Korîntî II, 7 - Пәймана Ну (Инщил)

¹ Әм кӧ хԝәйе ван соза нә дәлално, дә әм хԝә жь һʼәму кʼьретийа ԛальб у рʼӧһʼе хԝә паԛьж кьн у бь хофа Хԝәде лап бӧһӧрти-жьбарә бьн.

Шабуна Паԝлос

² Мә дьле хԝәда щи кьн! Мә нәһәԛи тʼӧ кәси нәкьрийә, зийан нәдайә тʼӧ кәси у кәсәк кʼара хԝәрʼа нәдайә хәбате.

³ Әз ве йәке набежьм кӧ ԝә нәһәԛ кьм, ле чаԝа мьн пешда готийә, һун дьле мәда нә, һәгәр әм бьмьрьн йан бьжин әм тʼәви ԝә нә.

⁴ Әз гәләки ԝәда гӧман ьм, гәләки пе ԝә фьрʼнаԛ дьбьм! Нава һʼәму тәʼли-тәнгийед мәда бәрдьлийа ԝә жь сәре мьн зедәтьр ә у шабунеда кʼьм-кʼьми мә.

⁵ Бәле гава әм гьһиштьнә Мәкәдонйайе, мә ԛәт рʼьһʼәти нәдит, ле мә һʼәму алийава тәʼли-тәнги кʼьшандьн, дор-бәра шәрʼ-дәʼԝ бун, дьлада жи хәм у дәрд бун.

⁶ Ле Хԝәдейе кӧ бәр дьле шкәстийада те, бь һатьна Тито дьл да бәр мә

⁷ у нә кӧ тʼәне пе һатьна ԝи, ле бь ԝе йәке жи, кӧ чаԝа ԝә дьл дабу бәр ԝи. Әԝи мәрʼа гьли кьр, кӧ һун чьԛаси дәмана мьнда нә, шин у гьри нә у хирәта мьн дькʼьшиньн. Бь ве йәке дьле мьн һе шабун кʼәте.

⁸ Бәле һәгәр мьн пе ԝе нәʼме дьле ԝә ешанд, әз нә пʼошман ьм. Рʼаст ә әз пʼошман бум, гава мьн дит кӧ ԝе нәʼме һьнәк ԝәхт дьле ԝә ешанд.

⁹ Ле ньһа әз ша мә, нә кӧ бона ԝе йәке кӧ һун бәр хԝә кʼәтьнә, ле чьмки һун бона тʼобәкьрьне бәр хԝә кʼәтьн. Һун ль гора хԝәстьна Хԝәде бәр хԝә кʼәтьн, ӧса кӧ ԝә тʼӧ зийан жь мә нәдит.

¹⁰ Бәрхԝәкʼәтьна ль гора хԝәстьна Хԝәде мерьв бәрбь тʼобәйийе дьбә кӧ хьлаз кә у пʼошмани теда тʼӧнә, ле бәрхԝәкʼәтьна жь ве дьнйайе бәрбь мьрьне дьбә.

¹¹ Дә дина хԝә бьдьнә ԝе бәрхԝәкʼәтьна ль гора хԝәстьна Хԝәде кӧ чьԛас кʼар да ԝә: Ԝә чаԝа щәʼданд бь рʼуспити щаба хԝә да! Чь һерс, чь хоф, чь һʼьзрәт, чь хирәт, чь щәзадайина бона нәһәԛийе! Ԝә һʼәму алийава хԝә да кʼьфше, кӧ һун ван йәкада сәр ньхта һʼәлал ьн.

¹² Аԝа әԝ нәʼма кӧ мьн ԝәрʼа ньвиси, нә бона ԝи бу, йе кӧ нәһәԛи кьр у нә бона йе һатә нәһәԛкьрьне, ле бәле ԝәки әԝ дәмана ԝәйә һьндава мәда ль бәр Хԝәде әʼйан бә.

¹³ Бона ве йәке дьл һатә бәр мә. Пештьри ԝе бәрдьлһатьнеда, һе гәләки дьл һатә бәр мә бона шабуна Тито, чьмки ԝә һʼәмуйа дьле ԝи рʼьһʼәт кьрьбу.

¹⁴ Ль бәр ԝи әз пе ԝә фьрʼнаԛ бум у әз рʼурʼәш дәрнәкʼәтьм. Ле чаԝа һәр тьште кӧ мә ԝәрʼа гот рʼаст бу, ӧса жи әԝ фьрʼнаԛийа мәйә бәр Тито рʼаст дәркʼәт.

¹⁵ У дьле ԝи һе сәр ԝә гәрм буйә, гава бона гӧһдарийа ԝә һʼәмуйа бир тинә, кӧ ԝә чаԝа бь хоф у тьрс әԝ ԛәбул кьрийә.

¹⁶ Әз ша мә, кӧ һәр тьштида ԝәда гӧман ьм.