ван рʼожед пашьнда ԝьр чь ԛәԝьмийә?»

¹⁹ Әԝи жь ԝан пьрси у гот: «Чь буйә?» Ԝана ле вәгәрʼанд готе: «Бона Исайе Ньсрәте, кӧ Әԝ бь әʼмәл у хәбәред Хԝә ль бәр Хԝәде у тʼәмамийа мьләт пʼехәмбәрәки зор бу

²⁰ у чаԝа сәрәкед кʼаһина у сәрԝеред мә нәмамийа кӧштьна Ԝи кьрьн, хач кьрьн.

²¹ Әм ԝе гӧмане бун кӧ Әԝи ԝе Исраеле аза бькьра. Ԝәки дьн жи әва рʼожа сьсийа йә, кӧ әв тьшт бунә.

²² Ле чәнд кʼӧлфәтед нав мәда жи әм әʼщебмайи кьрьн. Әԝана сьбәһе зу чубунә сәр тʼьрбе

²³ у щьнйазе Ԝи ль ԝьр нәдитьбун, вәгәрʼийан һатьн мәрʼа готьн, кӧ: ‹Мә мьлйакʼәт дитьн, мәрʼа готьн, кӧ Әԝ сах ә›.

²⁴ У жь мә һьнәк жи чунә сәр тʼьрбе, чаԝа кӧ ԝан кʼӧлфәта готьбу, ӧса бу, ле Әԝ нәдитьн».

²⁵ Һьнге Әԝи ԝанрʼа гот: «Һәй инсанед бе фькьр, һун чьԛаси гьран һʼәму готьнед пʼехәмбәра баԝәр дькьн?

²⁶ Нә гәрәке Мәсиһ щәфа бькʼьшанда у бькʼәта рʼумәта Хԝә?»

²⁷ У Ԝи дәстпекьр жь Муса у һʼәму пʼехәмбәра, чь кӧ ԝан кʼьтебада бона Ԝи ньвисар бун, ԝанарʼа шьровәкьрьн.

²⁸ Гава незики ԝи гӧнде кӧ дьчуне бун, Әԝи ӧса да кʼьфше, йанчийә Әԝ дьчә щики дур.

²⁹ Ле ԝана зор ль Ԝи кьр у гот: «Ишәв ль щәм мә бьминә, чьмки евар ә, рʼо чуйә ава». У Әԝ чу һьндӧрʼ, кӧ ль щәм ԝан бьминә.

³⁰ Ле гава Әԝ тʼәви ԝан сәр сьфре рʼуньшт, нан һьлда, шькьрийа Хԝә жь Хԝәде ани, кәркьр да ԝан.

³¹ Һьнге чʼәʼвед ԝан вәбун, Әԝ нас кьрьн у Әԝ бәр чʼәʼве ԝан бәтавәбу.

³² Ԝана һәврʼа гот: «Ләма, гава Әԝи рʼеда мәрʼа хәбәр дьда у ньвисар мәрʼа шьровәдькьрьн, агьр дьле мә дькʼәт».

³³ Әԝ ԝе гаве рʼабун вәгәрʼийанә Оршәлиме у һәр йанздәһ тʼәви йед майин щьвийайи дитьн,

³⁴ готьн: «Рʼасти Хӧдан сах буйә у Шьмһʼунва хӧйа буйә!»

³⁵ Паше ԝан һәр дӧйа гьли кьр, кӧ чаԝа рʼеда рʼасти Ԝи һатьн у чахе Ԝи нан кәркьр, Әԝ нас кьрьн.

Иса Хԝә нишани шагьртед Хԝә дькә

³⁶ Ԝана һе бона ве йәке хәбәр дьда, Иса нава ԝанда сәкьни у ԝанрʼа гот: «Әʼдьлайи ԝәрʼа».

³⁷ Әԝана жь тьрса бьздийан у ԝан тʼьре хәйаләки дьбиньн.

³⁸ Ле Әԝи ԝанрʼа гот: «Һун чьма шашмайи манә у дӧдьли нә?

³⁹ Аԝа ль дәст у пʼийед Мьн бьньһерʼьн, кӧ Әз Хԝәха мә. У дәсте хԝә бьдьнә Мьн у бьбиньн, чьмки гошт у һәстуйед рʼӧһʼ тʼӧнәнә, чаԝа кӧ һун дьбиньн йед Мьн һәнә».

⁴⁰ Гава әв йәк гот, дәст у пʼийед Хԝә нишани ԝан кьрьн.

⁴¹ У һе жь шабуна баԝәр нәдькьрьн, һʼәйр-һʼӧжмәкʼар мабун, Әԝи ԝанрʼа гот: «Ԛәт тьштәки хԝарьне ль щәм ԝә һәйә?»

⁴² Ԝана чити мәʼсийе пьжанди да Ԝи.

⁴³ Әԝи һьлда ль бәр чʼәʼве ԝан хԝар

⁴⁴ у ԝанарʼа гот: «Әв бун әԝ готьнед кӧ гава Әз тʼәви ԝә бум, Мьн ԝәрʼа готьбун: ‹Гәрәке һәр тьштед кӧ бона Мьн Ԛануна Муса, ньвисаред пʼехәмбәра у Зәбурада ньвисар бун бьһатана сери›».

⁴⁵ Һьнге фәʼме ԝан вәкьр, кӧ ньвисара фәʼм бькьн.

⁴⁶ У ԝанрʼа гот: «Аԝа ньвисар ә, кӧ Мәсиһ гәрәке щәфа бькʼьшинә у рʼожа сьсийа жь мьрьне рʼабә

⁴⁷ у жь Оршәлиме гьрти бь наве Ԝи тʼобәйи у бахшандьна гӧна нав һʼәму мьләтада ԝе бе даннасинкьрьне.

⁴⁸ У һун ьн шәʼдед ван һʼәму тьшта.

⁴⁹ У ва Әзе созе Баве Хԝә ԝәрʼа бьшиньм. Оршәлимеда бьминьн, һʼәта һун ԛәԝате жь жор бьстиньн».

Жорһьлатьна Иса

⁵⁰ У әԝ һʼәта Бәйтанйайе бьрьн, дәсте Хԝә бьльнд кьр, дӧа ԝан кьр.

⁵¹ У һе дӧа дькьр, жь ԝан ԛәтийа, бәрбь әʼзмен һатә һьлатьне.

⁵² Шагьрта жи сәре хԝә бәр Ԝи дани, бь әшԛ у ша вәгәрʼийанә Оршәлиме.

⁵³ У һәр гав пʼарьстгәһеда бун, пәсьне Хԝәде дьдан.