Korîntî II, 1 - Пәймана Ну (Инщил)

Сьлавкьрьн

¹ Жь Паԝлосе бь әʼмьре Хԝәде шандийе Мәсиһ Иса у Тимотʼейойе бьрайе мә, щьвина Хԝәдейә Корьнтʼерʼа у ԝе тʼәмамийа щьмәʼта Хԝәдерʼа, йа кӧ тʼәвайийа ԛәза Ахайайеда йә:

² Дә бьра кʼәрәм у әʼдьлайийа Баве мә Хԝәде у Хӧдан Иса Мәсиһ ль ԝә бә.

Паԝлос шькьрийе дьдә Хԝәде

³ Шькьр Хԝәдейе Баве Хӧдане мә Иса Мәсиһрʼа, Баве дьлшәԝатийе у Хԝәдейе һʼәму бәрдьлийе.

⁴ Әԝ нава һʼәму тәʼли-тәнгийада дьл дьдә бәр мә, ԝәки әм жи бькарьбьн дьл бьдьнә бәр ԝан, йед кӧ нава һәр щурʼә тәʼли-тәнгийада нә, бь ԝе бәрдьлийе, пе кʼижане әм хԝәха жь Хԝәде тенә бәрдьликьрьне.

⁵ Бәле чаԝа әм тʼәви ԝан щәфайед Мәсиһә гәләк дьбьн, ӧса жи гәләки бь дәсте Мәсиһ бәр дьле мәда те һатьне.

⁶ Һәгәр әм тәʼли-тәнгийада нә, әԝ бона бәрдьли у хьлазбуна ԝә йә у һәгәр әм бәрдьликьри нә, әԝ бона ԝе бәрдьлийа ԝә йә, кӧ һун бькарьбьн бь сәбьре ԝан тәʼли-тәнгийа бькʼьшиньн, кʼижана әм жи дькʼьшиньн.

⁷ У әм ԝәда әʼсәйи гӧман ьн, чьмки әм заньн кӧ һун чаԝа тʼәви щәфайед мә нә, ӧса жи тʼәви бәрдьлийа мә нә.

⁸ Әм нахԝазьн кӧ һун һаш жь ԝан тәʼли-тәнгийа тʼӧнәбьн хушк-бьрано, йед кӧ мә ԛәза Асйайеда кʼьшандьн. Әм жь ԛәԝата хԝә дәр һаԛаси кʼәтьнә бьн баред гьран, һʼәта кӧ мә дәсте хԝә жь әʼмьре хԝә жи кʼьшанд.

⁹ Бәле мә хԝәрʼа ԛьрара мьрьне һʼәсаб кьр, ле әв йәк бу ԝәки әм гӧмана хԝә нәдьнә сәр хԝә, ле сәр Хԝәде, Йе кӧ мьрийа жь горʼа рʼадькә.

¹⁰ Жь дәсте ԝе мьрьна тьрс у хоф Әԝи әм хьлаз кьрьн у ԝе хьлаз кә жи. У гӧмана мә һәйә кӧ ԝе диса мә хьлаз кә,

¹¹ бь аликʼарийа ԝан дӧайед кӧ һун бона мә дькьн. Бь ви аԝайи бь сайа дӧайед гәләка кʼәрәм ԝе мәрʼа бе дайине у гәләке бона мә шькьрийе бьдьнә Хԝәде.

Паԝлос шьровәдькә чьма нәчуйә Корьнтʼе

¹² Рʼуспитийа мә әв ә: Исафа мә шәʼдәтийе дьдә, ԝәки мә бь дьле сах у вәкьри жь Хԝәдеда ль ве дьне әʼмьре хԝә дәрбаз кьр, илаһи һьндава ԝәда, нә кӧ бь сәрԝахтийа мәрьвайийе, ле бь кʼәрәма Хԝәде.

¹³ Әм тьштәки дьн ԝәрʼа наньвисьн, пештьри ԝан тьштед кӧ һун дькарьн бьхуньн у фәʼм бькьн у әз гӧман ьм кӧ һуне тʼам фәʼм бькьн,

¹⁴ чаԝа жь пʼьрʼи-һьндьки ԝә әм фәʼм кьрьнә, ԝәки һун бьгьһижьнә ԝе фәʼмине кӧ әм рʼуспитийа ԝә нә, чаԝа һун жи йа мә нә, Рʼожа һатьна Хӧдан Иса.

¹⁵ Мьн бь ве гӧмане шеԝьра хԝә кьр, пешийе бьһатама щәм ԝә, кӧ ԝә дӧ щара кʼәрәм бьстанда,

¹⁶ аԝа готи сәрик бьда ԝә, жь щәм ԝә бьчума Мәкәдонйайе у жь Мәкәдонйайе жи диса сәр ԝәда вәгәрʼийама, кӧ ԝә жи әз ль алийе Щьһустанеда вәрʼекьрама.

¹⁷ Гава әз аһа дьшеԝьрим, гәло мьн сьвькайи кьр? Йан шеԝьра хԝәда мина бәнде ве дьнйайе шеԝьрим, кӧ «Бәле» у «На»-йа мьн сьбәһ-евар нәбә йәк?

¹⁸ Ле Хԝәде шәʼдә йә, кӧ созе мә ԝәрʼа нәбуйә «Бәле» у паше «На».

¹⁹ Чьмки Кӧрʼе Хԝәде, Иса Мәсиһ кӧ пе мә ԝәрʼа һатә даннасинкьрьне, (бь мьн, Силас у Тимотʼейо), «Бәле» у «На» нәбу, ле нава Ԝида тʼьме «Бәле» йә.

²⁰ Чьмки һʼәму созед Хԝәде бь Иса Мәсиһ «Бәле» нә, ләма жи әм бь Ԝи «Амин» дьбежьн, бона рʼумәта Хԝәде.

²¹ У Хԝәде йә, йе кӧ әм ԝәва тʼәвайи йәктийа Мәсиһда һʼимгьрти кьрьн. Хут Ԝи әм кʼьфш кьрьн

²² у мора Хԝә дани сәр мә, Рʼӧһʼе Пироз кьрә дьле мә чаԝа бьһе жь бәр созе Хԝәва.

²³ Ле сәр мьнрʼа Хԝәде шәʼдә йә, кӧ мьн ԛемиши ԝә нәкьр, кӧ нәһатьмә Корьнтʼе.

²⁴ Әм һʼӧкӧми сәр баԝәрийа ԝә накьн, чьмки һун баԝәрийеда шьдийайи нә, ле әм тʼәви ԝә дьхәбьтьн бона шабуна ԝә.