Korîntî II, 9 - Пәймана Ну (Инщил)

¹ Дәрһәԛа кʼомәкдайина щьмәʼта Хԝәдеда әв тьштәки зедә йә, кӧ әз ԝәрʼа бьньвисьм.

² Чьмки әз ԝе рʼәзәдьлийа ԝә заньм у нава мәкәдонийада пе ԝә фьрʼнаԛ дьбьм дьбежьм, кӧ ԝә баԝәрмәндед ԛәза Ахайайе һе сала парва кʼаре хԝә кʼомәкдайине кьрийә у әв хирәткʼешийа ԝә, гәләк жь нав ԝанда ләԛандьнә.

³ У әз жи ԝан бьрайед хԝә дьшиньм, ԝәки фьрʼнаԛийа мьнә һьндава ԝәда, ԝе йәкеда бәтал дәрнәйе, ле һун ӧса һазьр бьн, чаԝа мьн ԝанрʼа готийә,

⁴ кӧ нәбә һәгәр мәкәдони тʼәви мьн бен у бьбиньн һун нә һазьр ьн, әм шәрми бьн (нахԝазьм бежьм һун жи) ԝе гӧманеда, йа кӧ әм ԝәда гӧман бун.

⁵ Ләма жи мьн рʼе терʼа дит, һиви жь бьра кьр, кӧ бәри мьн бенә щәм ԝә у тʼьвдарәке ԝе пʼешкʼеша гӧмрә, йа кӧ ԝә соз дабу бьбиньн. Һьнге әԝе бь рʼәзәдьлийе һазьр бә, нә кӧ бь дәсте зоре.

Гӧмрәдайин у бәред ԝе

⁶ Ве йәке бир нәкьн: Йе дәст дьдә бәр чандьне, ԝе һьндьки жи бьдьру, ле йе дәст надә бәр чандьне, ԝе гӧмрә жи бьдьру.

⁷ Дьле һәр кәсирʼа чьԛас дәрбаз дьбә, бьра һаԛаси жи бьдә, нә кӧ бьдә ле дьле ԝи пәй бә йан бь борщдарийе бә, чьмки Хԝәде йе бь дьл у әшԛ дьдә һʼьз дькә.

⁸ Хԝәде дькарә һʼәму алийава сәр ԝәда бьбаринә, ԝәки һәр алийада һәр гав һʼәму тьштед ԝәйә керһати һәбьн у зедә бә жи бона һәр кьрьнед ԛәнщ.

⁹ Чаԝа ньвисар ә: «Ԝи гӧмрә да бәләнгаза, ԛәнщикьрьна Ԝи һʼәта-һʼәтайе дьминә».

¹⁰ Әԝе кӧ тʼохьм дьдә тʼохьмрʼәш у нан жи бона хԝарьне, ԝе тʼохьм пʼешкʼеши ԝә кә у зедә кә, бәред ԛәнщикьрьна ԝә жи бьгьһинә.

¹¹ Һуне һәр тьштива дәԝләти бьн, ԝәки һәр алийава мәрʼд бьн у әԝ ԛәнщийед һун бь дәсте мә дькьн, бьбьнә мәʼни кӧ шькьрийе бьдьнә Хԝәде.

¹² У гава һун ви ԛӧльхи дькьн, нә кӧ тʼәне кемасийа щьмәʼта Хԝәде тʼьжи дькьн, ле әв йәк дькә кӧ Хԝәдерʼа һе шькьрдайин зедә бә.

¹³ Әв кьрьна ԝә рʼастийа баԝәрийа ԝә избат дькә, бь ви аԝайи шькьрийа хԝә Хԝәде тиньн бона гӧһдарикьрьна Мьзгинийа Мәсиһә кӧ һун иԛрар дькьн у бона ԝе мәрʼданийа ԝә, кӧ һун аликʼарийа ԝан у һʼәмуйа дькьн.

¹⁴ У әԝе бона ԝә дӧа бькьн, һʼәйра ԝәда бьн, бона ԝе кʼәрәма Хԝәдейә сәр кʼәрәма, йа кӧ ԝәрʼа һатийә дайине.

¹⁵ Шькьр жь Хԝәде бона ԝе дайина ԝийә кӧ найе готьн!