Lûqa 19 - Пәймана Ну (Инщил)

Иса у хәрщгьр

¹ Иса кʼәтә Әриһайе у ԝерʼа дәрбаз дьбу.

² Ль ԝьр мәрьвәки дәԝләти һәбу, сәрԝере хәрщгьра, наве ԝи Зәхайо.

³ Әԝи дькьр кӧ Иса бьдита кʼа Әԝ кʼи йә, ле дәст әʼлаләте нькарьбу бьдита, чьмки бәжьнеда кьн бу.

⁴ Әԝ пешда бәзи рʼабу сәр дарәкә һежирейә стьрин, ԝәки Иса бьбинә, чьмки Әԝе һәма ль ԝьррʼа дәрбаз бьбуйа.

⁵ У чахе Иса һатә ԝи щийи, ль жор ньһерʼи у готә ԝи: «Зәхайо! Зу бькә жь ԝьр ԝәрә хԝаре, чьмки Әз гәрәке иро мала тәда бьминьм».

⁶ Зәхайо ләзанд жорда һатә хԝаре у бь әшԛ-ша Әԝ ԛәбул кьр.

⁷ Һʼәмуйед кӧ әв йәк дитьн, бина хԝә тәнг дькьрьн у дьготьн: «Әԝ бу меване мәрьвәки гӧнәкʼар».

⁸ Ле Зәхайо пеш һʼәмуйава сәкьни у готә Хӧдан: «Хӧдан, әз ва ниве һәбука хԝә дьдьмә фәԛира у мьн нәһәԛи кʼе жи кьрьбә, әзе чар щар ле вәгәрʼиньм».

⁹ Иса ԝирʼа гот: «Иро әв мал хьлаз бу, чьмки әва жи зарʼа Бьраһим ә.

¹⁰ Бона ве йәке Кӧрʼе Мерьв һат, ԝәки ль йед ӧндабуйи бьгәрʼә у хьлаз кә».

Мәсәла дәһә зерʼа

¹¹ У ԝана һе әв тьшт дьбьһистьн, Иса мәсәләкә дьн жи ани сәр ԝе йәке, кӧ Әԝ незики Оршәлиме дьбу у ԝана тʼьре Пʼадшатийа Хԝәде ԝе зутьрәке кʼьфш бә.

¹² Әԝи гот: «Мәрьвәки әʼсьлзадә чу ԝәлатәки дур, кӧ пʼадшатийа хԝә бьстинә у вәгәрʼә.

¹³ Гази дәһә хӧламед хԝә кьр, дәһә зерʼ данә ԝан у гот: ‹Ван бьдьнә хәбате, һʼәта кӧ әз вәгәрʼьм›.

¹⁴ Ле бажарвана кʼина ԝи гьртьбу, ԛасьд ль пәй ԝи шандьн у готьн: ‹Әм нахԝазьн әԝ пʼадшатийе ль сәр мә бькә›.

¹⁵ У гава әԝи пʼадшатийа хԝә станд вәгәрʼийа, гази ԝан хӧлама кьр, кʼижанед кӧ әԝи пʼәрә дабунә ԝан, ԝәки бьзаньбә кʼа һәр йәки чьԛас кьрийә кʼар.

¹⁶ Йе пешьн һат у готе: ‹Әз хӧлам, зерʼәки тә дәһә зерʼ кьрә кʼар›.

¹⁷ Ахайе ԝи жерʼа гот: ‹Әʼфәрьм, хӧламе ԛәнщ! Тӧ нава ԝи тьште һьндькида амьн майи, сәрԝертийе дәһә бажара бькә›.

¹⁸ Йе дӧда жи һат у гот: ‹Әз хӧлам, зерʼәки тә пенщ зерʼ кьрә кʼар›.

¹⁹ Ахайе ԝи жерʼа гот: ‹Тӧ жи сәр пенщ бажара бә›.

²⁰ Паше йәки дьн һат у гот: ‹Әз хӧлам, ва йә зерʼе тә, мьн дәстмаледа пʼечʼайи һьлдабу.

²¹ Чьмки әз жь тә дьтьрсийам, мьн заньбу тӧ мәрьвәки һʼьшк и, чь кӧ тә данәнийә, һьлдьди у чь кӧ тә нәчандийә, дьдьруйи›.

²² У ԝи жерʼа гот: ‹Әзе һәма бь дәве тә диԝана тә бькьм, хӧламе хьраб! Һәгәр тә заньбу кӧ әз мәрьвәки һʼьшк ьм, чь кӧ мьн данәнийә, һьлдьдьм у чь кӧ нәчандийә, дьдьрум,

²³ тә чьма пʼәре мьн нәда кʼаркьра, кӧ әз бьһатама мьн бь сәләф бьстанда?›

²⁴ У һазьрарʼа гот: ‹Ԝи зерʼи жь ԝи бьстиньн у бьдьнә әԝе кӧ дәһә зерʼед ԝи һәнә›.

²⁵ Ԝирʼа готьн: ‹Хӧдан, дәһә зерʼед ԝи һәнә›.

²⁶ Әԝи гот: ‹Әз ԝәрʼа дьбежьм, йе кʼе кӧ һәйә, ԝирʼа ԝе бе дайине, ле йе кʼе кӧ тʼӧнә, чь һәйә жи ԝе же бе стандьне.

²⁷ Ле бәле ԝан нәйаред мьн жи, кʼижана нәдьхԝәст әз пʼадшатийе ль сәр ԝан бькьм, биньнә вьр, бәр чʼәʼве мьн ԝан бькӧжьн›».

Иса бь рʼумәт дькʼәвә Оршәлиме

²⁸ Иса пәй ве хәбәрданерʼа пешда чу, ԝәки һәвраз һәрʼә Оршәлиме.

²⁹ У гава незики гӧндед Бәйтфаще у Бәйтанйайе бу, ԝи щийе кӧ жерʼа дьготьн чʼийайе Зәйтʼуне, һьнге дӧ шагьртед Хԝә шандьн

³⁰ у гот: «Һәрʼьнә ԝи гӧнде пешбәри хԝә, гава һун бькʼәвьне, һуне щәʼшькәкә гьредайи бьбиньн кӧ һе кәсәк ле сийар нәбуйә. Әԝе вәкьн у биньн.

³¹ Һәгәр йәк жь ԝә бьпьрсә: ‹Һун чьма ԝе вәдькьн?› бежьн, кӧ Хӧданрʼа лазьм ә».

³² Әԝед шанди чун, чаԝа кӧ ԝанрʼа һатьбу готьне, ӧса жи дитьн.

³³ У ԝана һе щәʼшьк вәдькьр, хԝәйед ԝе ԝанрʼа готьн: «Һун чьма ве щәʼшьке вәдькьн?»

³⁴ Шагьрта гот: «Хӧданрʼа лазьм ә».

³⁵ У әԝ анинә щәм Иса, кʼьнщед хԝә авитьнә сәр ԝе у Иса ле сийар кьрьн.

³⁶ Гава дьчу, щьмәʼте кʼьнщед хԝә сәр рʼе рʼадьхьстьн.

³⁷ У гава Әԝ незики пʼебәржере чʼийайе Зәйтʼуне бу, тʼәмамийа кʼома шагьрта дәстпекьрьн ша дьбун у бь дәнге бьльнд бона һʼәму кʼәрәмәтед кӧ дитьбун шькьри дьданә Хԝәде

³⁸ у дьготьн: «Бьмбарәк ә әԝ Пʼадшайе кӧ бь наве Хӧдан те! Әʼдьлайи ль әʼзмен у шькьри ль Йе Һәри Жорьн!»

³⁹ Ле жь нав әʼлаләте чәнд ферьсийа Исарʼа гот: «Дәрсдар, ль шагьртед Хԝә һьле».

⁴⁰ Әԝи ль ԝан вәгәрʼанд у гот: «Әз ԝәрʼа дьбежьм, һәгәр әвана дәнге хԝә бьбьрʼьн, кәвьре бькьнә ԛирʼин».

Иса бона Оршәлиме дьгьри

⁴¹ У гава незики Оршәлиме бу, ль бажер ньһерʼи, сәрда гьрийа

⁴² у гот: «Хԝәзи тә һәма иро бьзаньбуйа әʼдьлайийа тә чьва гьредайи йә! Ле ньһа жь бәр чʼәʼве тә һатә вәшартьне.

⁴³ Ԝе рʼож сәр тәда бен, кӧ дьжмьнед тәйе дора тә чәпәрʼе гьредьн у жь һәр алийава һʼьщуми сәр тә кьн.

⁴⁴ Ԝе тә у зарʼед тә нава тәда бькьн ах-хԝәли у кәвьр ль сәр кәвьр наһельн. Чьмки ԝәхте кӧ Хԝәде сәрик да тә, тӧ хԝә нәһʼәсийайи».

Иса пʼарьстгәһеда

⁴⁵ У кʼәтә пʼарьстгәһе, дәстпекьр йед кӧ дьфьротьн дәрхьстьн

⁴⁶ у ԝанрʼа гот: «Ньвисар ә: ‹Мала Мьн ԝе мала дӧа бә›. Ле ԝә әԝ кьрийә ‹шкәфта ԛачаха›».

⁴⁷ У һәр рʼож пʼарьстгәһеда һин дькьр, ле сәрәкед кʼаһина, ԛанунзан у гьрәгьред щьмәʼте пәй кʼәтьбун, кӧ чаԝа Ԝи бькӧжьн.

⁴⁸ Ле нькарьбун тьштәк бькьрана, чьмки тʼәмамийа щьмәʼте Ԝива гьредайи бу у гӧһдарийа Ԝи дькьр.