Lûqa 14 - Пәймана Ну (Инщил)

Иса ль мала ферьсида нәхԝәшәки ԛәнщ дькә

¹ Рʼожәкә шәмийе Иса бона нанхԝарьне чу мала сәрԝерәки ферьсийа. Ԝана чʼәʼве хԝә жь сәр Ԝи нәдьбьрʼи.

² Ль ԝьр пешбәри Ԝи мәрьвәки бь нәхԝәшийа авзе һәбу.

³ Иса жь ԛанунзан у ферьсийа пьрси у гот: «Рʼожа шәмийе ԛәнщкьрьн щайиз ә йан на?»

⁴ Ԝана дәнге хԝә нәкьр. Һьнге Әԝи нәхԝәш гьрт, ԛәнщ кьр у вәрʼекьр.

⁵ Паше Әԝи ԝанрʼа гот: «Жь ԝә кʼижан ә, һәгәр кӧрʼе ԝи йан гайе ԝи бькʼәвә бире, рʼожа шәмийе перʼа-перʼа дәст нәвеже дәрнәхә?»

⁶ Нькарьбун щаба ве пьрса Ԝи бьдана.

Һинкьрьна дәрһәԛа йед кӧ ль наве хԝә дьгәрʼьн

⁷ У гава Әԝи дит, ԝәки мәрьвед тʼәглифкьри чаԝа хԝә щийе жорьн дьгьртьн, мәсәләк ԝанрʼа гот:

⁸ «Гава йәк тә гази дәʼԝате дькә, щийе жорьн рʼунәни, нәбә кӧ йәки жь тә ԛәдьртьр жи алийе ԝида тʼәглифкьри бә,

⁹ у хԝәйе дәʼԝате, аԝа готи тʼәглифкьрийе ԝә һәр дӧйа, бе тәрʼа бежә: ‹Кʼәрәма хԝә щи бьдә фьлан кәсе›. Һьнге те жь шәрма хԝә рʼаби щийе жерьн рʼунейи.

¹⁰ Ле чахе тә тʼәглиф дькьн, һәрʼә щийе жерьн рʼуне, кӧ чахе хԝәйе дәʼԝате бе тәрʼа бежә: ‹Пьсмам, кʼәрәм кә, дәрбази жоре бә!› Һьнге ԛәдьре тәйе бәр чʼәʼве һʼәму рʼуньштийа бьльнд бә.

¹¹ Аԝа һәр кәсе кӧ хԝә бьльнд кә, ԝе ньмьз бә у кʼи кӧ хԝә ньмьз кә, ԝе бьльнд бә».

¹² У Иса тʼәглифкьрийе Хԝәрʼа гот: «Чахе тӧ фьравине йан шиве датини, гази һәвал-һогьр, бьра-пьсмам йан жи дәр-щинаред хԝәйә дәԝләти нәкә, нәбә әԝ жи тә тʼәглиф кьн у ԛәнщийа тә ль тә вәгәрʼиньн.

¹³ Ле гава тӧ хԝарьнәке датини, гази фәԛир, сәԛәт, йед дькӧльн у кора кә.

¹⁴ Һьнге те хԝәзьли би, чьмки әԝана нькарьн ԛәнщийа тә ль тә вәгәрʼиньн, ле бәле Рʼожа Рʼабуна рʼастайә жь мьрьне ԝе ль тә бе вәгәрʼандьне».

Мәсәла шайийа гьран

¹⁵ Гава жь һазьра йәки әв йәк бьһист, Ԝирʼа гот: «Хԝәзи ль ԝи, кӧ Пʼадшатийа Хԝәдеда нен бьхԝә».

¹⁶ Ле Иса ԝирʼа гот: «Мәрьвәки шайикә гьран һазьр кьр у гәләк мәри тʼәглиф кьрьн.

¹⁷ Гава ԝәхте шайийе перʼа гьһишт, әԝи хӧламе хԝә шанд, кӧ һʼәму тʼәглифкьрийарʼа бежә: ‹Һәр тьшт иди һазьр ә, кʼәрәм кьн ԝәрьн›.

¹⁸ Ле һәр йәки дәстпекьр мәʼни гьрт. Йе пешьн ԝирʼа гот: ‹Мьн хԝәрʼа әʼрд кʼьрʼийә, әз әʼсәйи гәрәке һәрʼьм бьбиньм. Әз һиви жь тә дькьм, мьн бьбахшинә›.

¹⁹ У йе дьн гот: ‹Мьн пенщ щот га кʼьрʼинә, әз дьчьм кӧ ԝан бьщерʼьбиньм. Әз һиви жь тә дькьм, мьн бьбахшинә›.

²⁰ Йе сьсийа жи гот: ‹Әз зәԝьщимә, ләма нькарьм бем›.

²¹ У әԝ хӧлам вәгәрʼийа һат, әв һʼәму ахайе хԝәрʼа гьли кьрьн. Һьнге аха һерс кʼәт, хӧламе хԝәрʼа гот: ‹Зу һәрʼә мәйдан у кʼучед бажер, фәԛира, ԛопа, сәԛәта у кора тʼоп кә бинә вьр›.

²² Пәйрʼа хӧлем готе: ‹Ахайе мьн, тә чаԝа әʼмьр кьр, мьн ӧса жи кьр, ле диса щи һәйә›.

²³ У ахе хӧлемрʼа гот: ‹Дәркʼәвә сәре рʼе у дьрба, зоре ль һәр кәси бькә бинә вьр, кӧ мала мьн тʼьжи бә.

²⁴ Әз ԝәрʼа дьбежьм, кӧ жь ԝан мәрьвед тʼәглифкьри тʼӧ кәс жь шайийа мьн ԝе тьштәки тәʼм нәкә›».

Чаԝа бьбьнә шагьрте Иса

²⁵ Пәй ве йәкерʼа әʼлаләтәкә гьран тʼәви Иса дьчу у Әԝ сәр ԝанда вәгәрʼийа у гот:

²⁶ «Һәгәр йәк пәй Мьн бе у Мьн жь де у баве хԝә, жь жьн у зарʼед хԝә, жь хушк у бьрайед хԝә у ӧса жи жь хԝә зәʼфтьр һʼьз нәкә, нькарә бьбә шагьрте Мьн.

²⁷ У кʼи кӧ хаче хԝә һьлнәдә пәй Мьн нәйе, әԝ нькарә бьбә шагьрте Мьн.

²⁸ Жь ԝә кʼижан ә, кӧ бьхԝазә бьльндщикә нобәдара чекә, пешийе рʼунәни нәдә бәр һʼәсеб, гәло ԛәԝата ԝийе бьгьһиже бинә сери йан на?

²⁹ Нәбә кӧ һʼиме ԝе дайнә у нькарьбә бинә сери, йед кӧ бьбиньн ле бькʼәньн

³⁰ у бежьн: ‹Әви мәрьви дәстпекьр чекә у нькарьбу банийа сери›.

³¹ Йан жи кʼижан пʼадша пʼадшакирʼа дәре шерʼ, пешийе рʼунәни нәшеԝьрә, гәло ԝе бькарьбә бь дәһә һʼәзара бәр йәки кӧ бь бист һʼәзари те сәр ԝи бькә шәрʼ?

³² Һәгәр әԝ пе нькарә, гава һе дур ә ԝе ԛасьде хԝә бьшинә, бона льһәвһатьне һиви же бькә.

³³ Аԝа жь ԝә һәр кәс, кʼи кӧ дәсте хԝә жь тʼәмамийа һәбуна хԝә нәкʼьшинә, әԝ нькарә бьбә шагьрте Мьн.

Хԝейа бе тәʼм

³⁴ Хԝе тьштәки ԛәнщ ә. Ле һәгәр әԝ тәʼма хԝә ӧнда кә, паше әԝе бь чь тәʼме бьстинә?

³⁵ Нә ԝе дәԝса хԝәлийе бьгьрә у нә жи дәԝса пʼәйн. Ԝе бавежьнә ԝеда. Гӧһе кʼейи бьһистьне һәйә бьра бьбьһе».