Lûqa 18 - Пәймана Ну (Инщил)

Мәсәла жьнәбийе у һʼакьм

¹ Иса мәсәләк бона ԝе йәке шагьртарʼа гот, ԝәки һәр гав дӧа бькьн у ащьз нәбьн

² у гот: «Бажарәкида һʼакьмәк һәбу, әԝ нә жь Хԝәде дьтьрсийа у нә жи мьнәт жь мерьв дькьр.

³ Ԝи бажарида жьнәбик жи һәбу, һәр гав дьһатә щәм ԝи у дьгот: ‹Һәԛийе бькә, мьн жь дәсте нәйаре мьн хьлаз кә›.

⁴ Һʼакьм гәләк ԝәхт гӧһ нәдьда ԝе, ле паше хԝәха хԝәрʼа гот: ‹Әз жь Хԝәде натьрсьм у жь мерьв жи мьнәте накьм,

⁵ ле бона хатьре ԝе йәке, кӧ әва жьнәбийа те зәʼмәте дьдә мьн, әзе һәԛийе жерʼа бькьм, кӧ һәр гав нәйе мьн ащьз нәкә›».

⁶ У Хӧдан гот: «Бьбьһен кӧ һʼакьме нәрʼаст чь гот.

⁷ Гәло Хԝәде жи бьжартийед Хԝәрʼа ԝе һәԛийе нәкә, йед кӧ шәв у рʼож һәԝара хԝә Ԝи датиньн? Йан Әԝе щаба ԝан дәрәнги бехә?

⁸ Әз ԝәрʼа дьбежьм, ԝе дәстхԝәда һәԛийе бькә. Ле гава Кӧрʼе Мерьв бе, гәло сәр дьне ԝе баԝәрийе бьбинә?»

Мәсәла ферьси у хәрщгьр

⁹ Әв мәсәлә жи ԝанрʼа гот, йед кӧ хԝәха хԝәда гӧман бун, йанчийә әԝә рʼаст ьн у һʼәмуйед майин бәр тьштәки һʼәсаб нәдькьрьн.

¹⁰ «Дӧ мәри һьлкʼьшийанә пʼарьстгәһе, кӧ дӧа бькьн. Йәк ферьси бу, йәк жи хәрщгьр.

¹¹ Әԝе ферьси тʼәне сәкьнибу хԝәда гӧман бь ви щурʼәйи дӧа дькьр: ‹Хԝәдейе мьн, шькьрдар ьм, кӧ әз нә мина ԝан мәрьва мә, йед кӧ тʼаланийе, нәһәԛийе, зьнекʼарийе дькьн у нә жи мина ви хәрщгьри мә.

¹² Ле әз һʼәфтийе дӧ щара рʼожи дьгьрьм у дәһәке жь һʼәму кʼара хԝә жи дьдьм›.

¹³ Ле әԝи хәрщгьр дур сәкьнибу, рʼуйе ԝи нәдьгьрт ль әʼзмен жи бьньһерʼийа, синге хԝә дьхьст у дьгот: ‹Хԝәде, ль мьн гӧнәкʼари ԝәрә рʼәʼме›.

¹⁴ Әз ԝәрʼа дьбежьм, кӧ әв хәрщгьра рʼастһʼәсаббуйи чу мала хԝә, нә кӧ йе дьн. Аԝа һәр кәсе кӧ хԝә бьльнд кә, ԝе ньмьз бә, ле кʼи кӧ хԝә ньмьз кә, ԝе бьльнд бә».

Иса дӧа зарʼока дькә

¹⁵ Тʼьфал жи анинә щәм Иса, кӧ дәсте Хԝә дайнә сәр ԝан. Гава шагьрта әв йәк дит, ль йед данин һьлатьн.

¹⁶ Ле Иса гази зарʼока кьр у гот: «Бьра әԝ зарʼок бенә щәм Мьн, пешийа ԝан нәгьрьн, чьмки Пʼадшатийа Хԝәде пʼара йед аһа йә.

¹⁷ Әз ԝәрʼа рʼаст дьбежьм, кʼи Пʼадшатийа Хԝәде мина зарʼокәке ԛәбул нәкә, әԝ тʼӧ щар накʼәвә нава ԝе».

Сәрԝерәки щьһуйайи дәԝләти ль жийина һʼәта-һʼәтайе дьгәрʼә

¹⁸ Сәрԝерәки жь Ԝи пьрси у гот: «Дәрсдаре ԛәнщ, әз чь бькьм, ԝәки жийина һʼәта-һʼәтайе ԝар бьм?»

¹⁹ Иса ԝирʼа гот: «Тӧ чьма Мьнрʼа дьбежи ԛәнщ? Ԛәнщ тʼәне Хԝәде йә, пештьри Ԝи кәсәки дьн тʼӧнә.

²⁰ Тӧ тʼәмийа зани: ‹Зьнекʼарийе нәкә, нәкӧжә, нәдьзә, шәʼдәтийа дәрәԝ нәдә, ԛәдьре де у баве хԝә бьгьрә›».

²¹ Әԝи жи гот: «Әв һʼәму жи мьн жь щаһьлтийа хԝәда хԝәй кьрьнә».

²² Гава Иса әв йәк бьһист, ԝирʼа гот: «Тьштәки тә һе кем ә, һәр тьште хԝә бьфьрошә, бәлайи фәԛира кә, һьнге хьзна тә ԝе ль әʼзмана һәбә. У пәй Мьн ԝәрә».

²³ Гава әԝи әв йәк бьһист, әшԛа ԝи шкәст, чьмки гәләки дәԝләти бу.

²⁴ Иса дит кӧ бәшәра ԝи нәхԝәш ә, гот: «Чьԛаси зәʼмәт ә бона йед хԝәйиһәбук кӧ бькʼәвьнә Пʼадшатийа Хԝәде.

²⁵ Дәвә ԝе ԛӧла дәрзийерʼа һе рʼьһʼәт дәрбаз бә, нә кӧ дәԝләти бькʼәвә Пʼадшатийа Хԝәде».

²⁶ Әԝед кӧ дьбьһистьн, готьн: «Иди кʼи дькарә хьлаз бә?»

²⁷ У Иса гот: «Әԝ тьште кӧ жь дәсте мерьв найе, Хԝәде дькарә бькә».

²⁸ Пәтрус гот: «Аԝа мә һәр тьштед хԝә һьштьнә у пәй Тә һатьнә».

²⁹ Әԝи ԝанрʼа гот: «Әз рʼаст ԝәрʼа дьбежьм, һәр кәсе кӧ бона Пʼадшатийа Хԝәде мал, йан жьн у зарʼ, йан хушк у бьра, йан де у бав һьштьбә,

³⁰ ԝе ве дьне һе зедә бьстинә у дьнйа дьнда жи жийина һʼәта-һʼәтайе».

Иса щара сьсийа дәрһәԛа мьрьна хԝәда дьбежә

³¹ Әԝи һәр донздәһ данә алики у ԝанрʼа гот: «Бьбьһен! Әм һәвраз дьчьнә Оршәлиме у һʼәму тьштед кӧ бь дәсте пʼехәмбәра бона Кӧрʼе Мерьв һатьнә ньвисаре, ԝе бенә сери.

³² Әԝе бькʼәвә дәсте нәщьһуйа, ԝе ԛәрфе хԝә ле бькьн, беһӧрмәт кьн, тʼукьне,

³³ бьдьнә бәр ԛамчийа, Ԝи бькӧжьн. У рʼожа сьсийа ԝе жь мьрьне рʼабә».

³⁴ Шагьрта тʼӧ тьшт жь ван хәбәра фәʼм нәкьрьн. Әв йәк жь ԝан вәшарти бу у әв готьн сәре ԝанда рʼунәдьньшт.

Иса пʼарскьрәки кор бажаре Әриһайеда ԛәнщ дькә

³⁵ Гава Әԝ незики Әриһайе бу, йәки кор ль сәр рʼе рʼуньшти пʼарс дькьр.

³⁶ У гава бьһист кӧ әʼлаләт бәр ԝирʼа дәрбаз дьбә, пьрси: «Әв чь һʼәԝал ә?»

³⁷ Ԝирʼа готьн: «Исайе Ньсрәте дәрбаз дьбә».

³⁸ Һьнге әԝи кьрә ԛирʼин у гот: «Иса, Кӧрʼе Даԝьд, ль мьн ԝәрә рʼәʼме!»

³⁹ У йе кӧ пешийе дьчун, ль ԝи һьлатьн, кӧ дәнге хԝә бьбьрʼә, ле әԝи һе дькьрә ԛирʼин: «Кӧрʼе Даԝьд, ль мьн ԝәрә рʼәʼме!»

⁴⁰ Иса щида сәкьни у әʼмьр кьр, кӧ әԝи биньнә щәм Ԝи. У гава кор незики Ԝи бу, жь ԝи пьрси у гот:

⁴¹ «Тӧ чь жь Мьн дьхԝази кӧ Әз бона тә бькьм?» Әԝи гот: «Хӧдан, дьхԝазьм чʼәʼвед мьн бьбиньн».

⁴² У Иса ԝирʼа гот: «Бьра бьбиньн, баԝәрийа тә тӧ ԛәнщ кьри!»

⁴³ У дәстхԝәда чʼәʼвед ԝи дитьн, да пәй Иса чу у шькьри дьда Хԝәде. Тʼәмамийа ԝе щьмәʼте кӧ әв йәк дит, пәсьне Хԝәде дьдан.