Lûqa 17 - Пәймана Ну (Инщил)

Чәнд готьнед Иса дәрһәԛа гӧнәкьрьне, бахшандьне, баԝәркьрьне у борщдайинеда

¹ Иса шагьртед Хԝәрʼа гот: «Набә кӧ сәбәбийа жьрʼекʼәтьне тʼӧнәбә, ле ԝәй ль ԝи, кӧ бьбә сәбәбе ве йәке.

² Ԝирʼа һе ԛәнщ ә, кӧ бәрашәк стуйе ԝива бе гьредан у авитьне нава бәʼре, нә кӧ жь ванед бьчʼук йәки жь рʼе дәрхә.

³ Һаш жь хԝә һәбьн! Һәгәр бьре тә гӧна бькә, ле һьле, һәгәр сәр кьрьна хԝә пʼошман бә, ԝи бьбахшинә.

⁴ У һәгәр нава рʼожеда һʼәфт щара нәһәԛийе ль тә бькә у вәгәрʼә, тәрʼа бежә: ‹Әз тʼобә дькьм›, ԝи бьбахшинә».

⁵ Шандийа Хӧданрʼа гот: «Баԝәрийа мә зедә кә».

⁶ Хӧдан гот: «Һәгәр баԝәрийа ԝә ԝәкә һʼәбәкә тʼохьме хәрдале һәбә у ве дара тʼутерʼа бежьн: ‹Жь вьр рʼабә у бәʼреда дачʼькә›, әԝе йа ԝә бькә.

⁷ Жь ԝә кʼижан ә, әԝе кӧ хӧламәки ԝийи щоткʼар йан шьван һәбә, гава әԝ жь кʼәԝшен бе, ԝирʼа бежә: ‹Бьләзинә кʼәрәм кә сәр сьфре›?

⁸ Ԝе пешийе жерʼа нәбежә: ‹Шива мьн һазьр кә, пьшта хԝә гьредә у бәрдәстийе мьнрʼа бькә. Әз бьхԝьм у вәхԝьм, паше жи тӧ бьхԝә у вәхԝә›?

⁹ Гәло бона әԝ тьштед кӧ хӧлемрʼа һатьнә әʼмьркьрьне у ԝи кьрьнә, ахайе ԝи ԝе жерʼа бежә: ‹Зәʼф рʼази мә›?

¹⁰ Ӧса жи һун, гава әԝ һʼәму тьштед кӧ ԝәрʼа һатьнә әʼмьркьрьне бькьн, бежьн: ‹Әм хӧламед бекер ьн. Чь кӧ ль мә дькʼәт, мә әԝ кьр›».

Ԛәнщкьрьна дәһә кʼотийа

¹¹ Гава Иса бәрбь Оршәлиме дьчу, нава Самәрйайе у Щәлилерʼа дәрбаз дьбу.

¹² Чахе Әԝ дькʼәтә гӧндәки, дәһә мәрьвед кʼоти рʼасти Ԝи һатьн дур сәкьнин

¹³ у бь дәнге бьльнд готьне: «Исайе мамоста, ль мә ԝәрә рʼәʼме».

¹⁴ У гава Иса әԝ дитьн, ԝанрʼа гот: «Һәрʼьн хԝә нишани кʼаһина кьн». У чахе әԝ һе дьчун, паԛьж бун.

¹⁵ Ле гава жь ԝан йәки дит кӧ әԝ паԛьж буйә, пашда вәгәрʼийа, бь дәнгәки бьльнд шькьри дьда Хԝәде.

¹⁶ Әԝи хԝә дәвәрʼу авитә бәр ньгед Иса у рʼазибун дьда Ԝи. Әԝ самәри бу.

¹⁷ Һьнге Иса гот: «Нә һәр дәһә жи паԛьж бун, ле кʼане нә һәр нәһед дьн?

¹⁸ Чьма пештьри әви мәрьве хәриб кәсәк жь ԝан вәнәгәрʼийа, кӧ бьһата шькьри бьда Хԝәде?»

¹⁹ У ԝирʼа гот: «Рʼабә һәрʼә. Баԝәрийа тә тӧ ԛәнщ кьри».

Һатьна Пʼадшатийа Хԝәде

²⁰ Гава ферьсийа жь Иса пьрси, Пʼадшатийа Хԝәде ԝе кʼәнге бе, Әԝи ль ԝан вәгәрʼанд у гот: «Пʼадшатийа Хԝәде ашкәрә найе.

²¹ Нә жи ԝе бежьн: ‹Ва йә вьр ә!› йан жи: ‹Ԝе дәра һан ә!› Чьмки Пʼадшатийа Хԝәде нава ԝәда йә».

²² У шагьртед Хԝәрʼа гот: «Ԝе рʼоже бен, кӧ һуне һʼьзрәта рʼожәкә Кӧрʼе Мерьв бьн, ле набиньн.

²³ У һәгәр ԝәрʼа бежьн: ‹Ва йә вьр ә!› йан: ‹Дәра һан ә!› пәй нәкʼәвьн нәчьн.

²⁴ Чьмки чаԝа бьруск жь алики әʼзмен бьрԛ дьдә у тʼәмамийа әʼзмен рʼонайи дькә, Кӧрʼе Мерьв жи ԝе рʼожа хԝәда ӧса бә.

²⁵ Ле пешийе гәрәке Әԝ гәләки щәфа бькʼьшинә у жь ви мьләти бе тʼәхсиркьрьне.

²⁶ Чаԝа рʼожед Нӧһда дьԛәԝьмин, ӧса жи ԝе рʼожед Кӧрʼе Мерьвда бьԛәԝьмьн.

²⁷ Һьнге дьхԝарьн, вәдьхԝарьн, дьзәԝьщин у мер дькьрьн, һʼәта ԝе рʼожа кӧ Нӧһ кʼәтә гәмийе, лейи рʼабу ԛьрʼа һʼәмуйа ани.

²⁸ У ӧса жи чаԝа рʼожед Лутда бун, дьхԝарьн, вәдьхԝарьн, дькʼьрʼин, дьфьротьн, дьрʼәшандьн у чедькьрьн.

²⁹ Ле әԝ рʼожа кӧ Лут жь Содоме дәркʼәт, агьр у кʼьркʼут жь әʼзмен бари, ԛьрʼа һʼәмуйа ани.

³⁰ Әԝ рʼоже жи ԝе ӧса бә, гава Кӧрʼе Мерьв кʼьфш бә.

³¹ Ԝе рʼоже кʼи сәр хени йә у һәбука ԝи жи малда йә, бьра жорда нәйе, кӧ тьштәки һьлдә у әԝе ль кʼәԝшен ә, бьра пашда вәнәгәрʼә.

³² Жьна Лут биньнә бира хԝә.

³³ Кʼи кӧ дьхԝазә әʼмьре хԝә хьлаз кә, ԝе ӧнда кә, ле кʼи кӧ әʼмьре хԝә ӧнда кә, ԝе хьлаз кә.

³⁴ Әз ԝәрʼа дьбежьм, ԝе шәве һәгәр дӧ мәри ньвинәкеда бьн, йәке бе һьлдане, йәке бе һьштьне.

³⁵ У һәгәр дӧ кʼӧлфәт сәр дәстарʼәки бьн, йәке бе һьлдане у йа дьн бе һьштьне».

³⁷ Ԝана ле вәгәрʼанд у готьн: «Хӧдан, әве ль кʼидәре бьбә?» Әԝи жь ԝанрʼа гот: «Бәрәтʼә ль кʼӧ һәбә, тәйре жи ль ԝьр бьщьвьн».