Lûqa 23 - Пәймана Ну (Инщил)

Иса ль бәр Пилато

¹ У тʼәмамийа әʼлаләта ԝан рʼабу, Иса бьрьнә щәм Пилато.

² У дәст бь хәйбе кьрьн готьн: «Мә Әв мәрьва дит кӧ мьләте мә дьхальфинә у нә жи дьһелә кӧ хәрщ бьдьнә Ԛәйсәр. Бона Хԝә жи дьбежә: ‹Әз Мәсиһ Пʼадша мә›».

³ Пилато жь Ԝи пьрси у готе: «Тӧ йи пʼадше щьһуйа?» Әԝи ле вәгәрʼанд у готе: «Тә бь дәве хԝә гот».

⁴ Пилато сәрәкед кʼаһина у әʼлаләтерʼа гот: «Әз тʼӧ нәһәԛийе Ви мәрьвида набиньм».

⁵ Ле әԝана сәр йа хԝә ман у готьн: «Әви мәрьви нава тʼәмамийа Щьһустане, жь Щәлиле дәстпекьри һʼәта вьра, щьмәʼт бь һинкьрьна Хԝәва тʼәвиһәв кьрийә».

Иса ль бәр Һеродәс

⁶ Гава Пилато бона Щәлиле бьһист, пьрси: «Әв мәрьва жь Щәлиле йә?»

⁷ Гава пе һʼәсийа, кӧ Әԝ бьн һʼӧкӧме Һеродәсда йә, Әԝ шандә щәм Һеродәс, кӧ әԝ жи ԝан рʼожада һатьбу Оршәлиме.

⁸ Гава Һеродәс чʼәʼв Иса кʼәт, гәләки ша бу. Әԝи һе зува дьхԝәст кӧ Әԝ бьдита, чьмки әԝи гәләк тьшт бона Ԝи бьһистьбун у һʼьзрәта Ԝи бу, кӧ кʼәрәмәтәке бь дәсте Ԝи бьбинә.

⁹ Һеродәс гәләк пьрс данә Ԝи, ле Иса щаба тʼӧ пьрсе нәда.

¹⁰ Сәрәкед кʼаһина у ԛанунзана жи сәкьнибун у гәләки давитьнә Ԝи.

¹¹ Һеродәс жи бь әскәред хԝәва Әԝ беԛәдьр кьр, пе кʼәнийан, паше кʼьнще рʼәԝш да ле кьрьне, диса пашда шандә щәм Пилато.

¹² Ԝе рʼоже Пилато у Һеродәс ль һәв һатьн, чьмки пешийе нава ԝанда дьжмьнати һәбу.

Диԝанеда һʼӧкӧме кӧштьне ль сәр Иса дәрдьхьн

¹³ Пилато гази сәрәкед кʼаһина, сәрԝера у щьмәʼте кьр,

¹⁴ ԝанрʼа гот: «Ԝә Әв мәрьва ани щәм мьн, чаԝа Йәки щьмәʼте дьхальфинә. Аԝа мьн ль бәр ԝә һәр тьшт жь Ԝи пьрси, ле жь ԝан хьрабийед кӧ һун гьли дькьн, мьн тʼӧ тьшт ль сәр Ви мәрьви нәдит.

¹⁵ У нә жи Һеродәс дит, ләма жи ԝи Әԝ ль сәр мәда вәгәрʼанд. Әви тьштәки ӧса нәкьрийә кӧ бе кӧштьне.

¹⁶ Әзе Ԝи бьдьмә бәр ԛамчийа у бәрʼдьм».

¹⁸ Ле тʼәмамийа әʼлаләте бь һәврʼа кьрә ԛирʼин у гот: «Ԝи ль рʼубари дьне нәһелә! Барабас бона мә бәрʼдә!»

¹⁹ Барабас йәки бона сәрһьлдане у меркӧштьна бажерда буйи һатьбу гьртьне.

²⁰ Пилато диса дәстпекьр хәбәр да, чьмки ԝи дьхԝәст кӧ Иса бьда бәрʼдане.

²¹ Ле ԝана һе дькьрә ԛирʼин у дьгот: «Хач кә! Әԝи хач кә!»

²² Әԝи щара сьсийа ԝанрʼа гот: «Әви чь хьраби кьрийә? Мьн ль сәр Ви нәһәԛи нәдит кӧ Әԝ бе кӧштьне. Әз Ԝи бьдьмә бәр ԛамчийа у бәрʼдьм».

²³ Ле әԝана бь дәнге бьльнд сәр йа хԝә бун у дьхԝәстьн кӧ Әԝ бе хачкьрьне. Сәԝта ԝан сәркʼәт.

²⁴ Пилато ԛьрара хԝә да, кӧ бь хԝәстьна ԝан бә.

²⁵ Анәгори хԝәстьна ԝан, йе кӧ бона сәрһьлдане у меркӧштьне кәледа бу, бәрʼда. Ле Иса һьштә сәр хԝәстьна дьле ԝан.

Хачкьрьна Иса

²⁶ У гава әскәра Әԝ данә пешийа хԝә бьрьн, йәки курени наве ԝи Шьмһʼун, кӧ жь кʼәԝшен дьһат, әԝ гьртьн у хач данинә сәр мьле ԝи, кӧ ль пәй Иса бьбә.

²⁷ У әʼлаләтәкә щьмәʼтейә гьран ль пәй Ԝи дьчу, ӧса жи кʼӧлфәтед кӧ шина Ԝи дькьрьн у дьгьрийан.

²⁸ Иса ль сәр ԝанда вәгәрʼийа у гот: «Ԛизед Оршәлиме! Сәр Мьнда нәгьрин, ле сәр хԝә у зарʼед хԝәда бьгьрин.

²⁹ Чьмки ва ԝе рʼоже бен кӧ ԝе бежьн: ‹Хԝәзи ль ԝан кʼӧлфәтед безӧрʼәт, кӧ зарʼ нәанинә у нәмежандьнә›.

³⁰ Һьнге мәрьве дәстпекьн бежьн: ‹Чʼийано! Ль сәр мәда бькʼәвьн. Гьрно! Мә вәшерьн›.

³¹ Һәгәр сәре дара Тәрʼ аһа дькьн, ле һʼале дара һʼьшк ԝе чаԝа бә?»

³² Дӧ мәрьвед нәһәԛ жи анин, кӧ Перʼа бенә кӧштьне.

³³ У гава гьһиштьнә ԝи щийе кӧ Ԛаф те готьн, ль ԝьр Әԝ хач кьрьн. У әԝед нәһәԛ жи йәк ль мьле рʼасте хач кьрьн у йәк жи ль мьле чʼәпе.

³⁴ Һьнге Иса гот: «Баво, бьбахшинә ван, чьмки ньзаньн чь дькьн». Сәр кʼьнщед Ԝи пʼәшк авитьн ԝәки нава хԝәда бәла кьн.

³⁵ У щьмәʼт сәкьнибу дьньһерʼи. Сәрԝера жи ԛәрфе хԝә ль Ԝи дькьрьн у дьготьн: «Хәлԛ хьлаз кьрьн, дә бьра Хԝә жи хьлаз кә, һәгәр Әԝ ә Мәсиһ, бьжартийе Хԝәде».

³⁶ Әскәр жи ль Ԝи дькʼәнийан, пешда дьһатьн, сьркә дьдане

³⁷ у дьготьн: «Һәгәр Тӧ йи пʼадшайе щьһуйа, дә Хԝәха Хԝә хьлаз кә».

³⁸ У феза сәре Ԝи жи ньвисар бу, кӧ: «ӘВА ПʼАДШАЙЕ ЩЬҺУЙА ЙӘ».

³⁹ Жь ԝан нәһәԛед дардакьри, йәки Иса беһӧрмәт дькьр у дьготе: «Тӧ нә Мәсиһ и? Дә мә хьлаз кә, Хԝә жи перʼа».

⁴⁰ Ле һәвале ԝи ле һьлат у гот: «Тӧ жь Хԝәде натьрси? Нә тӧ жи хут ԝи щәзайида йи?

⁴¹ Әв һәԛе мә йә, кӧ әз у тӧ анәгори әʼмәлед хԝә дькʼьшиньн, ле Әви тʼӧ хьраби нәкьрийә».

⁴² У Исарʼа гот: «Иса, мьн бир бини, гава Пʼадшатийа Хԝәва бейи».

⁴³ Иса ԝирʼа гот: «Әз рʼаст тәрʼа дьбежьм, иро те тʼәви Мьн бӧһьштеда би».

Мьрьна Иса

⁴⁴ Гава нивро сьһʼәт незики донздәһа бу, тʼәмамийа әʼрде һʼәта сьһʼәта сьсийа бу тәʼри

⁴⁵ у рʼуйе рʼойе һатә гьртьне. Пʼәрʼда пʼарьстгәһе нивида бу дӧ тиша.

⁴⁶ У Иса бь дәнге бьльнд кьрә гази у гот: «Баво, рʼӧһʼе Хԝә дьдьмә дәсте Тә». У гава әв йәк гот, рʼӧһʼе Хԝә да.

⁴⁷ Сәрсәд әв тьште буйи кӧ дит, шькьри да Хԝәде у гот: «Рʼасти Әва мәрьвәки рʼаст бу».

⁴⁸ У тʼәмамийа әʼлаләте, кӧ ль ԝьр бона тʼәмаше щьвийайи бу, әв йәка дит, сингед хԝә дьхьстьн, пашда вәдьгәрʼийанә малед хԝә.

⁴⁹ Һʼәму насед Ԝи жи у әԝ кʼӧлфәтед кӧ жь Щәлиле һатьбун, дур сәкьни бун у әв тьшт дьдитьн.

Дәфьнкьрьна Иса

⁵⁰ Мәрьвәки ԛәнщи ширһʼәлал у әндәме щьвина гьрәгьра щьһуйа һәбу, наве ԝи Усьв.

⁵¹ Әва жь бажаре Аримәтйа Щьһустане бу у хԝәха жи һивийа Пʼадшатийа Хԝәде бу. Әԝ тʼәви шеԝьр у кьрьна щьвина ԝан нәбьбу.

⁵² Әԝ рʼабу чу щәм Пилато у щьнйазе Иса жь ԝи хԝәст.

⁵³ Щьнйаз жь хаче ани хԝаре, ԛәдәке кʼьтанида кʼәфән кьр у дани нав тʼьрба ԛәйеда кʼолайи, кӧ тʼӧ щар ԝеда кәсәк нәһатьбу данине.

⁵⁴ У әԝ рʼожа тʼьвдарәккьрьнеда бу у евара шәмийе дәстпедькьр.

⁵⁵ У әԝ кʼӧлфәтед кӧ жь Щәлиле тʼәви Иса һатьбун, әԝ жи пәй ԝи чун у әԝ тʼьрба кӧ чаԝа щьнйазе Ԝи теда һатә данине, дитьн.

⁵⁶ У пашда вәгәрʼийан, бьһарәт у рʼуне бинхԝәш һазьр кьрьн у анәгори тʼәмийа Ԛануне рʼожа шәмийе рʼьһʼәт бун.