Korîntî I, 9 - Пәймана Ну (Инщил)

Изьн у мәщалед шандийа

¹ Нә әз аза мә? Нә әз шанди мә? Нә мьн Хӧдане мә Иса бь чʼәʼва дит? Нә һун пе худана мьн пʼара Хӧдан кʼәтьн?

² Һәгәр әз шандийе һьнәкед майин нибьм, ле бәле бе шьк шандийе ԝә мә! Чьмки мора шандитийа мьн һун ьн, кӧ пʼара Хӧдан кʼәтьн.

³ Щаба мьн бона йед кӧ дькьн жь мьн гьлийа бькʼьшиньн әв ә:

⁴ Гәло изьна мә тʼӧнә әм жь бәр хәбата хԝәва бьхԝьн у вәхԝьн?

⁵ Гәло изьна мә тʼӧнә әм кʼӧлфәтәкә баԝәрийеда тʼәви хԝә бьгәрʼиньн, чаԝа шандийед дьн, бьрайед Хӧдан у Пәтрус дькьн.

⁶ Йан гәрәке әз у Барнабас тʼәне бьхәбьтьн сәре хԝә хԝәй кьн?

⁷ Кʼижан әскәр жь кʼисе хԝә әскәрийе дькә? Кʼи рʼәз датинә у бәре ԝе нахԝә йан йе ль бәр пез ә шире пез вәнахԝә?

⁸ Әз ван тьшта бь мәрьвайи набежьм. Нә Ԛанун жи ԝе йәке дьбежә?

⁹ Чаԝа Ԛануна Мусада ньвисар ә: «Дәве гайе бедәреда дьхәбьтә гьренәдә». Гәло хәма Хԝәде бона га йә?

¹⁰ Йан ԝе йәке бона мә дьбежә? Бәле, әв йәк бона мә һатә ньвисаре, ԝәки әԝе кӧ щоте хԝә дькә, гәрәке бь гӧман щот кә у йе кам дькә, гәрәке гӧман бә, кӧ ԝе кʼәда хԝә бьхԝә жи.

¹¹ Һәгәр мә нава ԝәда тьштед рʼӧһʼани чандьн, гәло тьштәки мәзьн ә, кӧ жь ԝә тьштед ве дьне бьдьрун?

¹² Һәгәр изьна һьнәкед дьн һәйә кʼаре жь ԝә бьбиньн, нә йа мә һе зедә һәйә? Ле мә әв изьн пек нәани. Сәрда жи ль һәр тьшти сәбьр кьр, кӧ нәбьнә пешибьрʼе Мьзгинийа Мәсиһ.

¹³ Һун ньзаньн әԝед кӧ пʼарьстгәһеда дьхәбьтьн жь пʼарьстгәһе жи дьхԝьн? У әԝед хьзмәткʼарийа горигәһе дькьн, жь горигәһе жи пʼара хԝә дьстиньн.

¹⁴ Ӧса жи Хӧдан әʼмьр кьр, кӧ йед Мьзгинийе даннасин дькьн, жь Мьзгинийе бьжин.

¹⁵ Ле мьн жь ван изьна ԛәт йәк пек нәани, нә жи ньһа дьньвисьм кӧ ван изьна пек биньм. Дә бьра әз бьмьрьм, нә кӧ йәк рʼуспитийа мьн бәтал кә.

¹⁶ Бәле әз нькарьм пʼәйа бьдьмә хԝә һәгәр әз Мьзгинийе даннасин кьм, чьмки әв дәйне стуйе мьн ә. Ԝәй ль мьн һәгәр әз Мьзгинийе даннасин нәкьм!

¹⁷ У һәгәр мьн әв йәка бь һʼәмде хԝә бькьра, һьнге хәлата мьне һәбуйа, ле әз ве йәке нә бь һʼәмде хԝә дькьм, чьмки әва ԛӧльхәк ә ль мьн һатийә спартьне.

¹⁸ Аԝа иди чь йә хәлата мьн? Әв ә, кӧ әз даннасинийа хԝәда Мьзгинийе бе һәԛ бьдьм, изьна хԝә Мьзгинидайинеда бь зора хԝә пек нәйньм.

¹⁹ Рʼаст ә әз жь һәр кәси аза мә, ле әз диса хԝә дькьмә хӧламе һʼәмуйа, ԝәки һе гәләка ԛазьнщ кьм.

²⁰ Бона щьһуйа, дьбьмә мина щьһуйа, ԝәки щьһуйа ԛазьнщ кьм. Аԝа готи бона йед бьн Ԛануна Мусада, дьбьмә мина йед бьн Ԛануне, ԝәки йед бьн Ԛанунеда ԛазьнщ кьм, (ле нә кӧ әз бьн Ԛанунеда мә).

²¹ Бона йед бе Ԛанун, дьбьмә мина йед бе Ԛанун, ԝәки йед бе Ԛанун жи ԛазьнщ кьм, (нә кӧ әз бе ԛануна Хԝәде мә, ле әз бьн ԛануна Мәсиһда мә).

²² Бона сьста дьбьмә мина сьста, ԝәки йед сьст ԛазьнщ кьм. Бона һʼәмуйа әз дькʼәвьмә һʼале һәр кәси, ԝәки һәр дәрәщада бькарьбьм һьнәка хьлаз кьм.

²³ Ван һʼәму тьшта әз иди бона Мьзгинийе дькьм, ԝәки әз бьбьмә һәвал-пʼаре дӧа-дьрозгед сәр ԝе.

²⁴ Һун ньзаньн йед ләщмәйданеда нә, һʼәму жи дьрʼәвьн, ле тʼәне йәк хәлате дьстинә? Ӧса бьрʼәвьн, кӧ һун бьстиньн.

²⁵ Әԝед кӧ дькʼәвьнә ләще, хԝә һини гәләк тьшти дькьн, ԝәки ԝе кʼофийа кӧ дьчʼьлмьсә бьстиньн, ле кьрьна мә бона кʼофийа һʼәта-һʼәтайе йә.

²⁶ Бона ԝе йәке әз ӧса нарʼәвьм чаԝа йед бемәрәм, йан жи бь кʼӧлма һәрʼьмә бе.

²⁷ Ле әз зордарийе ԛальбе хԝә дькьм у ԝе зәфт дькьм, кӧ нәбә хәлԛе гази ләще кьм, ле әԝ хԝәха жь дәст мьн һәрʼә.