Korîntî II, 13 - Пәймана Ну (Инщил)

Тʼәми у сьлавед ахьрийе

¹ Әва щара сьсийа йә әзе сәр ԝәда бем. Чаԝа ньвисар ә: «Гәрәке бь дәве дӧ йан се шәʼда һәр тьшт бе әʼсәйикьрьне».

² Мьн бәре готийә у ньһа жи дьбежьм, чаԝа щара дӧда нава ԝәда һазьр бум, ньһа жи диса дурва ԝанрʼа дьньвисьм, йед кӧ пешда гӧнә кьрьнә у ӧса жи һʼәмуйарʼа: Гава диса бем, иди әз надьмә хатьре тʼӧ кәси,

³ чьмки һун кʼәтьнә бьн әʼнәна, кӧ бьзаньбьн, гәло Мәсиһ пе мьн хәбәр дьдә. Әԝ һьндава ԝәда нә сьст ә, ле нава ԝәда ԛәԝат ә.

⁴ Рʼаст ә Әԝ бь сьстийе һатә хачкьрьне, ле бь ԛәԝата Хԝәде сах ә. Әм йәктийа Ԝида сьст дьбьн, ле бь ԛәԝата Хԝәде һьндава ԝәда әме бьжин тʼәви Ԝи.

⁵ Һун дьле хԝә бьщерʼьбиньн, кʼа һун нава баԝәрийеда нә? Хԝә әʼнәнә кьн. Һун фәʼм накьн, кӧ Иса Мәсиһ нава ԝәда йә, тʼәне щерʼьбандьнеда һун пенәбуйи нибьн?

⁶ Ле гӧман һәйә, кӧ һуне фәʼм бькьн, кӧ әм нә пенәбуйи нә.

⁷ Ле әм дӧа жь Хԝәде дькьн, кӧ һун хьрабийе нәкьн, нә кӧ ԝәки әм щерʼьбандьнеда ԛәнщ кʼьфш бьн, ле ԝәки һун ԛәнщийе бькьн, һәгәр әм пенәбуйи жи кʼьфш бьн.

⁸ Чьмки әм нькарьн тьштәки ль рʼастийе бькьн, ле тʼәне бона кʼара ԝе.

⁹ Әм ша дьбьн, гава әм сьст дьбьн у һун ԛәԝат дьбьн. У әм жи бона ԝә дӧа дькьн, ԝәки һун тʼам бьгьһижьн.

¹⁰ Бона ван йәка әз дурва ԝәрʼа дьньвисьм, кӧ нәбә гава әз бем, һьндава ԝәда һʼьшкийе бькьм бь ԝи һʼӧкӧме кӧ Хӧдан дайә мьн, йа кӧ бона авакьрьне йә, нә бона хьрабкьрьне.

¹¹ Һәйнәсәр хушк-бьрано, хԝәш бьн! Сәр хԝәда ԝәрьн, дьл бьдьнә һәвдӧ, сәр нетәке бьн, ль пәй әʼдьлайийе бьн у Хԝәдейе һʼьзкьрьне у әʼдьлайийе ԝе тʼәви ԝә бә.

¹² Сьлаве бьдьнә һәв бь рʼамусана шире һʼәлал. Тʼәмамийа щьмәʼта Хԝәде ль ԝә сьлав дькә.

¹³ Кʼәрәма Хӧдан Иса Мәсиһ, һʼьзкьрьна Хԝәде у һәләԛәтийа Рʼӧһʼе Пироз тʼәви ԝә һʼәмуйа бә.